Detulonomo 31 - Chiyawo Bible

Akumsagula Yoswa kuti ajinjile m'malo mwa Mose

¹ Mose* ŵapitilisye kuŵeceta ni Aisalaeli ŵala kuti,

² “Sambano une ngwanile yaka 120 yakupagwa, nganingola macili sambano gakuŵa jwakulongolela jwenu. Soni ngani jine jakupwatika pelepa ni jakuti, AMBUJE* asalile une kuti ngajomboka Lusulo lwa Yolodani.

³ Msyene AMBUJE, Mlungu jwenu, ni jutacimlongolela, ni kusijonaga ngosyo sine syosope syasikutama mcilambo cimkwawulaco kuti mkatame, Yoswa ni jutaŵe jwakulongolela jwenu, mpela muŵaŵecetele AMBUJE.

⁴ AMBUJE tacajonanga ŵandu ŵelewo, mpela muŵamjonanjile Sihoni ni Ogi, acayimwene wa Aamoli, pamo ni cilambo cawo.

⁵ AMBUJE takampundisye pa ngondo, nambo mkakumbucile yinamsalile yila kuti, naga mkuja kusumula msinda, mkawulaje ŵandu wosope ŵakutama wele msindawo mwangatendela canasa.

⁶ Mŵe ŵamacili soni ŵakulimba mtima. Mkajogopa ŵandu ŵelewo, ligongo AMBUJE Mlungu jwenu, takaŵe msyene ni jemanja. Ngaja mkunda kuti mkalepele kuputa ngondo, soni ngisamleka jikape.”

⁷ Mose ŵamŵilasile Yoswa pameso pa Aisalaeli wosope ni ŵamsalile kuti, “Mŵe ŵamacili ni mlimbe mtima. M'mwejo ni ŵatimwalongolele ŵandu ŵeleŵa ku cilambo cele AMBUJE ŵatesile cilanga* kwa acinangolo ŵenu. M'mwejo ni ŵatimkatamice ŵanduŵa mwele mcilambomo.

⁸ Takamlongolele asyene AMBUJE, soni takaŵe ni jemanja. Ngaja kunda kuti mkalepele kuputa ngondo, soni ngasamleka jikajikape. Myoyo mkatenda woga kapena kwasa mtima.”

Kuŵalanga malamusi caka ca msano ni yiŵili yiliyose

⁹ Mose ŵalembile Malamusi ga Mlungu ni ŵagapelece kwa ŵakutaga mbopesi ŵa ci Lefi, ŵele ŵaŵanyakulaga Libokosi lya Cilanga ca Mlungu, soni ni kwa acakulungwakulungwa wosope ŵa Aisalaeli.

¹⁰ Ŵalamwile ŵakutaga mbopesi ŵa ci Lefi ni acakulungwakulungwa ŵa Isalaeli ŵala kuti, “Kumbesi kwa caka ca msano ni yiŵili* yili yose, caka cele cili cakwakululucila ŵandu ŵele ŵiŵakongwele mbiya kapena cindu cilicose, timŵalanje malamusi gelega pa lisiku lya cindimba camasakasa.

¹¹ Timgaŵalanje gele malamusigo kwa Aisalaeli wosope, ndaŵi jitaciyika kukwalambila AMBUJE kumalo gatacisagula AMBUJEWO.

¹² Timwaŵilanje acalume wosope, acakongwe, ŵanace ni acalendo ŵakutama m'misinda jenu, kuti jwalijose talipikanile jika malamusigo, soni kuti talijiganye kwajogopa AMBUJE Mlungu jwenu, ni kugapikanila maloŵe gakwe mwakulupicika.

¹³ Pakutenda myoyo, yisukulu yenu yamkiniyipikaneje Malamusi ga AMBUJE citandilile, tacikola upile wakugapikana malamusi gelega lyele lisikuli. Soni tiyicilijiganya kwajogopa AMBUJE masiku gosope gitacitama, mcilambo cimkuja kutama pesi pa Lusulo lwa Yolodani.”

AMBUJE akumpa Mose maloŵe gambesi

¹⁴ AMBUJE ŵamsalile Mose kuti, “Ndaŵi ja umi wenu jisigele panandi kumala. Mumŵilanje Yoswa, myice najo ku citenti cakusimanilana, kuti nampe jwalakwejo msyungu.” Myoyo Mose pamo ni Yoswa ŵajawile ku citenti cakusimanilana kula,

¹⁵ ni AMBUJE ŵawonecele jemanja jila mcipilala ca liwunde cicajimi pa mlango wa citenti.

¹⁶ AMBUJE ŵamsalile Mose kuti, “M'mwejo msigele panandi kuwa. Patimtyoce m'mwejo, Aisalaeli ŵa takajinjile mcilambo cele cakulambila milungu jine ja cilendo, jemanjaji takatande kujilambila milungu jeleji, takakase cilanga citwalangene ni une.

¹⁷ Naga akuja kutenda yeleyo, tingatumbilile ni kwaleka jika, soni takajonasice. Tigakagwile malweso ni yisawusyo yakogoya, ni takamanyilile kuti yindu yakogoyayo yagwilile ligongo une, AMBUJE Mlungu jwawo nalesile jemanjajo jika.

¹⁸ Une tinjikana kwakamucisya, ligongo lya yakulemwa yawo yatesile, pakujilambila milungu jine ja cilendo.

¹⁹ “Sambano tinampe maloŵe ga nyimbo ja sambano. Mgalembe, ni mwajiganye Aisalaeli nyimbo jeleji. Naga akujimanyilila kwimba jele nyimboji, taciŵa ŵandu ŵakumanyilila yindu yingusaka kuti jemanjajo ayitende, myoyo jemanjaji ngisinalecelela ulemwa* wawo, naga akuja kuŵa ŵandu ŵangambikanila uneji.

²⁰ Tingajinjisye mcilambo cacajila, mpela munatendele cilanga ni acinangolo ŵawo. Kweleko takayisimane yakulya ya mtundu uliwose yitakayisace, soni takatame mwakondwa.

²¹ Ndaŵi jitingapelece cilango ca malweso ni yisawusyo yekulungwa kwa Aisalaeli pamo ni yisukulu yawo, tinjakumbusya kuti akugamanyilila maloŵe gosope ga nyimbo jeleji, ni kuti nginakola ligongo lililyose lyakuŵa ŵandu ŵangambikanila uneji. Tingajinjisye mcilambo cinaŵisile cilanga, nambo une ngumanyilila cile ndamo jitakajile pakutama mcilambomo.”

²² Myoyo Mose ŵagalembile maloŵe ga nyimbo lisiku lilyolyo, ni ŵajiganyisye Aisalaeli.

²³ AMBUJE ŵamsalile Yoswa mwanace jwa Nuni kuti, “Mŵe mundu jwamacili soni jwakulimba mtima. Une tinamkamucisye m'mwejo kuti mwalongolele Aisalaeli kuja kwinjila mcilambo cinaŵisile cilanga kuti takatame jemanjajo, ni une tinjiŵa ni m'mwejo.”

²⁴ Mose ŵalembile Malamusi ga Mlungu m'buku, ŵalolecesye kuti pakulembapo nginaleka liloŵe lililyose.

²⁵ Piŵamasile kulemba, ŵasalile ŵakutaga mbopesi ŵa ci Lefi, ŵiŵanyakulaga Libokosi lya Cilanga ca AMBUJE kuti,

²⁶ “Mjigale buku aji ja Malamusi ga Mlungu, ni mkajiŵice mungulugulu Libokosi lya Cilanga ca AMBUJE Mlungu jwenu. Buku jeleji jili umboni wakuti jemanja mkuyimanyilila yosope yakusaka AMBUJE kuti myitende.

²⁷ Ngumanyilila kuti mli ŵandu ŵamakani soni ŵakwimucila. Naga mkupakombola kwajimucila AMBUJE Mlungu jwenu, uneji ndili ciŵela umi, nambi tiyiciŵa uli patinjiwa une, ni timcipunda kwajimucila AMBUJEWO mnope?

²⁸ Mwasonganye ŵakulongolela ni acakulungwakulungwa ŵa ngosyo sya Isalaeli, kuti naŵalanjile maloŵe gali m'buku jeleji. Nipo kwinani ni cilambo capasi tiyicitendela umboni kuti jemanja mkuyimanyilila yosope yakuti mtendeje.

²⁹ Ngumanyilila kuti patinjiwa une, ŵandu wosope taciŵa ŵandu ŵakusakala, ni taciyikana yosope yisasileyi. Nambo panyuma pakwe taciyiwona yisawusyo yekulungwa, AMBUJE tacitumbila ligongo lyakutenda yindu yakusakala yele yakuyikana jwalakwejo.”

Nyimbo ja Mose

³⁰ Myoyo Mose ŵagaŵalasile maloŵe ga nyimbo josopeji, kutandila pandanda mpakana pambesi, Aisalaeli wosope ali mkupikana.