Detulonomo 32 - Chiyawo Bible

¹ “Cilambo ca kwinani, pikanani maloŵe gangu, cilambo capasi mpikanicisye yinguti mbecete.

² Majiganyo gagwe mpela madondo ga ula, ni culo pa cilambo capasi mpela mangame. Maloŵe gangu tigatuluce mpela mangame pa yitela ya mwana, mpela ula ja mawawa pa manyasi ganasipukape.

³ Tinjililumba lina lya AMBUJE,* ni ŵandu ŵakwe taciwulumba ukulungwa wa Mlungu.

⁴ “AMBUJE ni ŵali ŵakumcenjela ŵenu ŵamacili, yitendo yawo yosope yili yagoloka ni ya cilungamo. Mlungu jwenu ali jwakulupicika ni jwa kuwona, akusatenda yindu yakwenela ni ya mtendele.

⁵ Nambo jemanja mli ŵandu ŵangakulupicika, ŵangajenela kuŵa ŵandu ŵakwe. Mli ŵandu ŵa lukosyo lwakulemwa ni lwa unami.

⁶ AMBUJE ni ŵiŵampanganyisye soni ni ŵali atati ŵenu. Nambo jemanja mwatendele yindu yakuloŵela ni yangali mate kose.

⁷ “Mkumbucileje yakala mganicisye ya munyuma nditu, mwawusye baba ŵenu tamsalile yiyatendekwe. Mwawusye acakulungwakulungwa, tamsalile yakalayo.

⁸ Ŵakwinani Mnope ŵapelece cilambo kwa ŵandu ŵa mitundu jine;* ŵasosile pakuti ŵandu atameje, Ŵapelece lilayika lyakulolela lukosyo lulilose.

⁹ Nambo AMBUJE asyene ŵasagwile kululolela lukosyo lwa Yakobo.

¹⁰ “Ŵasimene ali mgamba kwendajenda mcipululu, kwitinji kwangali ŵandu. Ŵasamalile cenene ni kwacenjela, mpela mwakalicenjele asyene.

¹¹ Ŵatesile mpela kapungu jwakwajiganya ŵanace ŵakwe kuguluka; jwagamba kusyungulila pacanya pa ŵanace ŵakwewo, ali atambasukwile mapapiko gakwe, kuti ŵakamule ŵanacewo, ni kwanyakula pa mapapiko gakwe getambasukule.

¹² AMBUJE jika ni ŵiŵalongolele ŵandu ŵakwe, mwangakamucisidwa ni milungu ja cilendo.

¹³ “Ŵakamucisye kuti alamulileje yilambo ya matumbi, ŵalile yakumela ya m'migunda. Ŵalile uci uŵawupatile m'malwala ni mawuta ga olifi* gakukopoka mwitaka lya maganga.

¹⁴ Ng'ombe ni mbusi syawo syapele mkaka wejinji, ŵakwete ngondolo, mbusi, ni ng'ombe syambone kwisa soni tiligu ni finyo jwambone.

¹⁵ “Ŵandu ŵa AMBUJE ŵaliji ŵakusicila, ŵaliji ŵakwimbala ligongo ŵaliji mkulya cenene nambo jemanjaji, ŵamjimucile Mlungu jwawo juŵapanganyisye ŵamkanile jwakwacenjela ni mkulupusyo jwawo jwamacili.

¹⁶ Ŵanduŵa ŵatendesye AMBUJE kuŵa ŵa wiwu, ligongo lyakutumicila milungu ja cilendo, ulemwa* uŵatesilewo watumbilisye AMBUJEWO.

¹⁷ Jemanjajo ŵatasile mbopesi kwa misimu jakusakala* jimkinijiŵa kose milungu, milungu jimkinajimanyilila Aisalaeli ni kalakose, milungu jimkinajicimbicisya acinangolo ŵawo ni kala kose.

¹⁸ Ŵamliŵalile Mlungu jwawo juŵapanganyisye, ŵamkanile Mlungu jwele juŵapele umi.

¹⁹ “Piŵayiweni yele yinduyi AMBUJE, ŵatumbile, ni ŵakanile ŵele ŵanduwo, ligongo ŵanace ŵawo ŵacalume ni ŵacakongwe ŵamtumbilisye

²⁰ Jwalakwe ŵatite, ‘Tinjajasa, soni tinjiciwona cakuti natende, ligongo ŵandu ŵeleŵa ali ŵakunyenga soni ali ŵanace ŵangakulupicika

²¹ Milungu jawo ja unami najitendele wiwu, milungu jawo ja cilendo andumbilisye najo, none jwakwe tinatendesye wiwu, ligongo tinajisamalile mitundu ja ŵandu ŵangalumbana ni tacipya mtima ligongo lyakuti une nanonyele ŵandu ŵa lukosyo lwangalumbana.

²² Kutumbila kwangu tikucikolela mpela moto, tikuciyika mpaka ku cilambo ca ŵandu ŵakuwa. Tucijoca yindu yosope ya pa cilambo, tucitinisya matumbi mpaka mwiŵanda mwakwe.

²³ “ ‘Tinjawunjicila yisawusyo yayikulungwa yangamala, mipamba jangu josope tijicimalila pa jemanjajo.

²⁴ Tinjatumicisya sala jakogoya; malungo ni yilwele yakuwa nayo. Tinjatumicisya yilombo yamwitinji kuti yasawusye. Majoka ga ululu tigacaluma.

²⁵ Taciwila m'misewu ligongo lya ngondo, taciwila m'nyumba ligongo lya woga, Acacanda ni ŵali taciwa, atamose ŵanace ni ngalamba nombe nawo ngasakola umi.

²⁶ Sacileje kuti najonanje ŵandu wosopewo, kuti ŵandu ŵa pacilambo capasi pano akasiŵakumbucila amta jumo.

²⁷ Nambo ngingusosa kuti amagongo ŵawo akopoce pameso pa une, ngangusaka kuti amagongo aganisye mwakulemwa. Ni kutanda kusala kuti twapundile ŵandu ŵeleŵa pa ngondo mwamacili getu, ngaŵa kuti Mlungu ni juŵatesile yeleyi.’

²⁸ “Aisalaeli ali ŵandu ŵa lukosyo lwangaganisya cenene, soni ŵangali lunda.

²⁹ Ligongo akaŵe ŵandu ŵalunda akapikanicisye, soni akamanyilile yakomboleka kwagwila.

³⁰ Nambi ligongo cici mundu jumo ŵakombolece kwapunda ngondo ŵandu 100, soni ŵandu ŵaŵili ŵapundile pa ngondo ŵandu 1,000? Ligongo lyakuti AMBUJE, Mlungu jwawo ŵalesile jika, Mlungu jwawo jwamacili ŵajasile.

³¹ Amagongo ŵawo akusamanyilila kuti milungu jawo jangali macili, soni jangalandana ni Mlungu jwa Aisalaeli.

³² Amagongo ŵawo ali ŵandu ŵakusakala mnope mpela ŵandu ŵa misinda ja Sodomu ni Gomola, ali mpela mipeleya jakusogola yisogosi yakwe yakuŵaŵa ni ya ululu,

³³ ali ŵakusakala mnope mpela finyo jwewanganye ni ndulu ja ululu wa lijoka, ululu wakupweteka wa lipili.

³⁴ “Yeleyitu nayisunjile, yili yakusisika mkati mwa mtima wangu.

³⁵ Kuwucisya yakwenelela kuli kwangu, soni ndaŵi jakuti agwe tijicikwanila. Lisiku lyakuyiwona yipwetesi liŵandicile, konasika kwawo tikuyice pangakaŵa.

³⁶ AMBUJE tacatendela ŵandu ŵakwe yakulungamika, tacatendela ŵakutumicila ŵakwe ya canasa pitaciwona kuti macili gawo gamasile, soni pitaciwona kuti ngipasigala ŵandu, kanga ali kapolo kapena mlukosyo.

³⁷ Pelepo AMBUJE tacawusya ŵandu ŵakwe kuti, ‘Nambi milungu jamacili jimwajikulupililaga jila jili kwapi?

³⁸ Mwajilisisye mawuta ga nyama simwapelekaga mbopesi syenu, mwajipele finyo kuti jimwe. Jiyicetu sambano kuti jimkamucisye, jijanguye jimcenjele.

³⁹ “ ‘Mlolecesye sambano kuti Mlungu jula ni une, une jika, pangali soni mlungu jwine, Ngusawulaga soni mnene ngusapeleka umi, Ngusawulasya, mnene soni ngusaposya, soni pangali jwine jwa mpaka asisye une.

⁴⁰ Ngukwesya mkono wangu kwinani, ngulumbila kuti uneji ndili Mlungu jwa umi wangamala

⁴¹ kuti tinjinola upanga wangu wakunyesima ni tinjilolecesya kuti cilungamo citendekwe. Amagongo ŵangu tinjawucisya cilango, ŵele ŵakuŵengana ni une tinjapa cilango.

⁴² Mipamba jangu tijicicejela ni miasi jawo, ni upanga wangu tiwucisoma mnowu wawo. Ŵakuwulala ni ŵakukamulwa ukapolo wosopewo taciwa soni mitwe jawo jajikwete umbo syasilewulewu tijicikatidwa.’

⁴³ “Jemanja ngosyo syosope sya ŵandu, mwalumbeje ŵandu ŵa AMBUJE, AMBUJE akusapeleka cilango kwa wosope ŵakuwulaga ŵandu ŵakwe, akwawucisya amagongo ŵakwe soni akutyosya ulemwa mcilambo ca ŵandu ŵakwe.”

⁴⁴ Mose* ni Yoswa mwanace jwa Nuni, ŵagasasile pamtima maloŵe gosope ga nyimbo jeleji, Aisalaeli ŵaliji mkugapikana.

Maloŵe gambesi ga Mose

⁴⁵ Mose ali amasile kwajiganya ŵandu maloŵe ga nyimbo gosopega,

⁴⁶ Ŵasalile soni kuti, “Mgakumbucileje cenene malamusi gele ginampele lelo jinoga. Mwasalile ŵanace ŵenu kuti agapikanileje mwakulupicika maloŵe gosope ga malamusiga.

⁴⁷ Maloŵega nganigaŵa maloŵe gangali mate. Nambo maloŵe gelega ni gali umi wenu. Mkagapikanileje malamusi gelega kuti mkatamilicice mcilambo cimkuja kutama pesi pa Yolodani.”

⁴⁸ Lisiku lilyolyo, AMBUJE ŵaŵecete ni Mose kuti,

⁴⁹ “Mkwele Litumbi lya Nebo lyele lili ku matumbi ga Abalimu, lyele lili mcilambo ca Mowabu, mwakulolegana ni msinda wa Yeliko. Mcilole cilambo ca Kenani cele cingwapa Aisalaeli.

⁵⁰ M'mwejo timkawile petumbi lyelelo, mpela mpwenu Aloni* ŵawilile Petumbi lya Holi.

⁵¹ Ligongo lyakuti jemanja ŵanaŵaŵili nganimkulupilila mwa une, pameso pa Aisalaeli. Ndaŵi jimwaliji ku mesi ga Meliba ciŵandika ni musi wa Kadeshi, mcipululu ca Sini, nganimunjimbicisya mwakwanila pameso pa Aisalaeli.

⁵² Ni ligongo lyakwe cilambo cingwapa Aisalaeli timciwonele kwanawula, nambo ngamja kwinjila.”