Detulonomo 18 - Chiyawo Bible

Yakwenela kupocela ŵakutaga mbopesi

¹ “Ŵandu ŵa lukosyo lwa Alefi pamo ni ŵakutaga mbopesi, ngisapocela mbali jilijose ja cilambo ca Isalaeli. M'malo mwakwe jemanjaji takalyeje mbopesi ni yakupeleka yine ya kwa AMBUJE.*

² Jemanjaji ngakwenela kukola cilambo, mpela mwakukolela ŵandu ŵane. Ligongo AMBUJE ŵatesile cilanga* cakuti, ŵandu ŵa lukosyo lwa Lefi pamo ni ŵakutaga mbopesi, tacilama pakupocela mbuwa sya mbopesi ni yakupeleka yine ya kwa jwalakwejo.

³ “Ndaŵi jele Aisalaeli akupeleka mbopesi ja nyama ja ng'ombe kapena ja ngondolo, ŵakutaga mbopesi akwenela kupegwa lukongolo lwa msogolo, nyama ja kucipundi, ni ciwukala.

⁴ Akwenela kupegwa soni mbuwa jandanda ja tiligu, ja finyo, ja mawuta ga olifi* ni ja manyunya ga ngondolo.

⁵ Pa ngosyo syenu syosope AMBUJE ŵasagwile ŵandu ŵa lukosyo lwa Lefi kuti akamuleje masengo gakutaga mbopesi kwa yaka yosope.

⁶ “Mlefi jwalijose naga ali asacile, akukomboleka kutyoka mu msinda uliwose wakutama mu Isalaeli, ni kwawula kumalo gamo gakwalambila AMBUJE gala,

⁷ ali ayice kweleko akwenela kuja kwatumicila AMBUJE Mlungu jwakwe, pakutenda masengo gakutaga mbopesi, mpela mwakutendela Alefi ŵane wosope ŵakutumicila kweleko.

⁸ Akwenela kupocela nombe najo yakulya mwakulandana ni ŵakutaga mbopesi ŵane, atamose jwalakwejo ali akwete mbiya syakwe, syasipatile ligongo lyakusumisya yindu ya mwiŵasa lyakwe.

Ngatenda yindu yakusakala

⁹ “Patimkajinjile mcilambo cele citakampe AMBUJE Mlungu jwenu, mkaja kuya yitendo yakusakala, ya ngosyo sya ŵandu ŵa kweleko.

¹⁰ Pakaja kusimanikwa mundu jwalijose pasikati penu, jwakupeleka mwanace jwakwe pa moto mpela mbopesi. Pakaja kusimanikwa mundu kulondola cisango, kapena jwakusagamila masoka, kapena jwakutenda ya usaŵi, kapena jwakamulisya masengo yilisi syakusakala.

¹¹ Pakaja kusimanikwa mundu jwakuwusya lunda kwa misimu ja ŵandu ŵawe.

¹² AMBUJE Mlungu jwenu akusaŵengana nawo ŵandu ŵakutenda yakusakala yamtundu welewo. Ni ligongo lyakwe AMBUJEWO akwatoposya ŵandu ŵa ngosyo sya mcilambo cimkuja kwinjilaco.

¹³ Nambo jemanja mkaŵe ŵandu ŵakulupicika kwa AMBUJE Mlungu jwenu.”

Cilanga cakuti tatumisye jwakulocesya

¹⁴ Mose* ŵasalile soni Aisalaeli kuti, “Ŵandu ŵamkuja kwasumula cilambo cimkuja kutamaco, akusakuya ni kwapikanila ŵandu ŵakulondola yisango ni ŵamatipwi. Nambo AMBUJE Mlungu jwenu ngakumkunda jemanja kutenda yindu ya mtundu welewo.

¹⁵ M'malo mwakwe AMBUJE Mlungu jwenu, tacimsagula mundu jumo jwa mlukosyo lwenu, kuŵa jwakulocesya* jwamti mpela une, ni mkwenela kumpikanila jwalakwejo.

¹⁶ “Pa lisiku limwasongene Petumbi lya Sinayi, ‘Ngatukusaka kuti AMBUJE aŵecete ni uweji, ngatukusaka kuwuwona soni moto wawukulungwa camti myiyi, ni mkaŵa uweji kuwa.’

¹⁷ Pelepo AMBUJE ŵasalile kuti, ‘Yosope yaŵendile ŵandu ŵeleŵa yili yakupikanika.

¹⁸ Tinamsagule mundu jumo jwa mlukosyo lwawo, kuti aŵe jwakulocesya mpela m'mwejo. Tinjimsalila jwalakwejo yakuti aŵecete, ni jwalakwejo tacasalila ŵandu yosope yingulamula.

¹⁹ Jwalakwejo taciŵeceta mu lina lyangu, une tinjipeleka cilango kwa mundu jwalijose jwangagapikanila maloŵe gangu.

²⁰ Nambo jwakulocesya jwalijose jwakulinga kuŵeceta mu lina lyangu, mwangamlamulaga une kuti aŵecete, awulajidwe. Soni jwakulocesya jwalijose jwakuŵeceta mu lina lya milungu jine nombe najo akwenela kuwulajidwa.’

²¹ “Mwine mwakwe mkuŵa ŵakusimonga kuti, ‘Ana mundu mpaka akombole uli kumanyilila kuti maloŵe ga jwakulocesya jwamtijwamti nganigatyocela kwa AMBUJE?’

²² Naga mundu akuŵeceta mu lina lya AMBUJE, ni yakuŵeceta yakweyo ngayikutendekwa, papopo amanyilile kuti gelego nganigaŵa maloŵe ga AMBUJE. Jwakulocesya jwelejo akusamjogopa, agambile kuliŵecetela yakweyakwepe.