Detulonomo 30 - Chiyawo Bible

Mlungu tacipeleka upile kwa ŵandu naga tapesye ulemwa

¹ “Ndaŵi jitijicimyicila upile ni malweso ginakolasile gala, timkakumbucile yeleyi mli pasikati pa ngosyo sine ku yilambo yakutalicila, kwele AMBUJE* Mlungu jwenu kutakam'balalicisye.

² Patimkakumbucile kweleko kuti AMBUJEWO ampele cilango, mkawujile kwa AMBUJE Mlungu jwenu ni kutanda soni kugapikanila malamusi gosope gangumpa lelo jinoga ni mtima wenu wosope ni umi wenu wosope.

³ AMBUJE Mlungu jwenu tacimtendela canasa. Tacimwusya kutyocela ku yilambo ya ngosyo sine kuŵambalalisye, ni timciŵa soni ŵandu ŵakusicila.

⁴ Atamose AMBUJEWO ali am'balalisye kumbesi kwa cilambo, tacimsonganya malo gamo ni kumwusya kumangwenu.

⁵ Tacimlongolela kucilambo ciŵatamaga kala acinangolo ŵenu, ni timciŵa soni ŵandu ŵajinji, ŵakusicila ni macili ga kupunda muŵaŵelele acinangolo ŵenu.

⁶ AMBUJE Mlungu jwenu tacimpa jemanja ni yisukulu yenu mtima wakupikanila, kwakuti timciŵa mkwanonyela ni mtima wenu wosope, ni umi wenu wosope. Myoyo timkatame ni umi mcilambo celeco.

⁷ AMBUJE Mlungu jwenu tacigagwicisya malweso gosope gala pa amagongo ŵenu ŵaliji kumsawusya ŵala.

⁸ Jemanja timcigapikanila soni ni kugakuya cenene malamusi gangumpa lelo jinoga.

⁹ AMBUJE tacimpa upile wakuŵa ŵandu ŵakusicila, timcikola ŵanace ni yilangwa yejinji, timcigowola yakulya yejinji m'migunda jenu. Taciŵa ŵakondwa ni kumsicilisya jemanja, mpela muŵatendele ni acinangolo ŵenu ndaŵi jiŵaliji kwapikanila AMBUJE.

¹⁰ Nambotu mkaŵe ŵandu ŵakwapikanila AMBUJE, ni kugasunga malamusi ni majiganyo gawo gosope galembedwe m'buku ajino ja malamusi. Myoyo mgalawucile kwa AMBUJE ni kwalambila ni mtima wenu wosope ni umi wenu wosope.

¹¹ “Lilamusi lingumpa lelo jinoli nganiliŵa lyakusawusya kulipikanicisya soni nganiliŵa lyakunonopa.

¹² Nganiliŵa kwinani, kuti timlajileje kuwusya kuti, ‘Ana ŵani ŵatajawule kwinani kukutujigalila lilamusi kuti tulipikane?’

¹³ Soni nganiliŵa pesi nyasa, kuti timwusye kuti, ‘Ana ŵani ŵitajomboce nyasa kukutujigalila lilamusi kuti tulipikane.’

¹⁴ Lilamusilyo mli nalyo panopano. Mkulimanyilila, soni mkusalikolanga, myoyo mkwenela kulipikanila.

¹⁵ “Ngumpa lipesa lelo lyakuti msagule, pasikati pa yindu yambone kapena yakusakala, pasikati pa ciwa ni umi.

¹⁶ Naga mkugakuya malamusi ni majiganyo gangumpa lelo jinoga, soni naga mkwanonyela ni kugapikanila maloŵe gosope ga AMBUJE Mlungu jwenu, timciŵa ŵandu ŵakusicila. Soni timciŵa ŵandu ŵa lukosyo lwa ŵandu ŵajinji. AMBUJE Mlungu jwenu takampe upile mcilambo cimkuja kutamaco.

¹⁷ Nambo naga mkuja kukana kwapikanila AMBUJE, ni kuja kutanda kujilambila ni kujitumicila milungu jine,

¹⁸ ngumkalamusya cilepe lelo jino kuti timkajonasice. Ngimja kutama ndaŵi jelewu mcilambo cili pesi Lusulo lwa Yolodani, cimsigele panandi pasyesyene kuja kwinjila kuti mkatame.

¹⁹ Sambano ngumpa lipesa lyakuti msagule pasikati pa umi ni ciwa, soni pasikati pa upile wa Mlungu ni malweso ga Mlungu. Yindu yosope yakwinani ni yapacilambo ca pasi yitendele umboni maloŵe ganamsalile lelo jinoga, ginampele lipesa lyakusagula mbali jimkusosa. Myoyo ngumsalila kuti sagulani umi,

²⁰ mwanonyele AMBUJE Mlungu jwenu, mwapikanileje, ni kuŵa ŵandu ŵakulupicika kwa jwalakwe, kuti jemanja pamo ni yisukulu yenu mkatamilicice ndaŵi jelewu mcilambo ciŵatesile cilanga* AMBUJEWO kuti tacicipeleka kwa acinangolo ŵenu, Abulahamu,* Isaki ni Yakobo.”*