Detulonomo 19 - Chiyawo Bible

Misinda jakutilila mundu kuti akulupuce

¹ “AMBUJE* Mlungu jwenu, ali amasile kwajonanga acimsyene cilambo cele cakuja kumpaco, ni jemanja patimkasumule misinda jawo pamo ni majumba gawo, ni kutamilicika mwelemo,

^2-3 mkacigaŵe cilamboco mbali sitatu, mbali jilijose jikakole msinda umo wakuti mundu jwakuwulaga mjakwe mwangosi akakombolece kutilila kweleko ni kuja kwika mwangasawusya, kuti akulupuce.

⁴ Naga mundu jwine akumwulaga mjakwe mwangosi jwamkanaŵa m'magongo jwakwe, akukomboleka kutilila ku msinda uliwose mwa misinda jitatujo, kuti akulupuce.

⁵ Kwende tuwanicisye kuti, ŵandu ŵaŵili apite ku ukweti kuja kata yitela. Jwine pakata citela, liŵago likulika mu mpini mwakwe, ni kumwulaga mjakwejo. Jwakuwulaga mjakwejo akomboleka kutilila ku msinda uliwose wa misinda jitatu jila, kuti alikulupusye.

⁶ Jwalakweju, jwangajenela kuwa, ligongo nginamwulaga mjakwejo mwamele. Nambo ligongo lyakuti mjakwe jula awile, acalongo acimjakwe ŵa mundu jwakuwajo tacitumbila. Mwine mpaka amtume mundu jwa mwiŵasa mwawo kuti amlupate mundu jwakuwulaga mjakwe jula mpaka amwulaje. Naga msinda wakutilila ukuŵa kwakutalicila, acalongo acimjakwe wa mundu jwakuwa jula mpaka apakombole kumkamula jwalakwejo ni kumwulaga.

⁷ Ni ligongo lyakwe namsalile kuti pakwenela kuŵa misinda jitatu jakutilila mundu kuti akulupuce.

⁸ “Pitacicikusya, AMBUJE Mlungu jwenu cilambo cenu, mpela muŵatendele cilanga* ni acinangolo ŵenu, ni pitacimpa cilambo cosope muŵatendele cilanga kuti tacicipelekaco,

⁹ jele ndaŵijo timsagule soni misinda jine jitatu jakonjecesya. AMBUJEWO takapelece cele cilamboco naga mkutenda yosope yingumlamula lelo jinoyi, ni soni naga mkwanonyela AMBUJE Mlungu jwenu ni kuyitenda yindu yosope yamjiganyisye.

¹⁰ Mkasagule misinda jakulupucila ŵanduji, kuti mkaja kulemwa pakwawulaga ŵandu ŵangalemwa mcilambo citakampe AMBUJECO.

¹¹ “Nambo naga mundu jwine akuŵengana ni mjakwe, ni akumjuŵilila mjakwejo ni mkumwulaga mwamelepe, ni akutilila ku msinda umo wa jele misinda jakulupucila jila, kuti akulupuce.

¹² Naga yili myoyo, acakulungwakulungwa ŵakumangwakwe amŵilasye, ni pitayicepo ampelece m'myala mwa ŵandu ŵakwenela kumwulaga.

¹³ Mkasimumtendela canasa mundu jwakuwulaga mjakwe. Mumtyosye mundu jwakuwulaga mjakwe jwangalemwa pasikati pa Aisalaeli, kuti yindu yikamjendele cenene.

Ngatukusya malile gakala

¹⁴ “Malile ga migunda gali geŵicile cile ni ŵandu ŵakala, mcilambo cakuja kumpa AMBUJE. Conde, ngumgombelesya kuti, mkaja kutukusya gele malilego.

Yakwayana ni ŵandu ŵakutendela umboni

¹⁵ “Naga mundu ali alemwisye, pakwenela kuŵa mboni siŵili kapena sitatu, syakusimicisya kuti mundujo kweli alemwisye.

¹⁶ Naga mundu jwine akumlambucisya mjakwe magambo, ni akusimanikwa kuti akuŵeceta ya unami,

¹⁷ mundu jwakwimbidwa magambojo ni mundu jwakupeleka umboni wa unami jula, ajawule wosope kumalo gamo gakwalambila AMBUJE, kweleko ŵakutaga mbopesi pamo ni ŵakulamula magambo ŵali pa masengo pa jele ndaŵijo,

¹⁸ takawungunye ya gele magambogo. Naga akusimana kuti mboni jila jipelece umboni waunami,

¹⁹ ajipe cilango cakulandana ni cele cakapocele mundu jwamlambucisyeje kuti alemwisye. Pakutenda myoyo ŵandu nginatenda cakusakala camtundu welewo pasikati penu.

²⁰ Ŵandu ŵane pitacipikana ya cilango cacipelecedwe kwa mundu jwakupeleka umboni ŵa unami, tacitenda woga, ni pangali mundu jwalijose jutacitenda cakusakala ca mtundu welewo.

²¹ Pa magambo ga mtundu welewo, mkasimumtendela canasa mundu jwakupeleka umboni ŵa unami. Cilango cakwe cikwenela kuŵa umi kulipila umi, liso kulipila liso, lino kulipila lino, mkono kulipila mkono, soni lusajo kulipila lusajo.