Detulonomo 2 - Chiyawo Bible

¹ pambesi pakwe twawujile ni kuja ku cipululu pakupitila litala lya ku Nyasa Jecejewu,* mpela muŵatulamulile AMBUJE* Twatemi ndaŵi jelewu tuli mgamba kwendajenda, kusyungulila mcilambo ca matumbi ga Edomu.

² “Kaneko AMBUJE ŵasalile uneji

³ kuti mŵele mli mgamba kwendajenda akunakuku, kusyungulila cilambo ca matumbi kwa ndaŵi jajilewu, sambano galawukani ni kujigala litala lyakwinjilila mbali ja kumpoto.

⁴ Ŵasalile kuti namsalile soni jemanja kuti, ‘Msigele panandi kwinjila cilambo ca matumbi ga Edomu, cilambo cakutama acalongo acimjenu, yisukulu ya Esawu. Jemanjajo pitakamwone jemanja takamjogope,

⁵ conde, mkaja kwatanda, ligongo une nganja kucipeleka cilambo cawoco kwa jemanja. Nacipelece cilambo ca matumbi ga Edomu, mbali ja Seyili, kwa yisukulu ya Esawu.

⁶ Yakulya ni mesi gakumwa mkatende ga kusuma ni mbiya kwa jemanjajo.’

⁷ “Mkumbucileje kuti AMBUJE Mlungu jwenu ŵampele upile pa masengo genu gosope gimwatesile. Ŵaliji kumsamalila jemanja pa ulendo wenu wosope umjesile mcipululu mwamukulungwamu, kwa yaka 40. Soni ŵampele yindu yosope yimwayisakaga.

⁸ “Myoyo twapelengenye ulendo wetu. Twaciŵambele cilambo ciŵatamaga acalongo acimjetu, yisukulu ya Esawu juŵatamaga ku Seyili. Twalilesile litala lyakutyocela ku misi ja Elati ni Esiyoni Geba, ni twajinjilile litala lyakuja ku Nyasa ja Njete. Twagalawice ni kwinjilila ku cipululu ca Mowabu.

⁹ AMBUJE ŵasalile soni une kuti, ‘Mkaja kwasawusya ŵandu wa ku Mowabu, yisukulu ya Loti, kapena kumenyana nawo ngondo. Jemanjaji napele msinda wa Ali, soni nganjawula kupeleka kwa jemanja mbali jilijose ja cilambo cawo.’ ”

¹⁰ (Kala ku Ali kwatamaga mtundu wine wa ŵandu wawukulungwakulungwa, wakolanjidwa ni lina lyakuti Aemimu. Ŵandu ŵakwe ŵaliji ŵajinji soni ŵakupikanika. Ŵaliji ŵandu ŵacalewulewu ŵakulandana mpela ŵandu ŵaŵaŵilanjidwaga kuti, Aanaki.

¹¹ Ŵandu ŵeleŵa ŵa mu msinda wa Ali ŵaliji mkolanjidwa soni ni lina lyakuti Alefayimu. Nambo ŵandu ŵa ku Mowabu ŵakolangaga jemanjaji kuti Aemimu.

¹² Aholi nombe nawo ŵaliji mkutama mcilambo ca Edomu, nambo yisukulu ya Esawu ŵatopwesye ni kuwujonanga mtundu wosope wa Aholi. Ni yisukulu ya Esawu yatemi m'malo mwawo, mcilambo ca Mowabu. Ŵatesile yeleyi mpela muŵatendele Aisalaeli pakwatoposya amagongo ŵawo mcilambo ciŵapele AMBUJE).

¹³ “Twajombwece Lusulo lwa Seledi mpela muŵatusalilile AMBUJE.

¹⁴ Ndaŵi jitwajombokaga Lusulo lwa Seledi, paliji papite yaka 38, kutandila ndaŵi jitwatemi ku Kadeshi Baneya kula. Jele ndaŵijo, acalume wosope ŵiŵaputaga ngondo ŵaliji ali amasile kuwa, mpela muŵaŵecetele AMBUJE.

¹⁵ AMBUJE ŵajonasile acalume ŵakuputa ngondo ŵala mpakana wosope ŵamasile kuwa.

¹⁶ “Ali amasile kuwa,

¹⁷ AMBUJE ŵasalile uneji kuti,

¹⁸ ‘Timjinjile mcilambo ca Mowabu lelo, pakupitila litala lya ku Ali.

¹⁹ Nambo patimkayice mungulugulu cilambo ca Aamoni, mkaja kuyisawusya yisukulu ya Loti, kapena kumenyana nawo ngondo. Pakuŵa cilamboco nacipelece kala kwa yisukulu ya Loti, kuti ciŵe cawo.’ ”

²⁰ (Cilambo celeci caŵilanjidwaga soni kuti, cilambo ca Alefayimu, ligongo kala ŵandu ŵa mtundu welewo ŵatamaga mcilambo celeci. Aamoni ŵakolangaga jemanjaji kuti Asamusumimu.

²¹ Ŵandu ŵakwe ŵaliji ŵalewulewu, mpela ŵandu ŵa mtundu ŵa Aanaki. Ŵaliji ŵandu ŵajinji soni mtundu wamacili. Nambo AMBUJE ŵajonasile wosope ŵene, ni cilambo cawo cajigalidwe ni Aamoni, ŵiŵatamilicice mwelemo.

²² AMBUJE ŵayitendele yindu ya mtundu uwowo yisukulu ya Esawu, yiyatamaga ku cilambo ca matumbi ga Edomu. AMBUJEWO ŵawujonasile mtundu wa Aholi, ni cilambo cawoco cajigalidwe ni ŵanace ŵa Esawu, soni ali ciŵela kutama kweleko mpaka lelo jino.

²³ Ŵandu ŵakutyocela ku cilumba ca Kilete, ŵatemi mcilambo ca mungulugulu Nyasa ja Mediteleniyani. Jemanjaji ŵawujonasile mtundu wosope wa ŵandu ŵiŵatamaga mcilambomo, ŵakolanjidwa kuti Afimu. Ŵacisumwile cilambo cosope kutandila kumpoto mpaka kuja kwika kum'mwela kwa msinda wa Gasa).

²⁴ “Tuli tumasile kucipeleta cilambo ca Mowabu, AMBUJE ŵatusalile wosopewe kuti, ‘Mtyoce akuno sambano, mjomboce Lusulo lwa Alinoni. Ngumpa m'magasa mwenu Sihoni, mwenye jwa Aamoli jwa ku Heshiboni, ni cilambo cakwe cosope. M'menyane najo ngondo, ni mtande kwinjila ni kutama mcilambomo.

²⁵ Tindandile cile lelo kwatesya woga ŵandu ŵa cilambo capasi, kuti amjogopeje jemanja. Mundu jwalijose tacitenda woga soni tacitetemela pitacipikana ya jemanja.’

Aisalaeli akumpunda Mwenye Sihoni

²⁶ “Myoyo ni natumisye ŵamitenga kutyocela ku cipululu ca Kedemoti, kuti ajawule kwa Mwenye Sihoni jwa ku Heshiboni. Pakwatumapo, natumile kuti akasale maloŵe ga mtendele gakuti,

²⁷ ‘Atukunde kuti tupite mcilambo mwawo. Tucigamba kupita mcilambomo, ngasepuka aku nakuku, nambo tucigamba kupita litalape. Mpaka kuja komboka Lusulo lwa Yolodani

²⁸ Yakulya tacitenda yakutusumisya. Agambe kutukunda kuti tugambe kupitila mcilambo mwawomo,

²⁹ kuti tukajomboce Lusulo lwa Yolodani, ni kuja kwika ku cilambo cele AMBUJE Mlungu jwetu cakucipeleka kwa uwe. Yisukulu ya Esawu ku Edomu, pamo ni Amowabu ku Ali, wosopeŵa ŵatukundile kupita mcilambo mwawo.’

³⁰ “Nambo Mwenye Sihoni nganakunda kuti uweji tupitile mcilambo mwakwe. AMBUJE Mlungu ŵamjumwisye mwenyejo mtima, ni kumtendesya kuti asace kumenyana ngondo ni uweji. Ŵasalile une soni kuti, mkajogopa, jawulani mkamenyane najo Mwenye Sihoni, Uneji tinamkamucisye kuti mpunde pa ngondoji ni kucisumula cilambo cakwe.

³¹ “AMBUJE ŵaŵecete ni une acitiji kuti, ‘Mlole, ndesile yeleyi kuti mumpunde pa ngondo Mwenye Sihoni, ni kucisumula cilambo cakwe cele citukutama mpakana lelo jinoci.’

³² Twamenyene najo ngondo Mwenye Sihoni pamo ni asilikali ŵakwe kumalo gakuŵandikana ni musi wa Yahasi.

³³ AMBUJE Mlungu jwetu ŵatukamucisye kuti tupunde pa ngondo. Twamwuleje Mwenye Sihoni, ŵanace ŵakwe, kwisa soni asilikali ŵakwe wosope ŵa ngondo.

³⁴ Ndaŵi jijojo twasumwile ni kujijonanga misinda jaliji mcilambo cosope ca Mwenye Sihoni, twamwuleje mundu jwalijose, kutandila jwamlume, jwamkongwe ni ŵanace ŵakwe.

³⁵ Nambo yilangwa yawo pamo ni yipanje yosope yitwayisimene m'misi jitwasumwilejo twayijigele.

³⁶ AMBUJE Mlungu jwetu ŵatukamucisye soni uweji kusumula misinda josope, kutandila msinda wa Aloeli uwaliji mungulugulu Ciŵata ca Alinoni, ni misinda josope jaliji cilikati ca cele ciŵataco, mpaka kuja kwika kumalile ga cilambo ca Giliyadi. Paliji pangali msinda uliwose wa mapupa gamalewulewu uwatulemile kuwugwisya.

³⁷ Nambo twalolecesye kuti tukatenda ngondo m'misinda ja Aamoni, kutandila misinda jawo ja ku matumbi, kapena misinda jaliji mungulugulu Lusulo lwa Yaboki. Nginitujawula kuputa ngondo kumalo galigose giŵatulekasisye AMBUJE Mlungu jwetu kuti tukajawula.