Daniele 8 - Chiyawo Bible

Mesomkulola ga Daniele ga ngondolo ja mkambako ni tonde

¹ Caka catatu ca ucimwene wa Belishesa, une Daniele nayiweni yindu kakwana kaŵili kupitila m'mesomkulola.

² M'mesomkulolamo nayiweni kuti naliji mu msinda wa Susa mdela ja Elamu. Nayiweni soni kuti naliji ku Lusulo lwa Ulayi.

³ Sambano pinalolite, najiweni ngondolo ja mkambako ja misengo jiŵili, jili jijimi mungulugulu mwa lusulolo. Misengo jiŵilijo jaliji jajilewu, nambo umo waliji wa ulewu kupunda ujakwe, nipo wamesile ujakwewo uli umesile kala.

⁴ Najiweni ngondolo jamkambakojo jilimkuwutuka ca kungopoko lyuŵa, ca kumpoto, ni ca kum'mwela. Paliji pangali cilombo cilicose campaka kulimbana najo, soni paliji pangali jwampaka kukulupusya kandu kwa jelejo. Myoyo jatendaga yijasakaga, ni kulosya macili gakwe mwakulikwesya.

⁵ Ndilimkuganisya yeleyi, najuweni tonde julimkutyocela ku ngapililo lyuŵa, jwapitaga pa cilambo capasi, jwaliji mkwenda ngaliŵata pasi. Jwakwete msengo wekulungwa sikati ja meso gakwe.

⁶ Mbusi ja mkambakojo jayice ciŵandika ni ngondolo ja mkambako jijakwete misengo jiŵili jila, jinajiŵeni jili jijimi pa ciko ca lusulo, nipo mbusijo jawutucile kujaliji ngondolojo mwa ukali.

⁷ Najiweni mbusijo jilimkulimbana ni ngondolojo mwa ukali, jajigundile ni kutemangula misengo jakwe jiŵili jila. Mbusi jila jajigwisisye ngondolojo pasi ni kujiliŵatila, ligongo ngondolojo jaliji jangali macili. Paliji pangali mundu jwakujikulupusya ngondolo jamkambakojo.

⁸ Sambano mbusi jila jatandite kulikwesya mnope ligongo lya macili gakwe. Nambo pa ndaŵi jigakusile macili gakwe mnope, msengo wakwe wekulungwa ula watemangwice, pa malopo pamesile misengo jine mcece jekulungwa, jakulosya ku mbungo mcece syosope.

⁹ Pa jimo mwa misengo mcecejo pasipwice kamsengo kane kamwana, kele kakakusile kulosya kum'mwela ni kungapilo lyuŵa nambo soni ku cilambo cakusangalasya cila.

¹⁰ Msengowo wakusile mnope mpaka kuja kwika ku makuga ga ngondo gakwinani. Jagwisisye makuga gane ga ndondwa ni kusiliŵatila.

¹¹ Jatandite kulikwesya mnope nditu, mpaka jasosaga kulimbana ni mwenye jwa makuga gakwinani. Jamasisye mbopesi sisyapelecedwaga lisiku ni lisiku, nambo soni jagwisisye nyumba jakupopelela jwakulamulila.

¹² Makuga gakwinani gala gapundidwe ni jwalakwe. Mbopesi syakupeleka sya lisiku ni lisiku syakupesya ulemwa* ŵasimasisye nambo soni ŵagwisisye kwamtundu dini jakuwona. Iyayi, msengowo ŵapundile nditu pa yosope yiŵatendaga.

¹³ Sambano napikene jwamswela jwine alimkuŵeceta. Jwamswela jwine soni jwamwusisye juŵaŵecetagajo kuti, “Ana tiyicimala cakaci yinguyiwona m'mesomkulolayi? Ana mbopesi sya lisiku ni lisiku tacisikanya mpaka cakaci? Nambi cindu cakogoyaci ticicitama mpaka cakaci? Ana malo gamaswela ni makuga ga ngondo gakwinanigo tacileka kwaliŵatila cakaci?”

¹⁴ Jwinejo jwajanjile kuti, “Tiyicitendekwa kwa ndaŵi jakwana 2,300 m'magulo ni kundaŵi. Pasogolo pakwe malo gamaswela tigaciwujilila mpela mugaŵelele kala.”

Lilayika Gabuliele akulondesya ya kugopolela kwa mesomkulolago

¹⁵ Une Daniele natiji kuti naga nguyiwona yindu m'mesomkulola, nalingaga kuti niyipikanicisye. Ndili mkutenda myoyo mwacisisimucisya nam'weni jwine jwakuwoneka mpela mundu jwamlume, ali ajimi kusogolo kwangu.

¹⁶ Kaneko napikene liloŵe lya mundu jwamlume kutyocela pasikati pa yiko ya Lusulo lwa Ulayi. Liloŵelyo lyatite kuti, “M'mwe Gabuliele,* mumgopolele mundujo yiŵayiweni m'mesomkulolayo.”

¹⁷ Myoyo Gabulielejo jwayice kunajimi une. Ali ayice, woga wangamwile, nipo naligwisisye camakuku. Nambo jwalakwejo ŵasalile kuti, “M'mwe mwanace jwa mundu, mpikanicisye kuti yimwayiweni m'mesomkulolayo yikuŵeceta ya ndaŵi jakumalisya.”

¹⁸ Ali mkuŵeceta myoyo, une naligwisisye pasi camakuku, ndaŵi jijojo nagonile lugono, nambo jwalakwe jwangwayiye ni kundamika soni pasi.

¹⁹ Sambano jwasalile kuti, “Cinim'manyisye yitiyicitendekwa luli lumasile lutumbilo, pakuti yeleyi yili ya ndaŵi jakumalisya.

²⁰ “Ngondolo ja mkambako ja misengo jiŵili jimwajiweni jila, jikugopolela ma ucimwene ga Mediya ni ga Pelesiya.

²¹ Tonde jula jukwimilila ucimwene wa ku Gilisi, nipo msengo wekulungwa wa pasikati pameso ula ni mwenye jwandanda.

²² Kuŵeceta ya msengo uwatemangwice ula, wele pa malo pakwe pamesile misengo mcece, ni kuti mcilambo cakweco timucipagwa ma ucimwene mcece, nambo macili gakwe ngasigalandana ni ucimwene wandanda ula.

²³ “Pa masiku gambesi ga ma ucimwenego, ulemwa wawo uli ugumbele mwakupundanganya, tipaciyika mwenye jwine jwakusakala mtima, soni jwakalamuka mnope.

²⁴ Macili gakwe tigaciŵa gekulungwa, nipo tacijonanga kwakogoya. Tacipunda pa yosope yitaciyitenda. Tacajonanga ŵandu ŵamacili nambo soni ŵandu ŵaswela mtima.

²⁵ Ligongo lyakukalamuka kwakwe mnope, taciyikombola yeleyi pakuŵeceta ya unami nipo mtima wakwe ucilikwesya. Tacijonanga ŵandu ŵajinji mkaniŵakalamusye cile. Tacimjimucila jwakulamulila jwa ŵakulamulila wosope. Nambo tacijonasika, ngaŵagatu ni macili ga mundu.

²⁶ Yimwayiweni yakwayana ni kwigulo ni kundaŵi yila yili yakuwona. Yinduyi ngayitendekwa sampano, myoyo mkasimumsalila jwalijose.”

²⁷ Sambano une Daniele, macili gamalile, nipo nalwasile kwa masiku gane. Kaneko najimwice ni kwawula kwa mwenye kukukamula masengo. Nambo yinayiweni yila yasawusyaga mu mtima nipo nganingombola kuyipikanicisya.