Detulonomo 14 - Chiyawo Bible

Ndamo syangasosekwa pandaŵi ja malilo

¹ “Jemanja mli ŵanace ŵa AMBUJE* Mlungu jwenu. Pa ndaŵi jimkulila malilo, conde mkasimlikataga pa cilu kapena kumyola umbo sya pawusyo penu.

² Amsagwile jemanja pasikati pa ŵandu wosope ŵa pacilambo capasi, kuti mŵe ŵandu ŵakwe. Myoyo jemanja mli ŵandu ŵakweŵakwepe.

Nyama syakwenela ni syangajenela kulya

³ “Mkalya cilicose cakusala AMBUJE kuti cili cangajenela kulya.

⁴ Mkukomboleka kulya nyama asi: ng'ombe, ngondolo, mbusi,

⁵ ngolombwe, kasenye, njati, mbunju, mbaŵala, ni ndandala.

⁶ Mkukomboleka kulya nyama jilijose jikwete yikotwa yigaŵanice ni soni jajikulukula yakulya yayitawunetawune.

⁷ Nambo pasikati pa yinyama yakugaŵikana yikotwa kapena yakulukula yakulya yetawunetawune, mkalya nyama asi: ngamila,* kalunga, njecele, ligongo atamose kuti yikusalukula yakulya yetawunetawune, yili yangagaŵanika yikotwa yakwe.

⁸ Mkasilya maguluŵe. Gelega gali gangajenela kulya kwa jemanja. Yikotwa yakwe yili yegaŵanice, nambo gangalukula yakulya yetawunetawune. Nyama syelesi mkalya, soni mkasikwaya sili siwile.

⁹ “Mkukomboleka kulya somba silisyose syasikwete maŵamba ni yipyepye.

¹⁰ Nambo yiliyose ya umi yakutama m'mesi, yangali yipyepye ni maŵamba yili yangajenela kulya jemanja, myoyo mkalya.

¹¹ “Yijuni yosope yakwenela kulya, mlyeje.

^12-18 Nambo yijuni yangajenela kulya ni ayi: nyanga, kapungu, ngwasi, litumbusi, mkande, cimbanga, likungulu, mbuni, nalumbapala, cimbanga, kawungululu, liwunde, namame, fuwo, lisolokoto, kakoŵa, kongwe, maloya, ni ciputiputi.

¹⁹ “Tuyilombo tosope tukwete mapapiko tuli twangajenela kulya, myoyo mkalyaga.

²⁰ Nambo tupali tuyilombo twine tukwete mapapiko tumkwenela kulya, mpela mtundu wosope wa njelele, sombe ni yitete.

²¹ “Mkalya nyama jilijose jakuwa jika. Komboleka kumpa mlendo jwakutama pasikati penu kuti alye, kapena mgambe kujisumisya nyamajo kwacalendo ŵa yilambo yine. Pajatu jemanja mli ŵandu ŵa AMBUJE Mlungu jwenu. “Mkateleka mwanace jwangondolo kapena jwa mbusi mu mkaka wa mamagwe.

Lilamusi lyakupeleka calikumi

²² “Caka cilicose mŵiceje pambali mbuwa jimo ja mbuwa likumi, ja mbeju syenu simgowele.

²³ Soni mŵice pambali calikumi* ca finyo ni mawuta genu ga olifi* ni mwanace jwandanda jwa ng'ombe jilijose, ngondolo jilijose, ni mbusi jilijose. Myijigale yindu yosopeyi ni mjawule nayo ku malo gagasagwile AMBUJE kuti mkamlambileje, ni mkalye yele yinduyo kumalo gelego. Mkatendeje yeleyi caka ni caka kuti mkalijiganye kwacimbicisya AMBUJE Mlungu jwenu ndaŵi syosope.

²⁴ Nambo, naga malo gele gagasagwile AMBUJE Mlungu jwenu kuti mkamlambileje, gali pa mkuli wakutalikangana ni kumangwenu, kwakuti ngakomboleka jemanja kwawula nayo yindu yenu ya calikumi yimŵisile pambali yila, yimyipatile ligongo lya upile wampele AMBUJE Mlungu jwenu,

²⁵ myisumisye yinduyo, ni mbiya syakwe mjawule nasyo kumalo ga mapopelogo.

²⁶ Mli myice m'mwejo pamo ni liŵasa lyenu kumalogo, mbiyasyo mkasumile yakulya yiliyose yimkusaka kutendela cindimba, mpela nyama ja ng'ombe, nyama ja ngondolo, nyama ja mbusi, finyo, ukana ni yakulya yine yimkuyisaka kulya kungulo kwenu ni mlye ni kusangalala pameso pa AMBUJE Mlungu jwenu.

²⁷ “Mkaliŵalila kwaŵilanga Alefi ŵamkutama nawo m'misi mwenu ku cele cindimbaci. Pakuŵa jemanjaji nginakola cilambo cakulima mbeju syawo.

²⁸ M'malo mwakutendela cindimba, ya likumi ya mbeju simgowele, kumbesi kwa caka catatu cilicose, myice nayo yosopeyo ku msinda kuti ayisunje.

²⁹ Yakulya yeleyi yili yawo Alefi, pakuŵa ŵangali malo gawo gakulima, soni yakulya yeleyi yakwakamucisya nayo acalendo, ŵanace ŵamasije, ni acakongwe ŵamasije* ŵakutama m'misinda jenu. Ŵandu ŵeleŵa ayiceje mu msinda kujigala yindu yikwasoŵa. Naga ŵandu ŵeleŵa akukola yakulya yakwanila, AMBUJE Mlungu jwenu takampe upile pa masengo galigose gatimkatende ni yalayenu.