Detulonomo 13 - Chiyawo Bible

¹ “Mwine mwakwe jwakulocesya* kapena jwakusagamukula taciwoneka pasikati penu, ali mkusala kuti tacimtendela yimanyisyo kapena yindu yakusimonjeka.

² Naga cimanyisyoco kapena cindu cakusimonjekaco cili citendekwe, jwalakwejo nakumsalila jemanja kuti mkalambile ni kujitumicila milungu jine, jimkanimjilambileje citandilile,

³ mkaja kupikanila yeleyo. AMBUJE* Mlungu jwenu akuyikunda yeleyo kuti yitendekwe, kuti amlinje jemanja, kuti amlole naga mkasimwanonyela AMBUJEWO ni mtima wenu wosope.

⁴ Mwakuye AMBUJE ni mkwacimbicisya, mwapikanile ni kugasunga malamusi gawo. Mwalambile ni kuŵa ŵakulupicika kwa AMBUJEWO.

⁵ Jwakulocesya kapena jwakugopolela sagamisi jwalijose, jwele jwakumsalila jemanja kuti mwajimucile AMBUJE Mlungu jwenu, jwele juŵamkulupwisye ku cilambo cimwaliji mu ukapolo, ni kumkoposya mcilambo ca Iguputo, awulajidwe. Mundu jwa mtundu welewo ali jwakusakala, ligongo akusaka kumlekasya litala lyakusaka AMBUJE kuti mlikuye. Awulajidwe jemanjajo, pakutenda myoyo timcityosya cindu cakusakala celeci pasikati penu.

⁶ “Mundu akukomboleka kumnyenjelela jemanja pacisyepela kuti mjilambile milungu jine, milungu jele jemanja ni acinangolo ŵenu nginimjilambileje citandilile. Mundu jwakumnyenjelela m'mwejo atamose aŵe mlongo mjenu msyesyene jwakupagwa najo citumbo cimo, atamose aŵe mwanagwenu, atamose aŵe ŵamkwenu ŵakunonyelwa, kapena ambusanga ŵenu ŵa pamtima, mkakunda kujilambila milungu jinejo amta panandi.

⁷ Mwine mwakwe jumo jwa ŵanduwo akukomboleka kumnyenjelela jemanja kuti mjilambile milungu ja ŵandu ŵamŵandikene nawo, kapena milungu ja ŵandu ŵimtalikangene nawo.

⁸ Jemanja mkajigalika kapena kupikanila yakuŵeceta jwele mundujo. Mkamtendela soni kapena canasa, nambo soni mkamcenjela.

⁹ Mumwulaje mundujo! Mtande jemanja kumsoma ni maganga, ni ŵandu ŵane wosope nombe nawo amsome maganga.

¹⁰ Mumwulaje mundujo pakumsoma maganga. Ligongo jwalakwejo ateje amsokonesye jemanja, kuti mlekangane ni AMBUJE Mlungu jwenu, jwele juŵamkopwesye ku cilambo ca Iguputo, kwele kumwaliji acikapolo.

¹¹ Aisalaeli wosope pitacipikana yakuwulajidwa kwa mundu jwakusokonesyajo, tacitenda woga, ni tipaciŵa pangali soni mundu jwine pasikati penu jwa mpaka kuti amnyenjelele soni kuti mkalambile milungu jine.

¹² “Pitimkatameje m'misi jitakampe AMBUJE Mlungu jwenujo, ndaŵi sine mwine mwakwe timkapikane,

¹³ kuti ŵandu ŵane ŵa lukosyo lwenu ŵali mu msinda wine, ŵapitikwisye mitima acimjawo ŵa wele msindawo pakwasalila kuti, ‘Kwende tujawule kujilambila milungu jine, jimkanimjilambileje citandilile.’

¹⁴ Pitimkapikane ngani jamtundu welewo mkajiwungunye cenene. Naga mkusimana kuti nganijo jili jakuwona, kuti cindu cakusakala camtundu welewo citendekwe,

¹⁵ mkawulaje ŵandu wosope ŵa wele msindawo, pamo ni yilangwa yawo. Mkawumale kuwujonanga msinda wosopewo.

¹⁶ Mkayisonganye yindu yosope ya ŵandu ŵa wele msindawo pa malo gamo, ni mkayiwunjice pasikati pa luŵala lwekulungwa lwa mu msindawo. Mli m'masile kuyiwunjika yinduyo, mkawujoce moto msindawo pamo ni yindu yosope yili mwelemo, kuti yikaŵe mpela mbopesi jakutinisya jakupeleka kwa AMBUJE Mlungu jwenu. Mkawulece wele msindawo kuti ukaŵe masame mpaka kalakala.

¹⁷ Mkaja kujigala yindu yiliyose ni kuyisunga ya wele msindawo, yele yamlamwile AMBUJE kuti mkayijonanje. AMBUJEWO tacimtendela canasa, soni tacileka kumtumbilila, ni timciŵa ŵandu ŵajinji, mpela muŵatendele cilanga* ni acinangolo ŵenu.

¹⁸ Takamtendele yindu yeleyi naga mkuja kugapikanila maloŵe gosope ga AMBUJE Mlungu jwenu, soni naga mkuja kugakuya malamusi gosope gangumpa une lelo jinoga, ni kuja kutenda yindu yosope yakuyisaka jwalakwejo.