Daniele 3 - Chiyawo Bible

Nebukadinesa akumlamula jwalijose kuti alambileje mlungu jwakupanganya

¹ Mwenye Nebukadinesa ŵakwete mlungu jwakupanganya ni yala jwa golidi.* Mcijipi mwakwe mwaliji mamita gatatu. Ŵamjimice m'Ciŵata ca Dula, mu upande wa Babiloni.*

² Myoyo ŵatumisye maloŵe kuti asonganye nduna, apungu, ŵakusunga yipanje, ŵakulamula, ayimwene ni acakulungwa ŵane wosope ŵa m'madela ga mcilambomo kuti ayice kukutenda msyungu wakupeleka mlungu jwakupanganya ni yala jwele juŵamjimice Mwenye Nebukadinesa.

³ Myoyo acakulungwakulungwa ŵane ŵala, nduna, apungu, ŵakusunga yipanje, ŵakulamula magambo ni ayimwene ŵasongene pamo pameso pa mlungu jwakupanganya ni yala jwele juŵamjimice Mwenye Nebukadinesa.

⁴ Sambano jwakulalicila jwaŵecete mwakwesya maloŵe kuti, “Jemanja ŵandu ŵa mitundu josope, ŵa yiŵeceto yakulekanganalekangana, jemanja mkulamulidwa kuti

⁵ pitimpikane kulila kwa lipenga, yitolilo, micekece ni kwimba kwa mtundu wine uliwose, timligwisye camakuku, nipo timumlambile mlungu jwakupanganya jwa golidi jwamjimice Mwenye Nebukadinesajo.

⁶ Jwalijose jwangaligwisya camakuku ni kumlambila mlungujo, taciponyedwa mu ng'aso jamoto.”

⁷ Myoyo ŵandu wosope piŵapikene kulila kwa yida yakwimbila yila, ŵaligwisisye camakuku, nipo ŵamlambile mlungu jwakupanganya jwa golidi juŵamjimice Mwenye Nebukadinesajo.

Acimjakwe ŵatatu ŵa Daniele akwajimba magambo ligongo lya ungapikanila wawo

⁸ Ndaŵi jelejo Ababiloni ŵakusakala mitima ŵapatile mpata wakwasisya Ayuda.

⁹ Ŵamsalile Mwenye Nebukadinesa kuti, “Akole umi welewu, mwenye.

¹⁰ Wawo mwenye, alamwile kuti mundu jwalijose pitapikane kulila kwa lipenga, yitolilo, micekece ni kwimba kwa mtundu wine uliwose, aligwisye camakuku, nipo amlambile mlungu jwakupanganya jwa golidiju.

¹¹ Nipo jwangatenda yeleyi, aponyedwe mu ng'aso jamoto.

¹² Pana Ayuda ŵane, Shadileki, Misheki ni Abedenego ŵimwaŵisile kuti aloleleje masengo ga dela ja Babiloni. Ŵandu ŵeleŵa ngakulilondesya lilamusi lya ŵalakwe, ngakujitumicila milungu ja ŵalakwe, nipo soni ngakumlambila mlungu jwakupanganya jwa golidi juŵamjimice ŵalakwe jula.”

¹³ Sambano Nebukadinesa ŵapile mtima mnope, ni ŵaŵilasisye Shadileki, Misheki ni Abedenego. Nipo ŵayice nawo pameso pa mwenye.

¹⁴ Nebukadinesa ŵawusisye kuti, “Jemanja Shadileki, Misheki ni Abedenego, ana yili yakuwona kuti mkukana kutumicila milungu jangu ni kulambila mlungu jwakupanganya jwa golidi junamjimice jula?

¹⁵ Naga mli cile kuti pitimpikane kulila kwa lipenga, yitolilo, micekece ni kwimba kwa mtundu wine uliwose, timligwisye camakuku, nipo timumlambile mlungu junamjimice, cambone. Nambo naga ngakumlambila, cimponyedwe mu ng'aso jamoto. Nipo pangali mlungu jwine jwalijose jwampaka amkulupusye myala mwangu.”

¹⁶ Shadileki, Misheki ni Abedenego ŵasalile Mwenye Nebukadinesa kuti, “Nganikuŵa kwakusosekwa kuti twajanje pa ngani jeleji.

¹⁷ Mlungu jutukusamtumicila uwe komboleka kutukulupusya mu ng'aso jamoto nipo soni m'myala mwa ŵalakwe, mwenye.

¹⁸ Nambo soni atamose Mlungu jwetujo akatukulupusya, amanyilile mwenye kuti ngasitujitumicila milungu jawo, kapena kulambila mlungu jwa golidi jwakupanganya juŵamjimice ŵalakwejo.”

Acimjakwe ŵatatu wa Daniele akwapa cilango cakuwulajidwa

¹⁹ Pelepo Mwenye Nebukadinesa ŵapilile mtima Shadileki, Misheki ni Abedenego, nipo ngope jakwe jasandwice ni ukali. Jwalamwile kuti ng'aso jamoto ajikwisile kasano ni kaŵili kupunda masiku gosope.

²⁰ Jwalamwile soni ŵane mwa ŵandu ŵakwe ŵamacili ŵa mlikuga lya ngondo kuti ŵataŵe Shadileki, Misheki ni Abedenego ni kwaponya mu ng'aso ja motojo.

²¹ Myoyo asilikali ŵataŵile acacanda ŵatatuwo ni kwaponya mu ng'aso jamoto ali awete yakuwala yawo yosope, mikanjo, yisoti ni yakuwala yine yosope.

²² Ligongo lyakuti lilamusi lya mwenyelyo lyaliji lyagombelesya mwamacili nipo kuti ng'asojo jaliji jamoto mnope, asilikali uŵanyakwile Shadileki, Misheki ni Abedenego ŵawulajidwe ni lilamba lyamoto lilyakopokaga mu ng'asomo.

²³ Sambano acacanda ŵatatuwo, Shadileki, Misheki ni Abedenego ŵagwile pasikati pa ng'aso ja motojo ali ŵataŵidwe.

²⁴ Mwacisisimucisya, piŵaliji mkulola yeleyi, Mwenye Nebukadinesa ŵasimonjile. Ŵajimi ni kusiwusya nduna syakwe kuti, “Ana ngaŵaga twaponyisye ŵandu ŵatatu mu ng'asomu ali ŵataŵidwe?” Jemanjajo ŵajanjile kuti, “Ni myoyo mwenye.”

²⁵ Mwenyewo ŵatite kuti, “Nambope ngwawona ŵandu mcece alimkwenda m'moto mwa mtendele, ngapya. Nipo mundu jwamcecejo akuwoneka mpela mwanace jwa milungu.”

Ŵandu ŵatatu ŵala akwagopola ni kwakwesya pa ma ukumu gawo

²⁶ Kaneko Nebukadinesa ŵasejele kumlango wa ng'aso jamoto jila, ni ŵaŵilasile kuti, “Shadileki, Misheki ni Abedenego, ŵakutumicila ŵa Mlungu Jwakupunda yosope, kopokani myice akuno.” Papopo Shadileki, Misheki ni Abedenego ŵakopwece m'motomo.

²⁷ Nipo ŵakulamulila ŵala, acibwanamkubwa ni apungu ŵa mwenye ŵasongene mwakwasyungulila acacanda ŵatatu ŵala, nipo ŵaweni kuti nganapya ni motowo. Umbo syawo nganisikwinyata, yakuwala yawo nganiyipya nipo ngananungaga lyosi amta panandi.

²⁸ Pelepo Nebukadinesa ŵatite kuti, “Acimbicikwe Mlungu jwa Shadileki, Misheki ni Abedenego. Atumisye lilayika lyakwe kukwakulupusya ŵakutumicila ŵakusamkulupilila, ni kukana kupikanila lilamusi lya mwenye. Jemanjajo ŵalipelece ku ng'aso jamoto ligongo lyangasosa kutumicila ni kulambila mlungu jwine jwalijose, akaŵe Mlungu jwawope.

²⁹ “Sambano ngutamilisya lilamusi ali: Mundu jwine jwalijose, jwa ngosyo kapena ciŵeceto cine cilicose, naga akunyosya Mlungu jwa Shadileki, Misheki ni Abedenego, tinjimpaculapacula nipo nyumba jakwe tinjijitenda kuŵa masame. Pangalitu mlungu jwine jwalijose jwampaka akulupusye ŵandu mwa litala lyamti myiyi.”

³⁰ Nipo mwenye ŵakwesisye pa ukumu Shadileki, Misheki ni Abedenego ku upande wa Babiloni.