Detulonomo 25 - Chiyawo Bible

¹ “Mwine Aisalaeli ŵaŵili taciŵa ali akanganile. Ni akwawula kunganya ja magambo, kweleko ŵakulamula magambo akulamula kuti jumo nginalemwa nambo jwalemwisye ni mjakwejo.

² Naga cilango cakumpa mundu jwakulemwajo cili kukwapulidwa ni cikoti, jwakulamula magambogo amlamule jwakulemwajo kuti agone pasi ni akwapulidwe mwakulandana ni kulemwa kwakwe.

³ Mundu jwakulemwa akukomboleka kukwapulidwa mpaka yikoti makumi mcece, nambo ngapelenganya pelepo. Naga akupelenganya pelepo tamtesye soni jwalakwejo.

⁴ “Mkajitaŵa kukamwa ng'ombe jajikukamula masengo gakukosola tiligu.

Yakwenela kutenda ali awile mundu jwa pawulongo

⁵ “Naga ŵandu ŵa paulongo akutama pa malo gamo, ni jumo akuwa, nambo nginaleka mwanace jwamlume jwakwinjila lina lyakwe, jwamkongwe jwa masijejo akusalombedwa ni mundu jwa mwiŵasa line. Gali masengo ga mlongo mjakwe jwa malemujo kulombela jwele jwamkongwejo.

⁶ Mwanace jwamlume jwandanda kupagwa mwele m'nyumbamo, tacijinjila lina lya malemu ŵala, kuti mu lina lya liŵasa lyakwe likawa mcilambo ca Isalaeli.

⁷ Nambo naga mlongo mjawo malemu ŵala akukana kulombela jwamkongwe jwamasijejo, jwamkongwejo akwenela kuja kudandawula kwa acakulungwakulungwa ŵa mu msindawo kuti, ‘Mlongo mjawo malemu ŵamkwangu akukana kulombela une, kuti lina lya malemuwo likawa mcilambo ca Isalaeli.’

⁸ Myoyo acakulungwakulungwawo, amŵilanje mlongo mjawo malemu ŵala, kuti alinje kuŵeceta najo, naga akulimbicila nditu kukana kulombela,

⁹ jwamkongwe jwamasijejo ajawule kwa mlambagwejo, acakulungwakulungwa ŵa mu msindawo ali mkulola, ni mwule sapato ja lusajo lumo, soni amsunile mata kumeso ni asale kuti, ‘Yindesileyi ni yakumjenela kumtenda mundu jwakukana kwaŵelecela mwanace alongo ajakwe ŵawile.’

¹⁰ Myoyo liŵasa lya jwamlume jwakanile kulombela alambagwewo kuti, ‘liŵasa lya mundu juŵamwusile sapato ja lusajo lumo.’

Malamusi gane

¹¹ “Naga acalume ŵaŵili ali mkumenyana ni jwamkongwe jwa jwamlume jumo, pakusaka kwakulupusya ŵamkwakwe, akumkamula mundu jwakumenyana ni ŵamkwakwewo ku yikolelo,

¹² mkamtendela canasa jwamkongwejo, mumkate ligasa lyakwe.

^13-14 “Mkasimwajiŵila ŵandu pakola yakulinjila usito kapena winji ŵa yindu ya mitundu jiŵili, cakulinjila cimo cakuti mpate yindu yejinji ndaŵi jimkwasuma ŵandu malonda gawo, ni cakulinjila cine cakuti mwape yindu ya mnono ŵandu, ndaŵi jimkwasumisya malonda genu.

¹⁵ Mkamulisye masengo yakulinjila usito kapena winji wa yindu yakuwona, kuti mkatame ni umi ndaŵi jelewu mcilambo citakampe AMBUJE* Mlungu jwenu.

¹⁶ AMBUJE akusaŵengana ni ŵandu ŵakwajiŵila ŵandu mwalitala lya mtundu welewu.

Lilamusi lyakwawulaga ŵandu ŵa lukosyo lwa Aamaleki

¹⁷ “Mkaliŵalila yeyila yiŵamtesile jemanja ŵandu ŵa lukosyo lwa Aamaleki, ndaŵi jimwatyocelaga ku Iguputo kula.

¹⁸ Jemanjajo nginakola woga ni Mlungu, myoyo ŵamkuyiye munyuma ni ŵamenyene ngondo ni jemanja mli mpesile mnope, ni ŵawuleje acalongo acimjenu wosope ŵaŵasigalile munyuma ligongo lyakupela.

¹⁹ Myoyo pitacimpa AMBUJE Mlungu jwenu cilambo, ni kumkulupusya m'magasa mwa amagongo ŵenu ŵakutama mwakusyungulila cilambo cenu, mkalolecesye kuti mkawulaje Amaleki wosope, kuti mundu jwalijose akaja kwakumbucila ŵandu ŵa lukosyo lwa Aamaleki amta panandi. Conde, mkaja kuliŵalila kuyitenda yindu yeleyi.