Detulonomo 21 - Chiyawo Bible

Ya jwakuwulajidwa mwangamanyika

¹ “Cilambo citakampe AMBUJE* Mlungu jwenu kuti cikaŵe cenucenupe, mwine mwakwe timkamsimane mundu jwam'we mu mgunda, nambo mwangamanyilila jwamwuleje.

² Acakulungwakulungwa ŵenu ni ŵakulamula magambo ajawule kumaloko, ni akalinje kutalikangana kwakwe kwa malo gali mundu jwakuwajo ni misinda jakuŵandikana ni gele malogo;

³ ni acakulungwakulungwa ŵa msinda uli ŵakuŵandikana mnope ni pele pawuli mtembopo, asagule ng'ombe jimkanijikamule masengo.

⁴ Ng'ombejo ajawule najo kwilambo kugali mesi gangajumilila, kumalo kumkanalimeje kapena kupanda mbeju jilijose. Kweleko akajiposokole lukosi ng'ombejo.

⁵ Ŵakutaga mbopesi ŵa ci Lefi ajawule nawo ku gele malogo, ligongo jemanjaji ni ŵali ŵakwenela kulamula magambo gosope ga ndewo ni kuwulagana. AMBUJE Mlungu jwenu ŵasagwile jemanjaji kuti aŵe ŵakutumicila ŵakwe ku malo gakwalambila ni kuti soni apeleceje upile kwa ŵandu mu lina lyakwe.

⁶ Myoyo acakulungwakulungwa ŵakutyocela mu msinda ŵakuŵandikana ni malo piwaliji mtembo ula, anaŵe m'myala pacanya pa ng'ombe jajiposokwele lukosi kwilambo kula.

⁷ Pakunaŵa m'myalamo asale aga maloŵega, ‘Nganituŵa uweji ŵatumwuleje aju munduju, soni nginitwawona ŵandu ŵamwuleje.

⁸ Ŵalakwe AMBUJE, mwakululucile ŵandu ŵenu Aisalaeli. Conde, mtukululucile soni mkaŵika ulemwa* petuwe, wakumwulaga mundu jwangalemwaju.’

⁹ Naga mkuja kutenda yakusaka AMBUJE, jwalakwejo ngisamjimba magambo gakuti jemanja mwuleje mundu jwangalemwa.

Acakongwe ŵakukamulwa ku ngondo

¹⁰ “Ndaŵi jilijose AMBUJE Mlungu jwenu akumkamucisya kupunda pa ngondo ni kwakamula acikapolo ŵajinji ku ngondoko,

¹¹ mwine pasikati pa acikapolowo komboleka kumwona jwamkongwe jwakusalala jwamumnonyele, ni mkusaka kumlomba jwalakwejo.

¹² Mjawule najo jwamkongwejo kumangwenu, kweleko akamyole umbo, ni kulengula ngalaŵesa syakwe,

¹³ akawule yakuwala yakumangwakwe, ni kutanda kuwala ya Aisalaeli. Atame m'musi mwenumo mwesi wamtundu ali mkulila malilo ga acinangolo ŵakwe, ali amasile kulila malilogo, mumlombe jwamkongwejo.

¹⁴ Panyuma pakwe mli mlolite kuti ngamkusaka soni jwamkongwejo, mumlece, ajawule kulikose kwakukusosa kwawula mwa mtendele. Ngakomboleka jwalakweju kumsunga soni mpela kapolo, kapena kumsumisya, ligongo ŵaliji ŵamkwenu.

Yakwenela kupocela mwanace jwamlume jwandanda kupagwa

¹⁵ “Mwine mundu akwete acakongwe ŵaŵili, jwine jwakumnonyela mnope ni jwine panandi, wosopeŵa ni akuŵeleka ŵanace ŵacalume, mwanace jwandanda kupagwa ni kuŵa jwa ŵakongwe ŵakunonyeledwa panandi ŵala.

¹⁶ Naga akusimicisya mundujo kwagaŵila ŵanace ŵakwewo, akusatenda lusagu pakumpa mwanace jwa ŵakongwe ŵakunonyeledwa mnope ŵala mbuwa jakwenela kumpa mwanace jwandanda kupagwa.

¹⁷ Mwanace jwandanda kupagwa jula akwenela kupocela yindu yejinji, atamose kuti ali mwanace jwakupagwa kwa ŵakongwe ŵakwanonyela panandi. Mundu akwenela kumjiticisya mwanace jwakwe jwandanda kupagwa, ni kumpa mbuwa jili jakwe ja cipanje, pakuya lilamusi.

Mwanace jwangapikana

¹⁸ “Mwine mundu akwete mwanace jwamlume jwakumlepela kumjamuka, soni jwa mwano, mwanace jwakakwapikanila babagwe ni mamagwe, atamose ampe cilango ca mtundu uli.

¹⁹ Acinangolo ŵa jwele mwanacejo amkamule ni kwawula najo kwa acakulungwakulungwa ŵa mu msindawo, ku cipata ca wele msindawo.

²⁰ Acinangolowo asale kwa acakulungwakulungwawo kuti, ‘Mwanace jwetuju tukumlepela kumjamuka soni jwamwano, ngakusosa kutupikana. Jwalakweju soni ali cidakwa cakumwa ukana.’

²¹ Papopo ŵandu ŵa mu msindawo amwulaje pakumsoma ni maganga. Pakutenda myoyo timcityosya cakusakala ca mtundu welewo pasikati penu. Ŵandu wosope ŵa mcilambo ca Isalaeli muno pitacipikana yayitendekweyo, tacikola woga.

Malamusi gakulekanganalekangana

²² “Naga mundu akuwulajidwa ligongo lya magambo, ni mtembo wakwe akuwukoleka pacitela,

²³ mtembowo ukagona pa citelapo. Awusice mwilembe lisiku lilyolyo. Malweso gakutyocela kwa Mlungu gakusayika pacilambo, ligongo lya mtembo wa mundu jwa magambo uwugonile uli cikolecele pa citela. Awusilile mtembowo, kogopela ni mkaŵa kucisakasya cilambo citakampe AMBUJE Mlungu jwenu.