Detulonomo 24 - Chiyawo Bible

Kumasya ulombela ni kulombela soni

¹ “Mwine mwakwe mundu akulombela jwamkongwe, ni panyuma pakwe akusala kuti ngakumsaka jwamkongwejo, ligongo lyakuti ngakuyinonyela yitendo yakwe. Alembe cikalata cakumasya ulombela, ni ampe jwamkongwejo pa yala, ni amtyosye pa mlango pakwe.

² Naga jwamkongwejo akulombedwa ni jwamlume jwine,

³ ni panyuma pakwe jwamlume jwinejo akusala soni kuti ngakumsaka, akukomboleka nombe najo ampe cikalata cakumasya ulombelawo ni kumpa jwamkongwejo pa yala. Jwamkongwejo ali atyosile pa mlangopo, kapena jwamlume jwaŵili jula ali awile,

⁴ jwamlume jwandanda jula akalombela soni jwamkongwe jweleju, amtende jwamkongwe jweleju kuti ali jwamsakale, ligongo lyakulombela jwamlume jwaŵili. Mkaja kutenda ulemwa* wekulungwa camti myiyi mcilambo cakuja kumpa AMBUJE* Mlungu jwenu.

Malamusi gane gakulekanganalekangana

⁵ “Naga jwamlume ali alombele jwamkongwe ni nginamala kutama najo pa ulombela caka cimo, akasajinjila masengo ga usilikali, kapena kutyoka kuja kukamula masengo kwakutalika. Kuti apakombole kutama ku musi ni kwasangalasya ŵamkwawo ŵalombelewo.

⁶ “Ndaŵi jimkumkongosya mundu cindu, mkamsumula lisyago lyakwe lyakusyajila tiligu kuti liŵe pinyolo. Kumsumula mundu lyeleli, kuli kumtyocesya cindu cakumkamucisya kusyajila utandi wakolocesya yakulya mwiŵasa mwakwe kuti aŵe ni umi.

⁷ “Jwalijose jwakumjiŵa mu Isalaeli mjakwe ni kusunga mpela kapolo, kapena akumsumisya, akwenela kuwulajidwa. Pakutenda myoyo timcityosya cakusakala ca mtundu welewo pasikati penu.

⁸ “Naga mkulwala ulwele wawukulungwa wapepende, mlolecesye kuti yosope yitamsalile ŵakutaga mbopesi ŵa ci Lefi myitende. Mgakuye malamusi gosope ginapele jemanjajo.

⁹ Mkumbucile yiŵamtesile Miliyamu, AMBUJE Mlungu jwenu, ndaŵi jimwatyocelaga ku Iguputo kala.

¹⁰ “Naga mkumkongosya mundu kandu, mkajinjila m'nyumba jakwe kuja kujigala jika cakuwala cakwe cakusosa kumpa kuti ciŵe pinyolo.

¹¹ M'mwejo mjembeceye pasa, kuti msyene cakuwalaco apelece msyene.

¹² Naga mundujo ali jwakulaga, cakuwala capinyoloco cikagona kumangwenu.

¹³ Mciwucisye kwa msyene, lyuŵa mkanilikapile, kuti jwalakwejo cilo aliwunicile. Jwalakwejo tacimtogolela, soni AMBUJE Mlungu jwenu taciŵa ŵakusengwa ni m'mwejo.

¹⁴ “Mkasimumnyenga kapena kumlila jwamasengo jwenu jwakulaga, ni jwa usawuci malipilo gakwe, atamose aŵe mlongo mjenu kapena mlendo jwakutama mu msinda wa mcilambo cenu, conde mkasimumlila.

¹⁵ Lisiku lililyose, lyuŵa mkinilikapile, mumlipileje jwamasengojo malipilo gakwe ga lyele lisikulyo. Mbiyasyo akusisosa jwalakwejo soni akusiŵalanjila mbiya sisyosyo. Naga ngamkumlipila tacimlilila m'mwejo kwa AMBUJE, ni timcikola ulemwa.

¹⁶ “Acinangolo akusawulajidwa ligongo lyakulemwa kwa ŵanace ŵawo. Myoyo peyo ŵanace akawulajidwa ligongo lyakulemwa kwa acinangolo ŵawo. Mundu jwalijose akwenela kuwulajidwa ligongo lya yakulemwa yakwe msyene.

¹⁷ “Acalendo kapena ŵanace ŵamasije mkasimwasumula yindu yakuŵajilwa kupocela, pakugasyopotosya melepe magambo gawo. Soni mkamsumula jwamkongwe jwamasije cakuwala cakwe kuti ciŵe pinyolo jangongole.

¹⁸ Mkumbucile kuti mwaliji acikapolo ku Iguputo, soni kuti AMBUJE Mlungu jwenu ŵamkulupwisye kweleko. Ni ligongo lyakwe nampele jemanja ali lilamusili.

¹⁹ “Ndaŵi jimkugowola mbeju m'migunda mwenu, ni ndaŵi jimkututa mbejusyo ni mkuliliŵalila liwunjili line lyangatuta, conde mkawujilila kuja kututa liwunjili lya mbeju syakuliŵalikasyo. Mwalecele acalendo, ŵanace ŵamasije, ni acakongwe ŵamasije,* kuti AMBUJE Mlungu jwenu ampe upile pa yitendo yenu yosope.

²⁰ Mli m'masile kugowola olifi* kandanda, mkawujila soni kuja gowola olifi jwakusigala m'yitelayo. Yeleyo mwalecele acalendo, ŵanace ŵamasije ni acakongwe ŵamasije.

²¹ Mli m'masile kaŵa yisogosi ya mipeleya pa citela cilicose kamo, mkawujila soni kaŵili kuja kaŵa yisogosiyo. Yisogosi yakusigala ya mipeleyayo mwalecele acalendo, ŵanace ŵa masije, ni acakongwe ŵamasije.

²² Mkumbucileje kuti mwaliji acikapolo mcilambo ca Iguputo. Ni ligongo lyakwe nampele jemanja ali lilamusili.