Daniele 6 - Chiyawo Bible

Daniele mwisimbo lya masimba

¹ Mwenye Daliyasi ŵasangalele ni ŵaganisisye yakusagula ŵakulamulila 120 kuti alamulileje ni kulolela ma upande gosope ga mu ucimwene wakwe.

² Kupwatika pelepo, ŵamsagwile Daniele ni ŵandu ŵane ŵaŵili kuti ŵaloleleje ŵakulamulilawo ni kulolecesya kuti yindu ya mwenye yisunjice cenene.

³ Mwandaŵi jamnono, Daniele jwalosisye kuti mpaka apakombole kamula cenene masengo gakwe kwapunda ŵakulamulila wosope ŵala, pakuti jwalakwejo jwakwete lunda mnope. Myoyo mwenye ŵasimicisye yakuti Daniele aŵe jwakulamulila cilambo cosope.

⁴ Pakuyiwona yeleyi, nduna ni ŵakulamulila acimjakwe ŵatandite kumsosela Daniele cileŵi pa yijwatendaga pakwendesya cilamboco. Nambo nganamsimana ni cileŵi cilicose ligongo Daniele jwaliji jwakulupicika, nipo nganatendaga yakulemwa kapena yakusakala yiliyose.

⁵ Jemanjajo ŵaŵecetene kuti, “Ngatumsimana ni cileŵi cilicose Daniele akaŵe ngani jakwayana ni dini jakwe.”

⁶ Myoyo ŵajawile kukuwonegana ni Mwenye Daliyasi, ni ŵamsalile kuti, “Wawo mwenye aŵe cijumi mpaka kalakala.

⁷ Wosopewe ŵitukwendesya ucimwene wawo, nduna syekulungwa, ni sya ŵana, apungu ni mabwanamkubwa, tukamulene kuti ŵalakwe mwenye atamilisye lilamusi lyamacili lyakuti ŵandu wosope alikuyeje. Ŵalakwe alamule kuti kwa masiku 30 mundu jwalijose akasimanikwa ali mkupopela kwa mlungu jwalijose kapena mundu jwine jwalijose, akaŵe kwa wawo jikape basi. Jwalijose jwakasa lilamusili aponyedwe mwisimbo lya masimba.

⁸ Sambano wawo mwenye, atamilisye lilamusi lyeleli, alembe kuti lili lilamusi, myoyo pakukuya malamusi ga Amedi ni Apelesi gele gangaŵa mkucenga, ali soni tiliŵe lyangacenga.”

⁹ Myoyo Mwenye Daliyasi ŵatamilisye ni kulilemba lilamusili.

¹⁰ Daniele piŵapikene kuti lilamusi lyeleli alitamilisye, jwalakwe jwajinjile m'nyumba jakwe mcipinda ca mwinani. Cipindaci cakwete mawindo gakulolegana ni Yelusalemu. Jwalakwejo jwaliji mkutindiŵala ni kupopela mcipindamo katatu pa lisiku kaneko ni kumtogolela Mlungu jwakwe, mpela mujwatendelaga kala kosope.

¹¹ Amagongo ŵakwe piŵamwonaga jwalakwejo ali mkupopela kwa Mlungu

¹² jemanjajo ŵajawulaga kwa mwenye ni kuŵeceta najo kuti, “Wawo mwenye, ana ngaŵa ŵalakwe ŵaŵaŵisile lilamusi lyakuti mundu jwalijose akapopela kwa mlungu kapena mundu jwalijose akaŵe kwa wawope kwa masiku 30, soni jwakusimanikwa ali kutenda yeleyo taciponyedwa mwisimbo lya masimba?” Mwenyejo jwajanjile kuti, “Yisyene ni m'momo. Lilamusi lya Amedi ni Apelesi ngaŵa mkulicenga.”

¹³ Ŵanduwo ŵasalile mwenyewo kuti, “Daniele jumo mwa acikapolo ŵa ku Yuda ŵala, akasile lilamusi liŵaŵisile wawojo lila. Jwalakweju akusapopela kwa Mlungu jwakwe katatu pa lisiku.”

¹⁴ Mwenye piŵapikene yeleyi, yasawisye mnope mu mtima. Jwatandite kuganisya yakumkulupusya Daniele, nipo jwalinjile kutenda yeleyi mpaka lyuŵa kutiŵila.

¹⁵ Pelepo acalumewo ŵapangene ndaŵi jakuti akawonegane soni ni mwenye. Ŵasalile mwenyewo kuti, “Mwenye, akumbucile kuti pangali lilamusi lyelembedwe lya Amedi ni Apelesi lyampaka kulicenga, atamose ni wawojo.”

¹⁶ Myoyo mwenye jwalamwile kuti akamjigale Daniele ni kuja kumponya mwisimbo lya masimba. Nambo pelepo mwenye jwamsalile Daniele kuti, “Mlungu jwenu jumkusamkulupilila ndaŵi syosope amkulupusye.”

¹⁷ Ŵajigele liganga ni kuwugalila pesimbopo, nipo mwenyejo jwamatile cimanyisyo cakwe ni ca acakulungwa ŵakwe, kuti jwine akasacenga cilicose pa ya Daniele.

¹⁸ Mwenye jwawujilile ku nyumba jakwe, nipo jwatemi cilo cosope ngalya kandu, nganajiticisya soni yakusangalasya yiliyose. Cilo celeci nganagona.

¹⁹ Kundaŵindaŵipe, mwenyejo jwajimwice, nipo ŵapite kwisimbo lya masimba lila mwakwanguya.

²⁰ Ali ayice ciŵandika ni lisimbolyo, ŵamŵilasile Daniele kuti, “Daniele jwakutumicila jwa Mlungu jwacijumi! Ana Mlungu jwenu jumkusamtumicila ndaŵi syosope amkulupwisye ku masimba?”

²¹ Daniele jwajanjile kuti, “Mwenye, akole umi welewu mpaka kalakala!

²² Mlungu jwangu jwatumile lilayika lyakwe kuti liwugale pakamwa pa masimbaga, nipo nganilimbutusya kose, ligongo Mlungu jwambweni kuti une jwangalemwa nipo soni nganinalemwecesya wawo mwenye.”

²³ Mwenyejo jwasangalele mnope, nipo ŵalamwile kuti Daniele amkoposye mwisimbomo. Myoyo ŵamkopwesye Daniele ali jwangapwetecedwa amta panandi, pakuti jwalakwejo jwakulupilile Mlungu jwakwe.

²⁴ Myoyo mwenye jwalamwile kuti akakamule ŵandu uŵasisyaga ya Daniele ŵala ni kwaponya mwisimbo lya masimba lila, jemanjajo pamo ni aciŵamkwawo ni ŵanace ŵawo wosope. Ali ŵaponyisye mwisimbomo, mkanayice pasi kose, masimba gasumbile mwinani ni kwakasanya mawupa gawo.

²⁵ Ndaŵi jelejo Mwenye Daliyasi jwalembele yikalata kwa ŵandu ŵa mitundu josope, ngosyo syosope ni yiŵeceto yakulekanganalekangana pa cilambo cosope capasi, jwatite kuti, “Mtendele uŵe wejinji pasikati pa jemanja!

²⁶ Nguŵika lilamusi lyakuti, ŵandu wosope ŵa mu ucimwene wangu amjogope ni kumcimbicisya Mlungu jwa Daniele. Jwalakwe ali Mlungu jwa umi ni jwa mpaka kalakala, macili ga ucimwene wakwe ngasigajonasika, ulamusi wakwe ngasiwumala mpaka kalakala, soni macili gakwe ngasimala.

²⁷ Jwalakwejo akusawombola ni kukulupusya, akusatenda yimanyisyo ni yakusimonjesya, kwinani ni pa cilambo capasi. Jwalakwejo ni jwamkulupwisye Daniele ku macili ga masimba.”

²⁸ Myoyo Daniele jwapatile ucimbicimbi pa ndaŵi ja ucimwene wa Daliyasi ni Sailasi jwa ku Pelesiya.