Detulonomo 34 - Chiyawo Bible

Ciwa ca Mose

¹ Mose* ŵakwesile Litumbi lya Nebo, kutyocela ku yiŵata ya Mowabu. Ŵajile kwika mpaka pacanya Petumbi lya Pisiga lili kungopoko lyuŵa kwa Yeliko kwele AMBUJE* ŵamlosisye cilambo cosope ca Giliyadi mpaka ku cilambo ca Dani,

² Cilambo cosope ca Nafutali, yilambo yosope ya Efelemu ni Manase, ni cilambo ca Yuda mpaka kuja kwika ku Nyasa ja Mediteleniyani.

³ Ŵamlosisye soni mbali ja kum'mwela kwa Negebu ni ciŵata cele cikasaja kwika mpaka ku Yeliko, msinda wa yitela ya migwalangwa mpaka ku Sowali.

⁴ AMBUJE ŵamsalile Mose kuti, “Celeco ni cilambo cinaŵisile cilanga* ni Abulahamu,* Isaki ni Yakobo* kuti tinjicipeleka kwa yisukulu yawo. Namkundile m'mwejo kuti mcilole, nambo nganimkunda m'mwejo kuti mkajinjile.”

⁵ Myoyo Mose, jwakutumicila jwawo AMBUJE ŵawile kweleko, mcilambo ca Mowabu, mpela mwele AMBUJE ŵamsalilile.

⁶ AMBUJE ŵamsicile Mose m'malembe ku Mowabu kukoko, m'ciŵata mwakulolegana ni musi wa Beti Piyoli. Nambo pangali mundu jwalijose jwakugamanyilila malo gasyesyene palili lilembelyo.

⁷ Mose ŵawile ali ni yaka 120 nipo ŵaliji ŵaciŵela ŵamacili, soni meso gakwe galiji ciŵela mkulola mwamacili.

⁸ Aisalaeli ŵalisile malilo gakwe m'masiku makumi gatatu m'Ciŵata ca Mowabu cila.

⁹ Yoswa mwanace jwa Nuni, jwagumbalilwe ni lunda ligongo Mose mkinawe ŵamsajice magasa kuti ajinjile m'malo mwa jwalakwe. Aisalaeli ŵampikanile Yoswa, ni kugakuya malamusi gosope gele AMBUJE ŵagapelece kupitila mwa Mose.

¹⁰ Kutandilila pelepo, paliji pangali soni jwakulocesya* jwine juŵapali jwakulandana ni Mose. AMBUJE ŵaliji mkuŵecetana najo meso ni meso.

¹¹ Pangali jwakulocesya jwalijose juŵatesile yindu yakusimonjeka ni yamacili mpela yele AMBUJE ŵamsalile Mose kuti ayitende pameso pa Mwenye jwa ku Iguputo, ni acakulungwakulungwa ŵakwe ni ŵandu wosope ŵa mcilambo mwakwe.

¹² Pangali jwakulocesya jwine jwalijose jwele juŵatesile yindu yekulungwa ni yakogoya mpela yele yiŵatesile Mose pameso pa Aisalaeli wosope.