Detulonomo 16 - Chiyawo Bible

Pasaka

¹ “Mwacimbicisye AMBUJE* Mlungu jwenu, pakutenda cindimba pa mwesi wa Abibu,* yaliji kuti mwesi welewo ni ndaŵi jiŵamkulupwisye jemanja kutyoka ku Iguputo.

² Mpeleceje mbopesi jakutendela cindimba ca Pasaka* kwa AMBUJE Mlungu jwenu. Mwulaje ngondolo kapena ng'ombe pa malo gamo gitacisagula AMBUJE kuti ŵandu amlambileje.

³ Ngalya nyama ja mbopesijo pamo ni mkate wana cakusasaŵilisya. Nambo mlyeje nyamajo pamo ni mkate wangali cakusasaŵilisya, kwa masiku msano ni gaŵili, mpela mumwatendele ndaŵi jimwatyokaga mwakwanguya mcilambo ca Iguputo. Mlyeje mkate welewu utiwucikolanjidwa kuti mkate wa yisawusyo. Pakutenda cindimba celeci timciŵa mli mkukumbucila lisiku limwakopwece ku Iguputo umi wenu wosope.

⁴ Pa masiku msano ni gaŵili mundu jwalijose jwa mcilambo cenuco, akasunga cakusasaŵilisya* mkate m'nyumba mwakwe. Nyama jakuwulajidwa ligulo lya lisiku lyandanda, alye cilo cicoco.

^5-6 Mkawulajeje nyama sya Pasaka pa malo gamo gagasagwile AMBUJE kuti mwalambileje gala. Ngaŵa pa malo gane galigose gali mcilambo citakampe AMBUJE Mlungu jwenu. Mkawulajeje nyamasyo lili likapile lyuŵa, jelejo ni ndaŵi jejila jimwatyosile mcilambo ca Iguputo.

⁷ Mkatelece nyamajo ni kujilya pa malo gamo gakwalambila AMBUJE gala, ni kuwujila ku masakasa kwenu kundaŵi kwakwe.

⁸ Mkalyeje mkate wangali cakusasaŵilisya kwa masiku msano ni limo. Nambo pa lisiku lya msano ni gaŵili, mkasongane kuti mwalambile AMBUJE Mlungu jwenu, soni ngakamula masengo pa lyele lisikuli.

Cindimba ca ndaŵi jagowola

⁹ “Mkaŵalanje milungu msano ni jiŵili, kutandila pa ndaŵi jimtandite kata tiligu.

¹⁰ Ni mtende cindimba ca ndaŵi ja kugowola, cakwatogolela AMBUJE Mlungu jwenu, pakupeleka kwa jwalakwejo mtuka wa lulele mwakulandana ni upile wampele jwalakwejo.

¹¹ Mkaŵe ŵandu ŵakusengwa pameso pa AMBUJE Mlungu jwenu, pamo ni ŵanace ŵenu, ŵakutumicila ŵenu, ngaliŵalila Alefi, acalendo, ŵanace ŵamasije ni acakongwe ŵamasije,* wakutama m'misinda jenu. Cindimba celeci mkatendeleje kumalo gamo gitakasagule AMBUJE kuti mkalambileje gala.

¹² Mkumbucileje kuti mwaliji acikapolo ku Iguputo. Myoyo malamusi gelega mkwenela kugasunga.

Cindimba cakutaŵa masakasa

¹³ “Mli m'malisisye kututa yagowola yenu, soni mli m'masile kuminya mipeleya jenu, mkatendeje cindimba ca masakasa* kwa masiku msano ni gaŵili, pa malo gamo gakwalambila AMBUJE gala.

¹⁴ Msangalale pa cele cindimbaco pamo ni ŵanace ŵenu, ni ŵakutumicila ŵenu, ngaliŵalila Alefi, acalendo, ŵanace ŵamasije, ni acakongwe ŵamasije ŵali m'misinda mwenu.

¹⁵ Mkacimbisye AMBUJE Mlungu jwenu, pakutenda cele cindimbaci kwa masiku msano ni gaŵili, pa malo gitacisagula AMBUJE kuti mkalambile. Mkaŵe ŵandu ŵakusengwa, ligongo AMBUJE Mlungu jwenu ayipele upile yagowola yenu pamo ni masengo genu.

¹⁶ “Acalume wosope ŵa mtundu wenu akwenela kwika kukwalambila AMBUJE, katatu pa caka kumalo gamope gakwalambila AMBUJE gala. Akwenela kwika pa ndaŵi ja Pasaka, pa ndaŵi ja cindimba ca yagowola ya m'migunda, soni pa ndaŵi ja cindimba cakutaŵa masakasa.

¹⁷ Jwamlume jwalijose pakwisa, akayika yalayalape, nambo akwenela kwika ni mtuka mutasacile, nambo mwakulandana ni mwapelecele upile AMBUJE Mlungu jwenu, kwa jwele mundujo.

Kulamula kwa cilungamo

¹⁸ “Mu msinda uliwose utakampe AMBUJE Mlungu jwenu, mkasagule ŵandu ŵakulamula ni acakulungwakulungwa ŵane. Ŵandu ŵeleŵa akalamulileje acimjawo mwangatenda lusagu.

¹⁹ Akaja kutenda yindu yangaŵa ya cilungamo, kapena kulamula magambo mwalusagu. Akaja kupocela mbote ja cilo, ligongo yikasatendesya cipi m'meso mwa ŵandu ŵalunda soni yikusalemwekasya ŵandu ŵa cilungamo pa kulamula magambo.

²⁰ Mkalamuleje magambo mwa cilungamo ni mwangali lusagu ndaŵi josope. Naga mkuja kutenda myoyo, timkatamilicice mcilambo citakampe AMBUJE Mlungu jwenu.

²¹ “Mkaja kutotomeka cimanyisyo ca citela ca mtundu uliwose ca Ashela, mlungu jwamkongwe, pambali pa malo gakupelecela mbopesi kwa AMBUJE Mlungu jwenu.

²² Soni mkaja kuŵaka yipilala ya maganga kwa milungu ja cilendo, pakuŵa AMBUJE Mlungu jwenu, akuŵengana ni yindu yamti mpela yeleyi.