Daniele 7 - Chiyawo Bible

Daniele akuyiwona yindu kupitila m'mesomkulola ( 7:1—12:13 ) Mesomkulola ga Daniele ga yilombo mcece

¹ Caka candanda ca ucimwene wa Belishesala jwa ku Babiloniya, Daniele ali agonile pa cindanda cakwe jwasagamile sagamisi nipo ŵayiweni yindu mu sagamisisyo. Myoyo ŵalembile sagamisisyo mwakata ni ŵaŵecete kuti:

² Une Daniele nayiweni yindu ku lugono cilo. Najiweni nyasa jekulungwa mnope, jili jiwunukulidwe ni mbungo mcece sya kwinani.

³ M'nyasamo mwakopwece yilombo mcece yekulungwakulungwa yakulekanganalekangana.

⁴ Cilombo candanda caliji mpela lisimba, nambo cakwete mapapiko mpela ga nyanga. Une pinaliji mkulola mapapiko gakwe gatyosile, nipo cilomboco ŵacinyakwile ni kucijimika ni sajo syakwe siŵili mpela mundu. Ŵacipele nganisyo mpela lwa mundu.

⁵ Cilombo caŵili caliji mpela cimbala ngondo. Caliji cenyakuce mbali jimo, mkamwa mwakwe mwaliji mwana mbalati sitatu pasikati pa meno. Nipo ŵacilamwile kuti, “Mjimuce, mlye nyama jejinji mutimsosele.”

⁶ Pinaliji mkulola myoyo, naciweni cilombo cine mpela cisuŵi, cili cikwete mapapiko mcece ga cijuni pa mgongo pakwe. Cilombo celeci cakwete mitwe mcece, nipo ŵacipele macili gakulamulila.

⁷ Pinaliji mkulola yeleyi ku lugono cilo, naciweni soni cilombo ca mcece cakutesya woga, cakogoya mnope, soni ca macili mnope. Cakwete meno gekulungwa ga cisyano. Catiji kuti naga cipwepwetile, ni kulya kaneko capondelesyaga yosope yakusigala. Calekanganaga ni yilombo yosope yandanda yila, pakuti calakweco cakwete misengo likumi.

⁸ Pinaliji mkuganisya ya misengojo, nawuweni msengo wine wamwana ulimkumela pasikati pa misengojo. Misengo jitatu mwa jandanda jila ŵajicuŵile kuti jinejo jipate mpata. Pa msengo welewu paliji pana meso mpela ga mundu nambo soni pakamwa, pipaŵecetaga yakulikwesya.

Mesomkulola ga jwine juŵaliji jwa citamile mpaka kalakala

⁹ Pinaliji mkulola, nayiweni kuti yitengu ya ucimwene yikuŵicidwa pa malopo. Nipo jwine juŵaliji jwa citamile mpaka kalakala jula jwatemi pa citengu cimo. Yakuwala yakwe yaliji yeswela mpela litonji, soni umbo syakwe syaliji mpela manyunya ga ngondolo. Citengu cakwe cicaŵicidwe pa yitungulu ya moto wakogoya, yaliji mkolela,

¹⁰ nipo lusulo lwa moto lwakopwece ni kwendaga pasogolo pakwe. Paliji pana likuga lyejinji lya ŵandu ŵakumtumicila jwalakwejo, nambo soni paliji pana likuga line lyejinji mnope lya ŵandu kupunda linelyo lilyajimi pameso pakwe. Sambano nganya jatemi kuti jitande magambo nipo mabuku gawugulidwe.

¹¹ Pinaliji mkulola, nalijipe ciŵela kupikana kwa maloŵe gakulikwesya ga msengo. Ndili mkulola myoyo, cilombo camcece cila cawulajidwe nipo cilu cakwe caponyedwe pa moto ni cajonanjidwe.

¹² Yilombo yine yakusigalila yila, ŵayisumwile macili, nambope ŵayikundile kuti yitame cijumi kwa kandaŵi.

¹³ Pinalijipe mkulola yindu cilo kupitila m'mesomkulola, nam'weni jwine jwakulandana ni mundu. Ali mkutuluka m'mawunde ga kwinani. Jwalakwejo pijwaŵandicile, Jwamkulungwa juŵaliji jwa citamile mpaka kalakala jula, ŵandu ŵane ŵampelece jwalakwejo kwa Jwamkulungwajo.

¹⁴ Ŵapegwile ulamusi, lumbili ni ucimwene, kuti ŵandu ŵa mitundu josope, ngosyo syosope ni ŵa yiŵeceto yakulekanganalekangana amtumicileje jwalakwejo. Ulamusi wakwe uli wa mpaka kalakala, ucimwene wakwe ngisiwumala soni ngasiwujonasika.

Mesomkulola gala gakugopoleledwa

¹⁵ Une Daniele, nalasile mnope mu mtima mwangu, nipo yinayiweni m'mesomkulola yandesisye woga.

¹⁶ Napite kwa jumo juŵajimi pelepo nipo namŵendile kuti angopolele mate ga yeleyi. Myoyo ŵalondecesye ni kusalila gopolela kwakwe.

¹⁷ Jwalakwejo jwatite “Yilombo mcece yekulungwa yila yili ayimwene mcece ŵitaciwoneka pa cilambo capasi.

¹⁸ Nambo ŵaswela mtima ŵa Mlungu Jwakupunda yosope tacipocela macili ga ucimwene, nipo tacitama nago mpaka kalakala, ku ndaŵi syangamala.”

¹⁹ Sambano nasacile kumanyilila gopolela kwa cilombo ca mcece cila, cicaliji cakulekangana ni yijakwe yosope, cakogoya mnope, ca meno ga cisyano ni yikalaŵesa ya cisyano ca bulonsi, yele yiŵatiji kuti naga apwepwete, ni kulya, ni kupondelesya yosope yakusigala ni sajo syakwe.

²⁰ Nasacile soni kumanyilila gopolela kwakwe kwa misengo likumi ja pa mtwe pakwe jila, nambo soni ya msengo uwakwete meso ni pakamwa pakuŵeceta yindu ya kulikwesya, soni wawonekaga wekulungwa kupunda jine josope.

²¹ Pinaliji mkulola, msengowo watesile ngondo ni ŵandu ŵaswela mtima, ni ŵapundile jemanjajo,

²² mpaka pa ndaŵi jele, jwine juŵapali citamile jula jwayice. Sambano kulamula kwajendele cenene ŵaswela mtima ŵa Mlungu Jwakupunda yosope. Pelepo ndaŵi jakwanile kuti ŵaswela mtimawo apocele macili ga ku ucimwene.

²³ Sambano ŵanjanjile kuti: “Cilombo camcececo cikulosya ucimwene wamcece wele wawuciwoneka pa cilambo capasi nipo tiwuciŵa wakulekangana ni ma ucimwene gane. Tiwucipunda cilambo cosope capasi ni kucipondelesya ni kucipwanya.

²⁴ Misengo mcece jine jikulosya ma ucimwene likumi gele tigacikopoka mu ucimwene welewu. Panyuma pakwe tipaciyika mwenye jwine jwakulekangana ni ayimwene wosope ŵakala. Jwalakwejo tacapunda ayimwene ŵatatu.

²⁵ Taciŵeceta yakusisyana ni Mlungu Jwamaciligosope, nipo tacalagasya ŵakumlambila Mlungujo. Tacilinjilila kucenga masiku ga yindimba ni malamusi ga dini. Ŵaswela mtima ŵala tacilamulidwa ni mwenye jweleju pa ndaŵi jakwana yaka yitatu ni hafu.

²⁶ Pa nganya ja magambo tacilamulidwa, nipo tacimsumula ucimwene wakwe kuti pambesi pakwe ujonasice ni kuwumasya kusyesyene.

²⁷ Ucimwene, ulamusi, ni ukulungwa wa ayimwene wosope pasi pano tiyicipelecedwa ku mpingo wa ŵaswela mtima ŵa Mlungu Jwakupunda yosope. Ucimwene wawo tiwuciŵa wa mpaka kalakala, wakulamulila wosope ŵa pa cilambo capasi tacatumicilaga ni kwapikanila jemanjajo.”

²⁸ Yindu yimalile pepano. Nambo une Daniele wangamwile woga mnope, nipo ngope jangu jatesile mbuu, nambope nakumbucilaga yeleyi mu mtima mwangu.