Detulonomo 23 - Chiyawo Bible

Ŵakwenela kwatyosya pa msongano wa AMBUJE

¹ “Jwamlume jwalijose jwamtyosisye yikolelo yakwe, kapena jwele jwamkatile ciŵalo cakwe cacilume, akasajinjila mu msongano wa ŵandu ŵa AMBUJE.*

² “Mwanace jwapetinji, atamose yisukulu yakopoka mwa jwalakwe, mpakana yisukulu ya mpago walikumi, akasajinjila mu msongano wa ŵandu ŵawo AMBUJE.

³ “Mundu jwa lukosyo lwa Aamoni kapena lwa Amowabu, atamose yisukulu yawo yosope ya kupagwa mu syele ngosyosi, kwika mpaka yisukulu yawo ya mpago wa likumi, akakundidwa kwinjila mu msongano ŵa ŵandu ŵa AMBUJE.

⁴ Ligongo ŵandu ŵeleŵa ŵamjimile yakulya ni mesi, pa ndaŵi ja ulendo wenu ŵakutyocela ku Iguputo ula. Soni jemanjaji ŵamlembile masengo Balamu, mwanace jwa Bewoli, jwa m'musi wa Petoli ku cilambo ca Mesopotamiya, kuti amlwese jemanja.

⁵ Nambo AMBUJE Mlungu jwenu, nginampikanila Balamujo. Malweso gakwego AMBUJE ŵagapitikwisye kuŵa upile, ligongo lyakuti akumnonyela jemanja.

⁶ Mkasimtenda kandu kalikose kakwakamucisya ŵandu ŵa ngosyo syelesi, kwakuti ŵandu ŵeleŵa apate mtendele kapena umbone.

⁷ “Mkanyosya ŵandu ŵa lukosyo lwa Edomu. Jemanja jila acalongo acimjenu. Soni mkanyosya ŵandu ŵa ku Iguputo, pakuŵa mwatemi mcilambo cawo kala.

⁸ Yisukulu ya ngosyo syelesi, kutandila yisukulu ya mpago watatu kujaga msogolo, akukomboleka kwinjila mu msongano wa ŵandu ŵa AMBUJE.

Kusamalila kwa masakasa gakutama pa ndaŵi ja ngondo

⁹ “Ndaŵi jimkwawula kuja kuputa ngondo ni amagongo ŵenu, mkalolecesye kuti pamkutama m'masakasa genu ngamkutenda yindu yakusakala, yangakamulana ni Malamusi ga AMBUJE.

¹⁰ Mwacisyasyo, naga jwamlume jwalijose pasikati penu alisakesye ligongo lyakuti asagamile cilo, akopoce ni kuja kutama kusa kwa masakasago.

¹¹ Ligulo ajoje, ni pakapila lyuŵa awujile ku masakasa kula.

¹² “Mkakolosye malo kusa kwa masakasago, gakuti mkajawuleje kuja kulikamucisya.

¹³ Mjigaleje cida cakusolela, kuti mkasoleleje lisimbo lyakuti mlikamucisye, mli m'masile msilile yakusakala yili mwisimbomo.

¹⁴ Masakasa genu gaŵe malo gakusamalicikwa cenene, ga casa ligongo AMBUJE Mlungu jwenu ali pasikati penu kuti amcenjele, ni kumkamucisya kuti mwapunde amagongo ŵenu pa ngondo. Myoyo masakasa genu gaŵeje malo ga casa, kuti AMBUJE akasamlola jemanja mli mkutenda kandu kalikose kali kakusakala ni mkaŵa AMBUJEWO kuwujilila ni kumleka jikajikape.

Malamusi gakulekanganalekangana

¹⁵ “Naga kapolo ali atisile kwa ambujegwe ŵa cilambo cine, kutilila ku cilambo ca Isalaeli, kuti mumsunje, mkasimumwucisya kwa ambujegwe.

¹⁶ Akukomboleka kutama mu msinda uliwose utasace kutama, nambo mkamtamika mwa ngalwe.

¹⁷ “Pasikati pa Aisalaeli pakasimanikwa mundu jwamlume kapena jwamkongwe jwali lihule ku nyumba ja milungu ja cilendo.

¹⁸ Mbiya syakupata mwa litala lyakutenda uhulesyo, akayika nasyo ku Nyumba ja AMBUJE Mlungu jwenu, kuti mundujo akwanilisye cilanga* cakwe. Pakuŵa yindu ya mtundu welewo akusaŵengana nayo AMBUJE Mlungu jwenu.

¹⁹ “Naga mkumkongosya mlongo mjenu mbiya, kapena cakulya kapena kandu kane kalikose, mkasimumlamula kuti pa kuwusya ngongolejo apwatice cakonjecesya.

²⁰ Mkukomboleka kumlamula mundu jwa cilendo kuti apwatice cakonjecesya pakuwusya ngongole, nambo ngaŵa mu Isalaeli mjenu. Mlipikanicisye lilamusi lyeleli, ni AMBUJE Mlungu jwenu takayipe upile yindu yosope yitimkatende mcilambo cimkuja kutamaco.

²¹ “Naga mkutenda cilanga kwa AMBUJE Mlungu jwenu, mkaleka kuyitenda yimŵisile cilangayo. AMBUJE tacimcisya kuti myitende, soni kuli kulemwa kuleka kuyitenda yimtesile cilanga.

²² Ngaŵa kulemwa naga ngamkutenda cilanga kwa AMBUJE,

²³ nambo maloŵe gosope gakukopoka pakamwa penu, mlolecesyeje kuti mkugatenda.

²⁴ “Naga mli mkwenda mwitala, lyakupitila mu mgunda wa mipeleya wa mlongo mjenu jwakuŵandikana najo, mkukomboleka kulya yisogosi ya mipeleyayo mli mu mgunda pemo naga mli msacile. Nambo mkajigala yisogosi yine pakutyoka.

²⁵ Naga mli mkwenda mwitala lyakupitila mu mgunda wa tiligu wa mlongo mjenu jwakuŵandikana najo, mkukomboleka kubudula ni yala, ni kulya songolo sili m'masace mwakwe. Nambo mkacuŵa tiligujo ni cikwakwa, mu mgunda mwa mjenujo.