Detulonomo 1 - Chiyawo Bible

Maloŵe gandanda

¹ M'bukuji mwana maloŵe giŵaŵecete Mose* kwa Aisalaeli wosope, katema kiŵaliji mcipululu mcilambo ca Mowabu. Ŵataŵile masakasa gawo mwakuŵandikana ni msinda wa Sufi, pesi kungopoko lyuŵa kwa Lusulo lwa Yolodani. Msinda wa Palani waliji kumbali jine ja masakasago, nipo msinda wa Tofele, Labani, Haseloti ni Disahabu jaliji soni kumbali jine ja masakasagago.

² (Ulendo wa pasikati pa Litumbi lya Sinayi ni Kadeshi Baneya, kupitila litala lya cilambo ca matumbi ga Edomu, waliji wa masiku likumi ni limo).

³ Atamose kuti ulendo wakutyocela Kwitumbi lya Sinayi kwawula ku Kadeshi Baneya waliji wa masiku gamnono, Mose ŵatandite kwasalila malamusi gosope gaŵamlamwile AMBUJE* kuti ŵasalile Aisalaeli, ali ayice pesi pa Lusulo lwa Yolodani, mcilambo ca Mowabu, pa lisiku lyandanda lya mwesi wa 11, mcaka ca 40, cityocele Aisalaeliwo ku Iguputo.

⁴ Mose ŵaŵecete gele maloŵega ali apundile kumenyana ngondo jakulimbana ni acayimwene ŵaŵili, Mwenye Sihoni jwa Aamoli juŵatamaga ku Heshiboni, Mwenye Ogi jwa ku Bashani, ŵakwete misinda jiŵili ja ucimwene wakwe. Miesi jandanda ja caka jwalakwe ŵaliji mkutama mu msinda wa Ashitaloti ni miesi ja kumbesi kwa caka ŵaliji mkutama mu msinda wa Edileyi.

⁵ Mose ŵatandite kuwilisya kwasalila ŵandu ya malamusiga, ali ca kungopoko lyuŵa kwa Lusulo lwa Yolodani, mcilambo ca Mowabu. Ŵasasile ŵanduwo kuti,

⁶ “Pandaŵi jitwaliji Kwitumbi lya Sinayi, AMBUJE Mlungu jwetu, ŵatusalile uweji kuti, ‘Jemanja mtemi ndaŵi jelewu kwitumbi kuno.

⁷ Mpasulanye masakasa genu, mnyakuce ni mwutande ulendo. Mjawule kuja kutama ku cilambo ca matumbi ca Aamoli, ni cilambo ca Akenani, ŵali acalongo acimjawo Aamoliwo. Cilambo celeci cikutandila ku Ciŵata ca Lusulo lwa Yolodani, mungulugulu matumbi ga kungapilo lyuŵa yilambo ya kucipululu ca kum'mwela, ni mungulugulu Nyasa ja Mediteleniyani, cilambo ca matumbi ga ku Lebanoni, ni mpaka ku lusulo lwekulungwa lwa Yufuleti.

⁸ Celeci ni cilambo cingucipeleka kwa jemanja. Mkajinjile ni kutamilicika mcilambo cele une AMBUJE, Mlungu jwenu natesile cilanga* kuti tinjicipeleka kwa acinangolo ŵenu, Abulahamu,* Isaki ni Yakobo,* ni yisukulu yawo yosope.’ ”

Mose akwaŵika ŵakulamula

⁹ Mose ŵasalile soni ŵanduwo kuti, “Paja namsalile ndaŵi jejila kuti, ‘Nginawukombola uneji jika kuwutwicila ukumu ŵakulongolela jemanja.

¹⁰ AMBUJE, Mlungu jwenu amculwiye jemanja mpela ndondwa sya kwinani.

¹¹ AMBUJE, Mlungu juŵamlambilaga acinangolo ŵenu ampe upile wejinji ni kumculuya mnope mpela muŵaŵicile cilanga!

¹² Nambo tikombolece uli une jika kugatwicila masengo gakumlongolela jemanja, ni masengo gakulamula magambo genu?

¹³ Mwasagule ŵandu ŵane ŵalunda, pasikati pa mitundu jenu, ŵakupikanicisya ni ŵakumanyilila yindu cenene, une tinajigale ni kwaŵika kuti aŵe ŵakulongolela pasikati penu.’

¹⁴ Jemanja mwanjanjile kuti lwelelo luli lunda lwambone, uweji cituyitende yeleyo.

¹⁵ Myoyo une najigele ŵandu ŵalunda ni ŵakumanyilila yindu cenene, ŵele ŵimwasagwile kutyocela m'mitundu jenu, ni naŵisile kuti aloleleje ŵane ŵandu 1,000, ŵane ŵandu 100, ŵane ŵandu 50, soni ŵandu ŵane kuti aloleleje ŵandu likumi. Ŵandu ŵane nasagwile kuti aŵe nduna pasikati pa mitundu jenu.

¹⁶ “Ŵandu ŵane naŵisile kuti aŵe ŵakulamula magambo. Nagombelesye ndaŵi jejila ŵandu ŵenu ŵakulamula magambo kuti, ‘Mpikaneje magambo gali pasikati pa ŵandu ŵenu. Magambo galigose mgalamuleje cenene, kanga magambogo tigaŵe ga ŵandu ŵa mtundu wenu, kapena ga acalendo ŵamkutama nawo pasikati penu.

¹⁷ Mkasimtenda lusagu pakulamula magambogo. Mundu jwalijose kutandila mundu wamba kapena jwamkulungwa, mlamule magambo gakwe mwacilungamo, mwangalekanganya. Mkasimumjogopa mundu jwalijose, ligongo kulamula kwenu kwa magambo kuli kwakutyocela kwa Mlungu. Naga magambo gane gakumsawusya kulamula, myice nago kwa une, une tinjilamula gele magambogo.’

¹⁸ Ndaŵi jijojo, namsalile soni jemanja yindu yosope yakuti myitendeje.

Ŵandu ŵatumidwe kuja kukusonda cilambo

¹⁹ “Uweji twayitesile yindu yosope yiŵatulamwile AMBUJE, Mlungu jwetu kuti tuyitende. Twatyosile Kwitumbi lya Sinayi lila, ni twajesile mcipululu cacikulungwa soni cakogoya, cimwaciweni mwitala pitwajawulaga ku cilambo ca matumbi ca Aamoli. Pitwayice ku Kadeshi Baneya,

^20-21 une namsalile jemanja kuti, ‘Sambano tuyice ku cilambo ca matumbi ca Aamoli, cele AMBUJE Mlungu jwetu cakucilepeleka kwa uwe. Jwalakweju ali Mlungu jujojo juŵamlambilaga acinangolo ŵetu. Atusalile uweji kuti tujinjile ni kucijigala cilamboci, sambano jawulani mkatame mwelemo mpela mwele mwatulamulile. Mkajogopa ni mkatenda woga.’

²² “Nambo paja jemanja mwayice kwa une ni mwasasile kuti, ‘Kwende twatume kaje ŵandu akacilole cilamboco, kuti ayice kutusalila uweji litala lyambone lyakupitila, ni soni kuti ayice kutusalila mujiŵelele misinda jwa kweleko.’

²³ “Gele maloŵego uneji ganonyele, myoyo nasagwile ŵandu 12, mundu jumo pa lukosyo luli lose.

²⁴ Jemanjajo ŵajawile ku cilambo ca matumbi cila, mpaka ŵajile kwika ku Ciŵata ca Eshikolo, ŵacijendele ni kucilolecesya cilamboco.

²⁵ Pakuwuja ŵatujigalile yisogosi yiŵayisimene kweleko. Ŵatusalile kuti cilambo catupele uweji AMBUJE Mlungu jwetu, cana cajila.

²⁶ “Nambo jemanja nganimsaka kwawula kuja kwinjila mcilambomo, mwagajimucile Malamusi ga AMBUJE Mlungu jwenu.

²⁷ Mwagambaga kunyinyilika m'masakasa mwenu kuti, ‘AMBUJE akuŵengana ni uweji. Ni ligongo lyakwe ŵatukopwesye mcilambo ca Iguputo, kuti atupelece m'magasa ga Aamoli kuti atuwulaje.

²⁸ Ana cakwawulila uweji ku cilambo celeco ni cici? Soni acalongo acimjetu ŵaŵajawile kuja kwendela cilambo ŵala, atujogoyisye uweji pakutusalila kuti, ŵandu ŵali ku cilambo celeco ali ŵamacili, soni ali ŵalewulewu kutupunda uweji. Atusalile soni kuti misinda jili kweleko jili jajikulungwa mnope, jana mapupa gaskusyungulila misindajo jakwika mpaka kwinani. Soni akuti kweleko ŵayiweni yiŵandu yayikulungwa yakogoya, yisukulu ya Aanaki!’

²⁹ “Nambo une namsalile jemanja kuti, ‘Mkasimwajogopa ŵele ŵanduwo.

³⁰ AMBUJE Mlungu jwenu, ni ŵatamlongolele, soni ni ŵatakapute ngondo m'malo mwenu, mpela mumwawonele ku Iguputo kula,

³¹ ni mcipululu mula. Jemanja mkumanyilila cenene yiŵatesile AMBUJE pakumjendesya ni kumsamalila cenene pa ndaŵi jimwaliji mcipululu, mpaka amyicisye akuno, ŵamjigele mpela mwele jemanja mukusimumjigalila mwanagwenu.’

³² Atamose kuti uneji namsalile maloŵe gosopega, nambo jemanja nganimwakulupilila AMBUJE Mlungu jwenu,

³³ ŵele ŵiŵalongolelaga msogolo ndaŵi syosope pa ulendo ŵenu, kuti akampatile cile jemanja malo gakutaŵa masakasa genu. AMBUJEWO piŵajendaga pasogolo penu, ŵawonekaga mpela moto cilo, kuti am'mulicileje litala. Nambo musi ŵawonekaga mpela liwunde.

AMBUJE akwapa cilango Aisalaeli

³⁴ “AMBUJE piŵakupikene kunyinyilika kwenuko, ŵatumbile ni ŵalumbile kuti,

³⁵ ‘Ŵandu ŵa mpago wakusakala mnopewu, pangali mundu jwalijose jutakajinjile mcilambo ca cajila cele cinaŵisile cilanga kuti tinjicipeleka kwa acinangolo ŵenu.

³⁶ Nambo Kalebu mwanace jwa Yefune ni jutakajinjile mcilambomo. Jwalakweju atemi nditu mundu jwakulupicika kwa une. Cilambo ciŵajawile kucijendelaco tinacipelece kwa jwalakwe ni kwa yisukulu yakwe.’

³⁷ AMBUJE ŵandumbilile soni uneji ligongo lya jemanja. Ŵatite kuti, ‘M'mwejo soni Mose ngamjakwinjila cele cilambomo.

³⁸ Nambo jwakutumicila jwenu Yoswa, mwanace jwa Nuni, ni jutakajinjile. Mumlimbisye mtima Yoswajo, pakuŵa jwalakwejo ni jutacalongolela Aisalaeli pakwinjila mcilambomo.’

³⁹ “AMBUJE ŵatusalile wosopewe kuti, ‘Ŵanace ŵenu ŵamakandi ŵimwatite tacikamulwa ni amagongo ŵenu, soni ŵanace ŵenu ŵali ciŵela acanondinondi, ŵele ŵakakumanyilila kulekanganya yindu yambone ni yakusakala, ŵelewo ni ŵitakajinjile mcilambo celeco.

⁴⁰ Nambo jemanja mwujilile, mjawule ku cipululu, kwinjilila litala lyakuja ku Nyasa Jecejewu.’*

⁴¹ “Jemanja mwajanjile kuti, ‘Kweli uweji twalemwecesye AMBUJE. Nambo uweji sambano tukapute ngondo mpela mwatulamulile AMBUJE Mlungu jwetu.’ Myoyo jwalijose jwa jemanja ŵaliŵicile cile kuja kuputa ngondo, mli mkuganicisya kuti timkasumule cilambo ca ku matumbico mwangasawusya.

⁴² “Nambo AMBUJE ŵasalile uneji kuti, ‘Mwakalamusye jemanjajo kuti akasiŵatanda Aamoliwo, ligongo uneji ngasimba kumbali jawo, soni amagongowo takapunde pa ngondo.’

⁴³ Une namsalile jemanja yosope yiŵasalile AMBUJE, nambo nginimyitendela masengo. Mwajimucile AMBUJE, soni mwajile kwinjila mcilambo ca matumbico mli mkupoka.

⁴⁴ Aamoli ŵaŵaliji mkutama m'matumbimo ŵatulwice ni kumkusucila mpela nyuci. Ŵamtopwesye jemanja kutyocela ku Seyili mpakana ku Holoma. Ŵampundile pa ngondo ku cilambo ca matumbi ga Edomu.

⁴⁵ Myoyo jemanja mwadandawulile AMBUJE kuti amkamucisye, nambo AMBUJEWO nganampikanila.

Yaka yiŵatemi Aisalaeli ku cipululu

⁴⁶ “Myoyo twatemi ku Kadeshi ndaŵi jajilewu,