Detulonomo 29 - Chiyawo Bible

Cilanga ca AMBUJE cakwapa upile ŵandu ŵakupesya ulemwa syawo

¹ Aga ni maloŵe ga cilanga* ca AMBUJE* ciŵamlamwile Mose* kuti atende ni Aisalaeli mcilambo ca Mowabu. Maloŵe gelega galiji gakonjecesya pa maloŵe ga cilanga, gegala giŵapangene AMBUJE ni Aisalaeli Petumbi lya Sinayi.

² Mose ŵaŵilasile Aisalaeli wosope ni ŵasalile kuti, “Paja mwalolite mwacimsyene ni meso genu yiŵamtesile Mwenye jwa ku Iguputo AMBUJE, pamo ni nduna syakwe ni cilambo cakwe cosope.

³ Mwayiweni yisawusyo, yindu yakusimonjeka ni yindu yamacili yiŵayitesile AMBUJE mcilambo ca Iguputo.

⁴ Nambo mpakana lelo jino, AMBUJE nginampa mtima ŵakuyipikanicisya yindu yeleyi, kapena meso gakulolela yindu yeleyi, kapena mapikanilo gakupikanila yele yinduyi.

⁵ Yaka makumi mcece yiŵamlongolele AMBUJE mcipululu mula, yakuwala yenu nginiyimala, soni sapato syenu nginisipapuka.

⁶ Wamsoŵile mkate wakuti mlyeje, soni ŵamsoŵile finyo kapena ukana wakuti m'mweje, nambo AMBUJE ŵampele yindu yosope yiyamsoŵile, kuti m'manyilile kuti jwalakwe ni AMBUJE Mlungu jwenu.

⁷ Pitwayice pa malo agano, Sihoni mwenye jwa ku Heshiboni, pamo ni Ogi mwenye jwa ku Bashani, ŵayice kuti amenyane ni uweji, nambo uweji twapundile pa ngondo.

⁸ Twacisumwile cilambo cawo ni twacigaŵenye kwa ŵandu ŵa lukosyo lwa Lubeni ni Gadi, ni kwa ŵandu ŵa lukosyo lwa Manase ŵiŵaliji mbali ja kungopoko lyuŵa.

⁹ Mgapikanicisye maloŵe gosope gali m'cilanga celeci mwakulupicika, kuti masengo galigose gatimtendeje gamjendeleje cenene.

¹⁰ “Lelo jemanja mjimi wosope pameso pa AMBUJE Mlungu jwenu, kutandila acakulungwakulungwa wenu, nduna syenu,

¹¹ acakongwe ni ŵanace ŵakwe, soni acalendo ŵamkutama nawo ŵakusamkatila sasu ni kumtecela mesi.

¹² Mli apano lelo jino kuti mlumbile ni kutenda cilanga kwa AMBUJE Mlungu jwenu, kuti timsunje mbali jenu ja cilanga ca AMBUJE,

¹³ kuti pakutenda myoyo timciŵa ŵandu ŵakweŵakwepe ŵa AMBUJE, ni jwalakwe taciŵa Mlungu jwenu, mpela muŵatendele cilanga kwa jemanja. Ŵatesile cilanga celeci pandanda ni acinangolo ŵenu Abulahamu,* Isaki, ni Yakobo.*

¹⁴ Myoyo lelo jino AMBUJE akuwilisya kuŵika soni cilanga cicoco kwa jemanja.

¹⁵ Nambo nganiciŵa cilanga ca jemanjape, nambo soni mpakana yisukulu yenu.

¹⁶ “Pitwaliji mkutama ku Iguputo kula, mwaweni ŵandu ŵa ku Iguputo kula ali mkulambila milungu jawo jakusakala jakupanganyidwa ni yitela, maganga, silifa,* ni golidi.*

¹⁷ Pitwatandite ulendo wetu wakupita m'yilambo ya ngosyo sine, mwaweni soni ŵandu ŵa yilambo yineyo ali mkulambila milungu jawo jakunyalaya.

¹⁸ Myoyo mlolecesye kuti mundu jwalijose jwa lukosyo lwenu aŵe jwakulupicika kwa AMBUJE Mlungu jwenu. Akaja kutanda kujilambila milungu ja ŵandu ŵa ngosyo sine. Naga mundu jwine akuja kutanda kujilambila milungu ja cilendo takaŵe mpela mciga wacitela cakusogola yisogosi yakuŵaŵa.

¹⁹ Conde mkalamuce, kuti akapagwa mundu jwine jwalijose apano lelo, jwakugapikana gele maloŵega, nambo mu mtima mwakwe ali mganisya kuti, ticimjendelape cenene, atamose ali atesile makani ni kutenda yindu yiliyose yakusaka. Yeleyi ticigamba kumjigalila ŵandu wosopemwe yisawusyo, ŵandu ŵambone ni ŵakusakala wosope tacijonasika.

²⁰ AMBUJE ngisamkululucila mundu jwamti myoyo. M'malo mwakwe AMBUJEWO tacipya mtima nipo malweso galembedwe m'buku ajino tigacimgwila jwalakwejo, mpaka AMBUJE ali amwuleje jwalakwejo.

²¹ Aisalaeli wosope tacipata lijiganyo pa jwalakweju, pitacilola kuti mundu jwakulemwa jula apatile malweso, mpela mugalembedwele m'cilanga gali m'buku ajino ja majiganyo ga AMBUJE.

²² “AMBUJE tacipeleka yilwele ni yisawusyo mcilambo cenu, ni yisukulu yenu pamo ni acalendo ŵakutyocela ku yilambo yakutalicila tacilola kuti,

²³ migunda jenu jiŵele cipululu, jangali cajila, jegumbale njete ni sulufule,* soni tacilila kuti m'migundamo ngamukumela kandu kalikose, atamose manyasi. Cilambo cenuco ticiciŵa mpela mujaŵelele misinda jila ja Sodomu ni Gomola, soni mpela mujaŵelele misinda ja ku Adima ni Seboyimu, jele jiŵajijonasile AMBUJE ndaŵi jiŵapile mtima mnope kala.

²⁴ Ŵandu ŵa ngosyo sine taciwusya kuti, ‘Ana ligongo cici AMBUJE ŵacijonasile cilambo celeci? Ana ligongo cici ŵapile mtima mwakogoya camti myiyi?’

²⁵ Kwanga kwakwe kwa yiwusyo yeleyi tikuciŵa kuti, ‘Ligongo ŵandu ŵeleŵa ŵakasile cilanga ciŵapangene ni AMBUJE Mlungu jwa acinangolo ŵawo, ndaŵi jele AMBUJEWO ŵakopwesye jemanjajo ku Iguputo.

²⁶ Ŵandu ŵeleŵa ŵatandite kujitumicila milungu jine, jimkinajilambileje citandilile kalakose, milungu jele AMBUJEWO ŵalekasisye ŵele ŵanduŵa kuti akajilambila.

²⁷ Myoyo AMBUJE ŵatumbilile ŵandu ŵakweŵa mnope, ni ŵapelecele malweso gosope galembedwe m'buku ajino.

²⁸ AMBUJE ŵatumbilile ŵandu ŵakwewo mnope, ni ali citumbilile myoyo, ŵatyosisye ŵanduwo mcilambo cawo ni ŵaponyisye mcilambo ca cilendo, kwele kwakutama mpakana lelo jino.’

²⁹ “Nambotu pana yindu yine yimkanatujuwulila AMBUJE Mlungu jwetu, nambo atujuwulile malamusi gawo, myoyo uweji ni yisukulu yetu tukwenela kugapikanila gele malamusiga kwa yaka yosope.