Detulonomo 27 - Chiyawo Bible

Malamusi gakulembedwa pa maganga

¹ Panyuma pakwe Mose* ali ajimi pamo ni acakulungwakulungwa ŵa Aisalaeli, ŵasalile ŵandu kuti, “Conde, mgasunje malamusi gangumpa lelo jinoga.

² Pa lisiku litimcijomboka Lusulo lwa Yolodani ni kwinjila mcilambo citakampe AMBUJE* Mlungu jwenu, mkajimice maganga gamakulungwa ni mkagasyasyajile.

³ Mli mtesile myoyo, mkalembe maloŵe gosope ga malamusi gelega, mli mjinjile mcilambo cambone cana cajila, cele AMBUJE, Mlungu jwa acinangolo ŵenu ŵatesile cilanga* kuti tacimpa.

⁴ Patimkamale komboka Lusulo lwa Yolodani, mkagajigale maganga gelega mpaka Petumbi lya Eba, mpela munamlamulile lelo jino, ni mkagasyasyajile.

⁵ Kweleko mkataŵe malo gakupelecela mbopesi ga AMBUJE Mlungu jwenu, mkagataŵe malogo ni maganga gangasepedwa ni cisyano ca mtundu uliwose,

⁶ ligongo malo gakupelecela mbopesi galigose, gamkwatajila AMBUJE Mlungu jwenu gakwenela kutaŵidwa ni maganga gangakata ni cisyano. Mkapeleceje mbopesi syakutinisya kwa AMBUJE Mlungu jwenu, pa malo gelego.

⁷ Soni mkawulajeje ni kulya mbopesi sya mkamulano kumalo gagogo, ni kutama ŵandu ŵakusengwa pameso pa AMBUJE Mlungu jwenu.

⁸ Mkalembe maloŵe gosope ga malamusi gelega mwa kuwoneka cenene pa magangago.”

⁹ Pelepo Mose ni ŵakutaga mbopesi ŵa ci Lefi ŵasalile ŵandu ŵosope ŵa ku Isalaeli kuti, “Pikanani ŵandu ŵa ku Isalaeli, ni mumbikanicisye. Lelo mŵele ŵandu ŵa AMBUJE Mlungu jwenu.

¹⁰ Myoyo mwapikanileje AMBUJE, ni kugasunga malamusi gawo gosope, gangumpa jemanja lelo jinoga.”

Mlungu akasiŵalwesa ŵandu ŵangampikanila

¹¹ Lisiku lilyolyo Mose ŵasalile Aisalaeli kuti,

¹² “Pitimkajomboce Yolodani ŵandu ŵa ngosyo asi: Simiyoni, Lefi, Yuda, Isakala, Yosefe, ni Benjamini akajime Petumbi lya Gelisimu, ndaŵi jakusala maloŵe gakwapa upile Aisalaeli.

¹³ Nambo ŵandu ŵa ngosyo asi, Lubeni, Gadi, Asha, Sebuloni, Dani ni Nafutali akajime Petumbi lya Eba, ndaŵi jakusala maloŵe gakwalwesa ŵandu ŵa ku Isalaeli.

¹⁴ Alefi tacisala aga maloŵega mwakwesya maloŵe:

¹⁵ “ ‘Alwesece mundu jwalijose jwakupanganya mlungu jwakusepa kapena jwagumba, ni kujilambilaga pacisyepela, mwakusisa. AMBUJE akusaŵengana ni milungu jakupanganya amisili ni yala yawo.’ “Nipo ŵandu wosope tacijanga kuti, ‘Elo, yiŵe myoyo!’

¹⁶ “ ‘Alwesece mundu jwalijose jwangacimbicisya babagwe kapena mamagwe.’ “Nipo ŵandu wosope tacijanga kuti, ‘Elo, yiŵe myoyo.’

¹⁷ “ ‘Alwesece mundu jwalijose jwakusejesya malile ga mlongo mjakwe.’ “Nipo ŵandu wosope tacijanga kuti, ‘Elo, yiŵe myoyo!’

¹⁸ “ ‘Alwesece mundu jwalijose jwakumsokonesya litala mundu jwangalola.’ “Nipo ŵandu ŵosope tacijanga kuti, ‘Elo, yiŵe myoyo!’

¹⁹ “ ‘Alwesece mundu jwalijose jwakulamula mwakusokonesya magambo ga mlendo, ga mwanace jwamasije, ni ga jwamkongwe jwamasije.’ “Nipo ŵandu wosope tacijanga kuti, ‘Elo, yiŵe myoyo!’

²⁰ “ ‘Alwesece mundu jwalijose jwakwatesya soni babagwe pakugona nawo ŵamkwawo babagwewo.’ “Nipo ŵandu wosope tacijanga kuti, ‘Elo, yiŵe myoyo!’

²¹ “ ‘Alwesece mundu jwalijose jwagona ni cinyama.’ “Nipo ŵandu wosope tacijanga kuti, ‘Elo, yiŵe myoyo!’

²² “ ‘Alwesece mundu jwalijose jwagona ni alumbugwe ŵakupagwa nawo citumbo cimo, atamose alumbugwe ŵa citumbo cine.’ “Nipo ŵandu wosope tacijanga kuti, ‘Elo, yiŵe myoyo!’

²³ “ ‘Alwesece mundu jwalijose jwagona ni akwegwegwe.’ “Nipo ŵandu wosope tacijanga kuti, ‘Elo, yiŵe myoyo!’

²⁴ “ ‘Alwesece mundu jwalijose jwakumwulaga mjakwe pacisyepela.’ “Nipo ŵandu wosope tacijanga kuti, ‘Elo, yiŵe myoyo!’

²⁵ “ ‘Alwesece mundu jwalijose jwakupocela yipupu kuti amwulaje mjakwe jwangalemwa.’ “Nipo ŵandu wosope tacijanga kuti, ‘Elo, yiŵe myoyo!’

²⁶ “ ‘Alwesece mundu jwalijose jwakukana kugajiticisya ni kugapikanila malamusi ni majiganyo gosope ga AMBUJE.’ “Nipo ŵandu wosope tacijanga kuti, ‘Elo, yiŵe myoyo!’