Detulonomo 17 - Chiyawo Bible

¹ “Mkaja kupeleka mbopesi ja ng'ombe kapena ja ngondolo jelemale, kwa AMBUJE* Mlungu jwenu, pakuŵa AMBUJEWO akuŵengana ni yindu ya mtundu welewo.

² “Mwine mwakwe tipacisimanikwa kuti mu msinda wine wakwe wutacimpa AMBUJE Mlungu jwenu, apali mundu jwine jwamlume kapena jwamkongwe, jwatesile ulemwa* pameso pa AMBUJE Mlungu jwenu, pakukasa cilanga* ca AMBUJE,

³ pakujilambila ni kujitumicila milungu jine, mpela lyuŵa, mwesi kapena ndondwa, yele yinamlekasisye kuti mkaja kuyilambila.

⁴ Naga mkuja kupikana kuti cindu camtundu welewo citendekwe, mkajiwungunye cenene ngani jelejo. Pitimkasimane kuti cindu cakusakala ca mtundu welewo citendekwe mu Isalaeli,

⁵ mumkamule jwele mundu jwatesile ulemwajo, ni mjawule najo kusa kwa msindawo, ni mkamwulaje pakumsoma ni maganga.

⁶ Mkamwulaga mundu naga mkupata umboni wa mundu jumope, nambo awulajidwe naga mkupata umboni wa ŵandu ŵaŵili kapena ŵatatu ŵakutendela umboni.

⁷ Pakumwulaga jwalakwejo, sitande mbonisyo kumsoma maganga. Panyuma pakwe ŵandu wosope amsome maganga mundujo. Pakutenda myoyo timcityosya cindu cakusakalaco pasikati penu.

⁸ “Mwine tipacipagwa magambo gakuwulagana, gakukanganilana yindu, kapena gakupwetekana m'misinda jenu, naga kulamula kwa magambogo kukwasawusya ŵandu ŵenu ŵakulamula panganya, mjawule nago magambogo kumalo gamo gitacisagula AMBUJE Mlungu jwenu kuti mkamlambileje

⁹ ni mkagapelece magambogo kwa jwakulamula magambo jwali pa masengo pa jele ndaŵijo, jwali pamo ni ŵakutaga mbopesi ŵa ci Lefi ni mwalecele jemanjajo kuti alamule magambo genugo.

¹⁰ Ali alamwile magambogo, jemanja mkatende yosope yitakamsalileyo.

¹¹ Mkajiticisye kulamula kwawo kwa magambogo, soni mkayitende yosope yitakamsalile kuti myitende.

¹² Mundu jwalijose jwangapikanila yakusala jwakutaga mbopesi jwakwatumicila AMBUJE Mlungu jwenu, kapena jwangampikanila jwakulamula magambo jwali pa masengo pa jele ndaŵi jakulamula magambogo, awulajidwe. Pakutenda myoyo cakusakala ca mtundu welewo ticicityoka pasikati pa Isalaeli.

¹³ Mundu jwalijose jutacipikana jele nganijo, Tiwucimkamula woga, ni pangali mundu jutacilinga kutenda yakusakala ya mtundu welewo.

Yakwenela kutenda ayimwene

¹⁴ “Mli mjinjile mcilambo citakampe AMBUJE Mlungu jwenu ni kutamilicika, naga mkuja ganisya yakuti yakola mwenye mpela mwakolele ŵandu ŵa ngosyo sine ŵamŵandikene nawo,

¹⁵ mwenyejo akwenela kuja kuŵa mundu jwamsagwile AMBUJE Mlungu jwenu. Akwenela kuja kuŵa mundu jwa lukosyo lwenu lwa Isalaeli. Mkaja kumsagula mundu jwa cilendo kuti akaŵe mwenye jwenu, ligongo jwalakwejo nginaŵa mlongo mjenu.

¹⁶ Mwenyejo akaja kola mahaci gamajinji, soni akaja kwatuma ŵandu ŵakwewo kuja kusuma mahaci ku Iguputo, pakuŵa AMBUJE ŵamsalile jemanja kuti mkaja kuwujila soni kweleko.

¹⁷ Jwalakwejo akaja kola acakongwe ŵajinji, kogopela kuti jemanjajo komboleka kuja kumnyenga m'mwejo kuti alece kwalambila AMBUJE, soni akaja kulisicilisya msyene ni silifa* ni golidi.*

¹⁸ Mundujo ali ajinjile ucimwene wakwe, jwalakwejo akalembe m'buku jakwe malamusi ga Mlungu gakutyocela m'buku ja malamusi ga Mlungu jili m'myala mwa jwakutaga mbopesi jwa ci Lefi.

¹⁹ Akajisunje buku jeleji pa malo gakuŵandikana ni jwalakwe soni akajiŵalanjeje umi wakwe wosope. Pakutenda myoyo takalijiganye kwacimbicisya AMBUJE ni kugapikanila malamusi gosope galembedwe m'buku m'bukumo mwakulupicika.

²⁰ Yeleyi ticimkamucisya mwenyejo kumanyilila kuti, jwalakwejo ngakulekangana ni Aisalaeli acimjakwe, soni kuti gakuŵajilwa kuŵa mundu jwakuganyosya Malamusi ga AMBUJE. Naga mwenyejo akuja kugapikanila malamusi gosope ga AMBUJE, jwalakwejo pamo ni yisukulu yakwe, tacilamulila cilambo ca Isalaeli kwa ndaŵi jelewu.