Daniele 12 - Chiyawo Bible

Ndaŵi jakumalisya

¹ “Pa ndaŵi jelejo lilayika lyekulungwa Mikaele,* jwakusiŵalondela ŵandu ŵenu, taciyika. Ndaŵi jelejo tijiciŵa ja yisawusyo yakogoya yamkaniyiwoneceje kala kosope, ali ampangenye mundu. Pa ndaŵijo ŵandu ŵenu tacikulupuka, wosope ŵele mena gawo galembedwe m'buku ja Mlungu.

² Ŵajinji mwa ŵagonile mwitaka tacijimuka. Ŵane tacapa umi wangamala,* ŵane tacipocela soni ni cilango cangamala.

³ Ŵandu ŵalunda tacilanguka kuti mbee mpela kwinani. Nipo ŵele ŵiŵalongolele ŵandu ŵajinji mu litala lya cilungamo tacilanguka mpela ndondwa mpaka kalakala.

⁴ “Nambo m'mwe Daniele, msunje maloŵega mwa asili, nipo m'mate bukuji mpaka ndaŵi jakumalisya. Ŵandu ŵajinji taciwutucila aku ni aku, nipo umanyilisi tiwucikulilakulila.”

⁵ Sambano une Daniele pakulola, naweni ŵandu ŵaŵili ali ajimi, jwine lisi alino lya lusulo, jwine lisi alyo.

⁶ Jumo jwa jemanja jwamwusisye mundu juŵawete yakuwala ya bafuta juŵajimi kumkuli kwa mesi ga mu lusulomo kuti, “Ana yindu yakusimonjesyayi tiyicimala cakaci?”

⁷ Mundu jwawete yakuwala ya bafuta juŵaliji kumkuli kwa mesi, jwakwesisye ligasa lyakwe lya kumlyo ni lya kumciji kwinani, nipo nampikene ali mkulumbila pakolanga lina lya Jwakutama cijumi mpaka kalakala jula kuti, “Tiyiciŵa yaka yitatu ni hafu. Yili yimasile yisawusyo yakwagwila ŵandu ŵa Mlungu, yosopeyi tiyicimala.”

⁸ Kupikana, nayipikene, nambo nganimbikanicisya, nipo nawusisye kuti, “Wawo ambuje ŵangu, ana yeleyi tiyicimala camtuli?”

⁹ Jwalakwe jwanjanjile kuti, “Mjawule ako m'mwe Daniele, pakuti maloŵe gelega gasunjidwe mwa asili, nipo tigaciŵa gakusisika mpaka ndaŵi jakumalisya jili jiyice.

¹⁰ Mlungu tacaswejesya ŵandu ŵajinji nipo taciŵa ŵaswela. Nambo ŵakusakala tacipitilisya kutenda yakusakala. Pangali atamose jumo mwa jemanja jutaciyipikanicisya yeleyi, nambo ŵakwete lunda taciyipikanicisya.

¹¹ “Kutandila ndaŵi jele mbopesi syakutinisya ŵasilekasisye, ni kuti, kutyocela pa ndaŵi ja Cindu cakutesya woga cila, tigacipita masiku 1,290.

¹² Jwana upile mundu jwele akwembecela, mpaka kugawona kumala kwa masiku 1,335!

¹³ “Nambo m'mwe Daniele mŵe ciŵela ŵakulupicika mpaka pambesi. Kaneko timciwa, nambo pambesi timcijimuka ku ŵawe kuti timpocele mbote jenu.”