Detulonomo 33 - Chiyawo Bible

Mose akupeleka upile ku ngosyo sya Aisalaeli

¹ Mose,* mundu jwa Mlungu jula, mkinawe ŵapelece upile kwa Aisalaeli.

² “AMBUJE* ŵayice kutyocela Kwitumbi lya Sinayi, ni ŵatukopocele kutyocela ku Seyili, ni ŵatulangucile kutyocela Kwitumbi lya Palani. Malayika 1,000 galiji nawo pamo, moto wakolela ŵaliji m'magasa mwakwe

³ AMBUJE akusiŵanonyela ŵandu ŵakwe, soni akasiŵacenjela wosope ŵele ŵakulipeleka kwa jwalakwe, ŵanduwo akusalijiganya kutyocela kwa AMBUJE, akusapikanila majiganyo gakwe,

⁴ ni kuti malamusi giŵatupele Mose, malamusigo gali cipanje cakupunda mnope ca ŵandu ŵa lukosyo lwa Yakobo.*

⁵ AMBUJE ŵaliji mwenye jwa ŵandu ŵakwe Aisalaeli ndaŵi jele ngosyo ni ŵakwalongolela ŵawo ŵasongenye pa malo gamo.”

⁶ Pakusala ya lukosyo lwa Lubeni, Mose ŵasasile kuti, “Lubeni akasimacika, atamilicice nditu, atamose kuti ŵandu ŵakwe ali ŵamnono.”

⁷ Ya lukosyo lwa Yuda ŵasasile kuti, “Ŵalakwe AMBUJE, ŵapikane ŵa lukosyo lwelelu, ndaŵi jakulila, ŵakamucisye, ŵalumbikanye soni ni ngosyo sine. Ŵalakwe AMBUJE ŵalimbikasye kuti alicenjeleje jika, soni ŵakamucisye pakulimbana ni amagongo ŵawo.”

⁸ Ya lukosyo lwa Lefi, ŵatite kuti, “Ŵalakwe AMBUJE, tumaganga twa Tumimu ni Ulimu, twamanyisye lisosa lyawo, kupitila mwa Alefi, ŵakutumicila ŵenu ŵakulupicika, mwalinjile mesi ga Masa gala, mwalimbene nawo ku mesi ga Meliba gala.

⁹ Jemanjajo ŵalosisye kuti akwakulupilila ŵalakwe kwapunda acinangolo ŵawo, acalongo acimjawo, atamose ŵanace ŵawo ŵagapikanile malamusi genu, soni ŵacikulupilile cilanga* cenu.

¹⁰ Jemanjaji ni ŵatacajiganya ŵanace ŵa Yakobo majiganyo genu ni Aisalaeli malamusi genu. Tacitutumisya ubani* pameso penu, tacitaga mbopesi syakutinisya pa malo genu gakupelecela mbopesi.

¹¹ Ŵalakwe AMBUJE, akamucisye lukosyo lwawo kuti luŵe lwamacili, yitendo yawo jemanjaji yiŵe yakwanonyelesya ŵalakwe. Ŵakusisyana nawo amagongo ŵawo ŵajonanje wosopewo, kwakuti akasajimuka soni.”

¹² Ya lukosyo lwa Benjamini ŵatite, “Lukosyo alu ni lwele AMBUJE akusalunonyela, soni akusalucenjela. AMBUJE akulusunga lisiku ni lisiku, pakutama mcilambo mwawomo.”

¹³ Ya lukosyo lwa Yosefe ŵasasile kuti, “AMBUJE acipe upile cilambo cawo, cikole ula jejinji, soni cikole yisima yejinji.

¹⁴ Cilambo cawo ciŵe cana upile, pakola yisogosi yakwiwula ni lyuŵa, cikole soni yagowola yejinji ndaŵi jilijose.

¹⁵ Matumbi gawo gakalakalaga gakole yisogosi, soni gagumbale ni yagowola yejinji.

¹⁶ Cilambo cawo cikole yindu yejinji, cipate upile ni yambone ya AMBUJE, ŵele ŵaŵaŵecete mwiwukutu lilyakolelaga moto lila. Upile wesopewu utulucile pa lukosyo lwa Yosefe, pakuti ŵaliji jwakulongolela pasikati pa acalongo acimjakwe.

¹⁷ Yosefe akwete macili gamti mpela ng'ombe jamkambako, misengo jakwe jamti mpela njati, tacatoposya ŵandu ŵa ngosyo sine ni misengo jeleji, tacatoposya wosopewo mpaka kumbesi kwa cilambo. Misengo jeleji ni ŵandu 1,000 ŵa lukosyo lwa Efelemu ni ŵandu 1,000 ŵa lukosyo lwa Manase.”

¹⁸ Ya lukosyo lwa Sebuloni ni Isakala ŵasasile kuti, “Sebuloni asangalale pa malonda gakwe,

¹⁹ Akusaŵilanjila ŵandu ŵa ngosyo sine ku matumbi akusapelekaga mbopesi syakwenela kweleko, ligongo lyakuti akusasimana cipanje, pakutenda malonda ga m'nyasa, ni kutyocela ku mcenga mungulugulu nyasa.”

²⁰ Ya lukosyo lwa Gadi ŵasasile kuti: “Acimbicikwe AMBUJE ŵaŵacikusisye cilambo ca Gadi. Gadi akusasakula mpela lisimba lya mkolo, akusapacula mkono ni cikalakasa camtwe wakwe.

²¹ Ŵalijigalile acimsyene mbali jambone ja cilamboco; mbali ja jwakulongolela ŵajipelece kwa jemanjaji. Ŵagasunjile majiganyo ni malamusi gosope ga AMBUJE, pa ndaŵi jiŵasongenye ŵakulongolela ŵa Aisalaeli pa malo gamo.”

²² Ya lukosyo lwa Dani ŵasasile kuti, “Dani ali mpela mwanace jwa lisimba, jwele jwakusasumba kutyocela ku Bashani.”

²³ Ya lukosyo lwa Nafutali ŵasasile kuti, “AMBUJE amsalalile mtima Nafutali ni ŵampele upile wejinji. Malile ga cilambo cakwe tigakayice mpaka kum'mwela, kutyocela ku Nyasa ja Galileya.”

²⁴ Ya lukosyo lwa Asha, ŵasasile kuti; “Ŵana upile Asele kusipunda ngosyo sine. Acalongo acimjakwe amnonyele, cilambo cakwe ciŵe cana cipanje ni yitela yejinji ya Olifi.

²⁵ Ajicenjele misi jakwe ni matanga ga yisyano m'yipata ya luŵala lwakusyungulila misijo, macili gakwe gatamilicice mpela masiku ga umi wakwe.”

²⁶ Jemanja Aisalaeli, ngumsalila kuti pangali Mlungu jwine, jwakulandana ni Mlungu jwenu, jwele jwakusajendaga ni lumbili mwinani, akusakwela pa mawunde, ni akusayika kukumkamucisya.

²⁷ Kwa AMBUJE ni kuli kwakutilila kwenu, ŵele ni ŵakumsunga pa cilambo capasi pano, ni macili gawo gangamala. Ŵatopwesye amagongo ŵenu wosope, ndaŵi jimwaliji mkwenda pa ulendo wenu, ŵamsalile soni kuti mwajonanje wosope.

²⁸ Myoyo Aisalaeli ali pa mtendele, yisukulu ya Yakobo yikutama cenene mcilambomo, mwele muli mwangasoŵa tiligu ni finyo, mwele mangame gakwamba kugwa kutyocela kwinani.

²⁹ Mkwete upile m'mwejo Isalaeli, pangali ŵakulandana ni m'mwejo, m'mwejo lukosyo lwele AMBUJE ŵalukulupwisye. AMBUJE ni ŵakumcenjela soni ali upanga wenu ŵele ŵakusamcenjela ni kumkamucisya kupunda pa ngondo. Amagongo ŵenu taciyika kukumŵenda kuti mwatendele canasa, nambo m'mwejo timcatwinyicisya pasi.