Detulonomo 15 - Chiyawo Bible

Caka camsano ni yiŵili

¹ “Pambesi pa caka camsano ni yiŵili yiliyose, mwakululucileje ŵandu ŵosope ŵimwakongwesye mbiya kapena cindu cilicose.

² Mundu jwalijose juŵamkongwesye mbiya mu Isalaeli mjakwe, ajisimasye jele ngongolejo. Akamcisya mlongo mjakwejo kuti awusye mbiyasyo, pakuŵa AMBUJE* alamwile kuti ngongolejo ajisimasye.

³ Ali lilamusili likwayana ni ngongole jimpelegene Aisalaelipe. Nambo nagajwakwete ngongolejo ali mundu jwa cilendo, mkukomboleka kumŵilasya ngongolejo.

⁴ “AMBUJE takampe upile mcilambo citakampeco. Pangali mundu jwalijose jwa mtundu wenu jutaciŵa jwakulaga,

⁵ bola naga mkuja kugapikanila maloŵe gakwe ni kusamala malamusi gosope gangumpa lelo jinoga.

⁶ Pakuŵa AMBUJE takampe upile mpela mwele muŵatendele cilanga.* Timcakongosya mbiya ŵandu ŵa ngosyo syejinji, nambo jemanja ngasimkongola kwa mundu jwalijose. Timcisilamulila ngosyo syejinji, nambo pangali lukosyo lulilose lutulucimlamulila jemanja.

⁷ “Naga pasikati pa acalongo acimjenu pana mundu jwine jwakulaga m'musi mwenu, mcilambo cele AMBUJE Mlungu jwenu takampe, mkaja kuŵa ŵandu ŵakumula mitima, kapena kuŵa ŵa ugaga.

⁸ M'malo mwakwe mumtendele canasa mundujo ni mumkongosye mbiya mwakusisacila.

⁹ Mkaja kola nganisyo syakusakala ni kuŵeceta mu mtima mwenu kuti, “Nganimkongosya mundu jweleju ligongo caka cakusimasya ngongole ciŵandicile. Naga ngumpa mbiyasi sambano, jwalakweju ngisawusya mbiya syangusi.” Naga ngamkulosya mtima wakumtendela canasa mlongo mjenu jwakulagajo, jwalakwejo tacalilila AMBUJE ali mkumdandawula m'mwejo, ni timcisimanika kuti m'mwejo mli ŵakulemwa.

¹⁰ Timumkongosye mlongo mjenujo mwanganyinyilika, nipo AMBUJE tacipeleka upile pa masengo genu gosope.

¹¹ Ndaŵi syosope tipaciŵa Aisalaeli ŵane ŵakulaga pasikati penu ŵakusoŵa yindu. Kwa ŵandu ŵamti myoyowo, ngumlamula kuti mwatendeleje canasa.

Yakwatendela acikapolo

¹² “Naga mu Isalaeli mjenu, jwamlume kapena jwa mkongwe, akulisumisya msyene kwenumwe kuti aŵe kapolo jwenu, mumgopole ali amtumicile yaka msano ni cimo. Pa caka ca msano ni kaŵili mumkunde kuti ajawuleje mwa mtendele kuti aŵe mlukosyo.

¹³ Patimumgopolepo mkamkunda kuti atyoce pa mlango penupo, yalayalape.

¹⁴ Nambo mumgaŵile ni mtima wenu wambone, yindu yosope yimpocele mwa upile wa AMBUJE, mpela yindu ayi: ngondolo, tiligu, ni finyo.

¹⁵ Mkumbucileje kuti mwaliji acikapolo ku Iguputo, ni AMBUJE Mlungu jwenu, ŵamkulupwisye. Ni ligongo lyakwe ngumpa lilamusi lyeleli lelo jino.

¹⁶ “Nambo naga kapolojo msyene ngakusaka kutyoka, akunonyelwa kutama panyumba jenu pamo ni liŵasa lyenu, ligongo lyakuti mkutamanajo cenene. Naga yili myoyo,

¹⁷ mumjigale kapolojo ku mlango wa nyumba jenu, ni mli pa mlangopo mjigale singano ni mlipowole lipikanilo lyakwe mpaka singanojo jijinjile mwitanga ni kutandila pelepo taciŵa kapolo jwenu umi wakwe wosope. Atamose kuti kapolojo aŵe jwamkongwe mumtende soni yalumo.

¹⁸ Kumgopola kapolo kuti aŵe mlukosyo, kukamnyalaya. Jwalakwejo akamwile kala masengo kwa yaka msano ni cimo, pa malo pamkajasile mbiya kwalipila ŵandu ŵamasengo kwa yaka yiŵili. Mumgopole kapolojo kuti aŵe mlukosyo, ni AMBUJE Mlungu jwenu tacimpa upile pa masengo genu gosope gatimcikamula.

Ŵanace ŵandanda kupagwa ŵa yilangwa

¹⁹ “Ŵanace ŵosope ŵacalume ŵakutanda kupagwa ŵa ng'ombe, ngondolo, kapena mbusi, mwaŵice pajika kuti aŵe ŵa AMBUJE, Mlungu jwenu. Mkasimsikamulisya masengo ng'ombe syelesi, soni ngondolosyo mkasikata manyunya gakwe.

²⁰ M'malo mwakwe, caka cilicose mjigaleje ŵanace ŵandanda kupagwa ŵa yilangwa yeleyi, ni kuja nayo kumalo gitacisagula AMBUJE Mlungu jwenu kuti mkamlambile. Jemanja pamo ni maŵasa genu timkayipelece yilangwayo mbopesi kwa AMBUJE, ni timkalye nyama jakwe ku malo gelego.

²¹ Nambo naga pana cindu cakulemwekwa pa cilangwaco, mpela kutundajila, ngalola, kapena kulemala kwa mtundu wine uliwose, mkajitaga mbopesi kwa AMBUJE Mlungu jwenu.

²² Nyama ja mtundu welewo mkukomboleka kutenda mboga kumangwenu. Mundu jwalijose akomboleka kulya nyama jelejo, kanga mundujo ali jwakwenela kulya malinga ni msyungu wa mapopelo kapena jwangajenela, mlyeje mumkasalila ndandala kapena mbaŵala.

²³ Nambo mkalya miasi jakwe, m'malo mwakwe mgambe kujijitila pasi mpela mesi.