Daniele 9 - Chiyawo Bible

Daniele akwapopelela ŵandu ŵakwe

¹ Daliyasi mlukosyo jwa ku Amedi, mwanace jwa Ahasuwelo, ŵajinjile ucimwene wakulamulila cilambo ca Babiloniya.

² Mcaka candanda ca ucimwene wakwe, une Daniele, pakuŵalanga mabuku geswela, nasimene kuti papite yaka 70 msinda wa Yelusalemu uli masame. Yeleyi ni yiŵamsalile AMBUJE jwakulocesya* Yelemiya.

³ Pelepo napopesile kwa AMBUJE Mlungu, kwacondelela kwineku ndili ngangulya yakulya ndili mbwete ciguduli, soni ndili mbakele liwu.

⁴ Napopesile kwa AMBUJE, Mlungu jwangu, ni kwiticisya kuti twalemwisye nditu, twatite kuti, “Ŵalakwe AMBUJE, Mlungu jwamkulungwa ni jwakogoya, akusasunga mwakulupicika cilanga* cawo ni ŵandu ŵakusiŵanonyela ŵalakwe ni kusunga malamusi gawo.

⁵ “Uwe tulemwisye, tutesile yakusakala ni yakulemweceka. Twajimucile ŵalakwe pakuleka malamusi gawo ni upungu wawo.

⁶ Nganitwapikanila ŵakulocesya, ŵakutumicila ŵawo, ŵiŵaŵecetaga mu lina lyawo kwa ayimwene ŵetu, ŵakutulamulila ŵetu, acinangolo ŵetu ni kwa ŵandu wosope ŵa mcilambo.

⁷ Ŵalakwe AMBUJE, ali ŵakulungamika, nambo mpaka sambano jino situtesile soni uwe ŵandu ŵa ku Yuda, alukosyo ŵa ku Yelusalemu, ni ŵandu wosope ŵa ku Yelusalemu, ni ŵandu wosope ŵa ku Isalaeli, ŵa pakuŵandika ni ŵa kwakutalika, ku yilambo yosope kuŵatutopocesye, ligongo lya ungakulupicika wetu kwa ŵalakwe.

⁸ Ŵalakwe AMBUJE, soni siŵe kwa uwe ni ayimwene ŵetu, ŵakutulamulila ŵetu ni acinangolo ŵetu, ligongo lya ya upandu yitwatendele ŵalakwe.

⁹ AMBUJE, Mlungu jwetu, ŵalakwe ali ŵambone mtima soni ali ŵakululuka, atamose kuti twajimucile ŵalakwe.

¹⁰ Uwe nganitupikanila maloŵe gawo, ŵalakwe AMBUJE Mlungu jwetu, nginitukuya malamusi gawo giŵatupele ŵalakwe kupitila mwa ŵakulocesya ni ŵakutumicila ŵawo.

¹¹ Aisalaeli wosope ŵalemwecesye malamusi gawo, soni ŵajimucile, ni kukana kugapikanila malamusi gawo. Myoyo maloŵe ga malweso ni gakulumbila gelega galembedwe m'Malamusi ga Mose,* jwakutumicila jwa Mlungu, yitugwilile uwe ligongo lyakuti twalemwecesye.

¹² Ŵalakwe atesile yiŵaŵecetaga yakutusisya uwe, soni ya kwajamuka ŵakulamulila ŵandu.

¹³ Mpela muyalembedwele mu malamusi ga Mose, likungu litugwilile. Nambope nginitulinga kwaŵenda, ŵalakwe AMBUJE, Mlungu jwetu, kuti atusalalile mtima. Nginitupesya yakulemwa yetu soni nginitusamala maloŵe gawo gakuwona.

¹⁴ Ali ni ligongo lyakwe ŵalakwe AMBUJE ŵaliji cile kuti atugwicisye likungu lyeleli. Ŵalakwe AMBUJE, Mlungu jwetu, ŵalakwe ali ŵakulungamika pa yosope yatesile, nambo uwe nganitupikanila maloŵe gawo.

¹⁵ “Ŵalakwe AMBUJE, Mlungu jwetu, ŵakopwesye ŵandu ŵawo ku Iguputo ni ligasa lyawo lya macili, soni lina lyawo likupikanika mpaka sambano jino. Twalemwisye, ni kutenda yakusakala.

¹⁶ Ŵalakwe AMBUJE, malinga ni mtima wawo wakulungamika, tukuŵenda kuti, lutumbilo lwawo ni ukali wawo yityoce pa msinda wa Yelusalemu, litumbi lyawo lyeswela. Ŵandu ŵa myilambo yakusyungulila akusanyosya Yelusalemu ni ŵandu ŵawo, ligongo lya ulemwa* wetu ni yakusakala ya acinangolo ŵetu.

¹⁷ Ali ni ligongo lyakwe sambano, ŵalakwe Mlungu jwetu, apikane lipopelo lya jwakutumicila jwawo ni maloŵe gakwe gakudandawula. Sambano kuti wosope ŵamanyilile ŵalakwe kuti ali AMBUJE, alole ni canasa malo gawo geswela gigasandwice masame.

¹⁸ Ŵalakwe Mlungu jwangu, atejele lipikanilo kuti apikane maloŵe gangu. Awugule meso gawo kuti alole masame getu ni msinda wawukusamanyika ni lina lyawo. Tukupopela kwa ŵalakwe ligongo ŵalakwe ali ŵa canasa, ngaŵaga ligongo lyakuti uwe tuli ŵakulungamika.

¹⁹ Ŵalakwe AMBUJE, apikane maloŵe getu. AMBUJE atukululucile, atupikanile soni atendepo kandu, kuti ŵandu ŵamanyilile ŵalakwe kuti ali Mlungu. Akacelewa ŵalakwe Mlungu jwangu, pakuti msinda wawo ni ŵandu ŵawo ukusamanyika ni lina lyawo.”

Lilayika Gabuliele akugopolela ya kulocesya

²⁰ Naŵecetaga ni kupopela ni kwiticisya ulemwa wangu ni ulemwa wa Aisalaeli. Nacondelelaga pameso pa AMBUJE, Mlungu jwangu, pakukumbucila litumbi lyeswela lya Mlungu.

²¹ Ndili mkupopela myoyo, lilayika Gabuliele,* juŵambonecele kala pinaliji mkuyiwona yindu kupitila m'mesomkulola, ŵayice kwa une mwaguluka mwa liŵilo. Jaliji ndaŵi jakupeleka mbopesi ligulo.

²² Jwalakwejo ŵasalile kuti, “M'mwe Daniele, sambano yice kuti nimpe lunda, kuti mpikanicisye yindu.

²³ Pimwatandaga kucondelela kwenu, Mlungu jwajanjile, ni une yice kukumsalila yakuyicisya yakwe, pakuti Mlungujo akusamnonyela mnope. Ali ni ligongo lyakwe pakusosekwa kuti mgapikanicisye maloŵega, pingulondesya yindu yimwayiweni kupitila m'mesomkulola mula.

²⁴ “Yaka 49 yaŵicidwe kuti ŵandu ŵenu ni msinda wenu weswela alece ya upandu ni kuleka ulemwa ni yakusakala. Sambano yimwayiweni m'mesomkulola yila soni yiyalocesedwe tiyicitendekwa, nipo malo gamaswela gakulambila tigacitamilisidwa.

²⁵ Sambano m'manyilile ni mpikanicisye kuti kutyocela ndaŵi jijapikanice kuti msinda wa Yelusalemu ulinganyidwe soni mpaka pa ndaŵi jele ŵakulamulila ŵakusagulidwa taciyika. Timcitama kweleko yaka yakwana 434, nambo tipaciwoneka yisawusyo pa ndaŵi jelejo.

²⁶ Pakumala pa yaka yeleyi jwakusagulidwa jula taciwulajidwa mwangali cilungamo, nambo ngaŵaga ligongo lya jwalakwejo. Likuga lya ngondo lya mlongola jwamacili jutaciyika tilicijonanga msindawo pampepe ni Nyumba ja AMBUJE. Kumala kwakwe tikuciŵa mpela mesi gacikumba, soni tikuciyikasya conasiko ni ngondo, yele yiŵalinganyisye Mlungu.

²⁷ Mlongola jwelejo tacipangana ni ŵandu ŵajinji cilanga cakulimba kwa yaka msano ni yiŵili. Pitijicimala hafu ja ndaŵi jeleji, tacilekasya kupeleka mbopesi ni yakupeleka yine. Cakunyalaya cila taciciŵika penani pa nyumba jakupopelela, ticicitama pelepo mpaka juŵaciŵisilejo tapegwe cilango ni conasiko ciŵalinganyisye Mlungu.”