Detulonomo 12 - Chiyawo Bible

Malo gamo gakulambila

¹ “Aga ni malamusi gosope gamkwenela kugapikanila ndaŵi josope jitimkatame mcilambo citakampe AMBUJE,* Mlungu jwa acinangolo ŵenu.

² Patimkasumule yilambo ya ngosyo sinesyo, mkaja kulepela konanga malo gosope giŵaliji ŵanduwo kulambila milungu jawo, mpela pa matumbi gamalewu, ni pa matumbi gejipi, ni soni kusi kwa yitela yagudulila masamba gamajinji.

³ Mkagwisye malo gawo gosope gakupelecela mbopesi, soni mkagumulanye yipilala yawo yosope ya maganga yayijimice pa malo gawo gakulambila. Mkajoce cimanyisyo ca mlungu jwawo jwamkongwe jwakukolanjidwa Ashela. Mkakatanyekatanye milungu jawo jagumba, kuti pakutenda myoyo ŵandu ŵelewo akajakwawula soni kuja kulambila milungu jawo kumalo gelego.

⁴ “Mkaja kwalambila AMBUJE Mlungu jwenu mpela mwakusatendela ŵandu ŵeleŵa pakujilambila milungu jawo.

⁵ AMBUJE takasagule malo gamo mcilambo mwenu, ŵandu wosope takayiceje kukulambila pa malo gelego. Kweleko ni kutimkajawuleje.

⁶ Kweleko timkapelece yakupeleka ya kakumi, ni yakupeleka ya mtundu wine uliwose, soni mituka jine jimkusaŵika cilanga* kupeleka kwa Mlungu, yakupeleka yenu yamkusapeleka mwakusosa mwacimsyene, soni kupeleka ŵanace ŵandanda kupagwa ŵa ng'ombe ni ngondolo syenu.

⁷ Soni kumalo gelego, jemanja pamo ni maŵasa genu timkalye mwakusengwa yindu yambone yitimkagowoleje mcilambomo, pameso pa AMBUJE Mlungu jwenu, ŵele ŵitakampe jemanja upile.

⁸ “Patijiciyikana jele ndaŵijo, mkaja kutenda yindu mpela mumkutendela akunomu. Ligongo akuno jwalijose agamba kupopela mwakusacila, mpaka lelo jino,

⁹ pakuŵa nginimbe kwinjila ku cilambo cele cakumpa AMBUJE Mlungu jwenu, kwele kutimkatame mwa mtendele.

¹⁰ Pitimkajomboce Lusulo lwa Yolodani, AMBUJE Mlungu jwenu takamkunde jemanja kuti mkasumule cilamboco kuti mkatame mwelemo. AMBUJE takamcenjele kwa amagongo ŵenu wosope, kuti mkatame mcilambo celeco mwa mtendele.

¹¹ Jele ndaŵijo, AMBUJE Mlungu jwenu takasagule malo gamo gakuti ŵandu akamlambileje jwalakwe. Mkajawuleje kumalo gelego ni yindu yosope yinamlamulile yila, mpela mbopesi syenu syakutinisya, yakupeleka yenu ya calikumi, ni yakupeleka yenu ya mtundu wine, soni mituka jenu jine jimwaŵisile cilanga kupeleka kwa AMBUJE.

¹² Mkaŵe ŵandu ŵakusangalala pameso pa AMBUJE Mlungu jwenu, pamo ni ŵanace ŵenu, ŵamasengo ŵenu, soni Alefi ŵali m'musi mwenumo. Mkumbucileje kuti paja Alefi ngisapocela cilambo cawocawope.

¹³ Mkaja kupeleka mbopesi syenu kumalo gakulisosela mwacimsyene,

¹⁴ nambo mkapeleceje mbopesisyo kumalo gamope basi, gitakasagule AMBUJE mcilambo citakatame ŵamo ŵa lukosyo lwenu. Mkapeleceje mbopesi syenu syakutinisya kumalo gelegopego basi, soni kweleko ni kutimkatendeleje yindu yine yosope yingumlamulila kutenda.

¹⁵ “Mkaŵe ŵandu ŵagopoka kuwulaga yilangwa yenu ni kulya nyama jakwe, m'misi mutimkatamemo. Mkalyeje nyama mutimkasacile, kutyocela mu yilangwa yenu yitakampe AMBUJE. Mkalyeje ŵandu wosope, mwangaganicisya kuti aju ni jwakwenela kulya nawo, ligongo ali jwamswejele, mwakwayana ni msyungu wa mapopelo. Kapena kuti aju jwangajenela kulya nawo ligongo ali jwamsakale, malinga ni msyungu wetu wa mapopelo. Mkalyeje mpela mwele mumkalilile nyama ja ndandala kapena mbaŵala.

¹⁶ Nambo mkaja kulya miasi ja nyamasyo, mkajijitile pasi miasijo mpela mesi.

¹⁷ Ku misi jilijose jitimkatamejo mkaja kulya kandu kalikose kimkaganicisye kukapeleka mbopesi kwa AMBUJE. Mpela ca likumi ca tiligu jwenu, kapena ca finyo jwenu, kapena ca mawuta ga olifi.* Mkaja kulya ŵanace ŵandanda kupagwa ŵa ng'ombe ni ŵangondolo, soni ngaja kulya mituka jimŵisile cilanga kujipeleka kwa AMBUJE, kapena yakupeleka yenu ya mtendele, kapena yakupeleka yine yiliyose.

¹⁸ M'malo mwakwe jemanja, ŵanace ŵenu ŵamasengo ŵenu pamo ni Alefi ŵali m'misi mwenu, mkalyeje yakupeleka yosopeyi pameso pa AMBUJE Mlungu jwenu, pa malo gamo gitakaŵe ali agasagwile AMBUJE Mlungu jwenujo. Mkaŵeje ŵandu ŵakusangalala ku malo gelego ligongo amkwesisye jemanja pa yambone yosope yimkutenda.

¹⁹ Mkalolecesye kuti, ndaŵi josope jitimkatame mcilambomo, mkaja kwaliŵalila Alefi.

²⁰ “Pitakacikusye, AMBUJE Mlungu jwenu, cilambo cenu mpela muŵatendele cilanga. Naga lukuja kumkola lukowo, mkukomboleka kuja kulya nyama mutimkasacile.

²¹ Naga malo gamo gitakasagule AMBUJE Mlungu jwenu, kuti ŵandu akajawuleje kuja kulicimbicisya lina lyakwe, gali kwakutalicila ni musi ŵenu, mkukomboleka kuwulaga ng'ombe kapena ngondolo syele syampele AMBUJE, mpela mwele munamsalile mula. Mkalye nyamajo mutimkasacile m'musi mwenumo.

²² Mundu jwalijose jwamsakale mpela mwa msyungu wa mapopelo kapena jwangasakala, akomboleka kulya jele nyamajo, mpela mwele mwakalilile nyama ja ndandala kapena mbaŵala.

²³ Pakulya nyamajo mkasimlya miasi jakwe. Ligongo umi uli m'miasijo. Myoyo mkasimlya umi pamo ni nyamajo.

²⁴ Mkaja kulya miasi mpela cakulya, nambo mkajijitile pasi mpela mesi.

²⁵ Naga mkuja kulipikanicisya lilamusi lyeleli, AMBUJE takaŵe ŵakusengwa, nipo yindu tiyikamjendele cenene, jemanja pamo ni yisukulu yenu.

²⁶ Yakupeleka yenu pamo ni mituka jenu jimwaŵisile cilanga kupeleka kwa AMBUJE, yosopeyo mjawule nayo kuja kupeleka kumalo gakulambila gele gitakasagule AMBUJEWO.

²⁷ Kweleko mkapelece mbopesi syakutinisya, pa malo gakupelecela mbopesi sya AMBUJE. Mkapeleceje soni mbopesi syele sitimkalye nyama jakwe, ni mkajitile miasi jakwe pa malo gakupelecela mbopesi.

²⁸ Myipikanile mwakulupicika yosope yene yinamlamwile, mkatende yindu yambone yakwanonyelesya AMBUJE Mlungu jwenu, kuti yindu yikamjendele cenene jemanja pamo ni yisukulu yenu.

Akwakalamusya kuti akalambila milungu jine

²⁹ “AMBUJE Mlungu jwenu takasijonanje ngosyo sine, ndaŵi jitimkajinjileje mcilambo cawoco, timkacisumule cilamboco ni kutamilicika mwelemo.

³⁰ AMBUJE pitakasijonanje ngosyosyo, jemanja mli mkulola, mkaŵe ŵandu ŵakalamuka kuti mkaja kuya misyungu jamapopelo ja ŵandu ŵa ngosyo sinesyo. Mkaja kulinga kuwusya kuti, ‘Ana ŵandu ŵa ngosyo sinesi akulambila uli milungu jawo?’

³¹ Mkasimwalambila AMBUJE Mlungu jwenu, mwakulandana ni mwakujilambilila ŵandu ŵa ngosyo sine akujilambila milungu jawo. Jemanjajo akusatenda yindu yakusakala yele yakuŵengana nayo AMBUJE pa ndaŵi ja mapopelo gawo. Jemanjajo akusayikana mwakwataga mbopesi ŵanace ŵawo pa moto, pa malo gakupelecela mbopesi.

³² “Mlolecesye kuti mkutenda yosope yene yinamlamwileyi. Mkajonjecesya kandu kane kapena kutyosya kandu kane.