Daniele 11 - Chiyawo Bible

¹ Sambano une mcaka candanda ca ucimwene wa Daliyasi M'medi, najimi kuti nimlimbikasye ni kumkamucisya.

² Sambano yitinamsalile yili yakuwona.” Lilayika lyatite kuti, Ayimwene ŵane ŵatatu tacilamulila cilambo ca Pelesiya, mwakuyicisidwa ni jwamcece, jwele jutaciŵa jwakusicila mnope kwapunda ŵane wosope m'macili ni yipanje yakwe, jwalakwejo tacilamulila ucimwene wekulungwa wa ku Gilisi.

Ma ucimwene ga Iguputo ni Siliya

³ “Mwenye jwamacili taciyika. Jwalakwejo tacilamula mbali jekulungwa ja cilambo ni kutenda yiliyose yakuyisaka.

⁴ Nambo ucimwene wakwe uli uyice pambone mnope, tiwucijonasika, nipo tiwucigaŵikana pacece. Yisukulu yakwe ngasiyijinjila ucimwenewo, nipo utaciwujinjila ucimwenewo ngasakola macili mpela ga jwalakwejo. Ucimwene wakwe tiwucitupulidwa ni miciga jakwe, nipo taciwupeleka kwa ŵane, ngaŵa kwa jemanja.

⁵ “Mwenye jwa kum'mwela taciŵa jwamacili. Nambo jwine mwa acakulungwa ŵakwe ŵa ngondo tacimpunda macili nipo ulamusi wakwe tiwuciŵa wekulungwa mnope.

⁶ Yili yipite yaka yine, ayimwene ŵaŵili, ŵakumpoto ni ŵakum'mwela, tacitenda cilanga.* Mwanace jwamkongwe jwa mwenye jwa kum'mwela tacilombedwa ni mwenye jwa ku mpoto kuti atamilisye mtendele. Nambo ucimwenewo ngasiwutama ndaŵi jajilewu, mwenyejo ni ŵanace ŵakwe ngasatamilisya. Jwamkongwejo, ŵamkwakwe, mwanace jwakwe ni ŵakutumicila ŵakwe, wosopewo tacipelecedwa kwa amagongo.

⁷ Panyuma pakwe jumo jwa pa ulongo ni jwamkongwejo tacijinjila ucimwene. Jwalakweju taciputa ngondo ni mwenye jwa kumpoto. Tacijipunda nipo tacijinjila mu msinda wakwe.

⁸ Tacisumula ni kujigala yipanje yawo, milungu jawo jakupanganya ni yiŵiga yawo yamtengo wapenani ya golidi* ni silifa* kwawula nayo ku Iguputo. Sambano yili yipite yaka yine tacileka kuputa ngondo ni mwenye jwa kumpotojo.

⁹ Sambano mwenye jwa kumpoto jula tacijinjila soni mcilambo ca kum'mwela ni ngondo, nambo ngasapunda, myoyo taciwujila kumangwakwe.

¹⁰ “Ŵanace ŵa mwenye jwa kumpoto tacijitanda ngondo, nipo tacasonganganya asilikali ŵajinji. Wosopewo taciyika mpela cikumba camesi nipo taciputa ngondo ni ucimwene wakum'mwela mpaka kuja kwika ku mapupa ga amagongo.

¹¹ Pelepo mwenye jwa kum'mwela tacikopoka mwakutumbila kuja kuputa ngondo ni mwenye jwa kumpotojo ali ajigele likuga lyakwe lyekulungwa lya ngondo, nipo tacipunda.

¹² Ali alipundile ni kulikamula likuga lya ngondoli, mwenye jwa kum'mwelajo tacilikwesya ligongo lyakupunda kwakwe, nipo taciwulaga ŵandu macila gejinji. Nambo kupundako ngasikupelenganya.

¹³ “Mwenye jwa kumpotojo tacisonganya soni likuga lyekulungwa lya ngondo kupunda lyakala lila. Yili yipite yaka yine taciyika nalyo likuga lyekulungwa lya ngondolyo, ni yida ya ngondo yejinji.

¹⁴ Masiku gelego ŵandu ŵajinji tacimjimucila mwenye jwa kum'mwelajo. Ŵandu ŵane ŵakwanonyela ya ndewu mwa ŵandu ŵenu, nombe nawo taciwujimucila ucimwenewo, kuti atende yiyawonece kupitila m'mesomkulola, nambo tacilepela.

¹⁵ Myoyo mwenye jwa ku Siliya taciyika ni kuwusyungulila msindawo ni kuwusumula. Asilikali ŵa ku Iguputo ngasapitilisya kuputa ngondo, atamose asilikali ŵakwe ŵamacili tacilepela.

¹⁶ Sambano m'magongo jwa kumpotojo tacitenda mwakusacila, nipo pangali jutacilimbana najo. Tacitamilicika myilambo yambone mnopeyo, nipo yosope tiyiciŵa mu ulamusi wakwe.

¹⁷ “Kaneko mwenye jwa kumpoto taciyika ni macili gakwe gosope, ni tacilinga kupangana ya mtendele ni mwenye jwa kum'mwela. Tacilinga kupeleka mwanace jwakwe kwa mwenye jwinejo kuti amlombe, nambo cakulinga cakwe ngasicikamula masengo kose.

¹⁸ Pasogolo pakwe mwenye jwa kumpotojo tacitanda ngondo ni yilambo ya mungulugulu nyasa nipo taciyipunda yilambo yejinji. Nambo jwamkulungwa jwine jwa ngondo tacimasya kulikwesya kwa jwalakwejo. Myoyo yacipongwe yakweyo tiyicimwujilila.

¹⁹ Mwenyejo tacilinga kuti awujilile ku mapupa ga cilambo cakwe, nambo tacikuŵala, ni kugwa, nipo ngasawoneka soni.

²⁰ “Pasogolo pa mwenye jweleju tipaciwoneka mwenye jwine jutacituma ŵakomesya msongo kuti aciculuye cipanje ca ucimwene wakwe. Nambo jili jipite ndaŵi japanandi mwenyejo taciwulajidwa, ngaŵa mwa ukali kapena pa ngondo.”

Mwenye jwakusakala jwa ku Siliya

²¹ Lilayika lyapitilisye kulondesya: “Jutacijinjila m'malo ga mwenye jwa kumpoto taciŵa jwakunyosyeka, jwamkanaŵa jwa mwiŵasa lya ucimwene. Jwalakwejo tacigamba kwika mwakusisimucisya, nipo taciwusumula ucimwenewo mwakunyenjelela.

²² Tacigatopola ni kugajonanga makuga ga ngondo, atamose soni jwakutaga mbopesi jwa cilanga.

²³ Nipo kutandila ndaŵi jitacitenda najo cilanga, tacitenda yindu mwakunyenga. Atamose kuti tacikola ŵandu ŵamnono, nambo taciŵa jwamacilipe.

²⁴ Mwacisisimucisya taciputa ngondo ni ŵandu m'maupande gakusicila mnope ga cilamboco. Myoyo tacitenda yele acinangolo ŵa atatigwe nginapakombola kuyitenda. Tacigaŵa yakusumula ku ngondo, soni yipanje sikati ja ŵandu ŵakumsisya. Tacitenda ma pulani gakuti awusumule msinda wa mapupa, nambo yeleyi tiyicitendekwa kwa ndaŵi japanandi.

²⁵ “Mwenye jwa kumpoto tacilimba mtima nipo tacilisonganya likuga lya ngondo lya macili mnope, kuti likamenyane ni Mwenye jwa ku Iguputo. Nambo mwenyejo tacijigala likuga lya ngondo lyekulungwa kwakupundanganya. Nambo Mwenye jwa ku Iguputo tacimlambusya nipo ngisapunda kose.

²⁶ Atamose apungu ŵakwe ŵakusalya nawo pampepe tacimjimucila. Likuga lyakwe lya ngondo tilicijonasika, nipo ŵajinji taciwulajidwa pa ngondojo.

²⁷ Pasogolo pakwe ayimwene ŵaŵiliwo tacitama malo gamo ni kuŵecetana, nambo mitima jawo tijiciŵa jakunyenga, tacigamba kulambusyana, nambo ngasapata cilicose, ligongo ndaŵi tijiciŵa mkinijikwane.

²⁸ Sambano mwenye jwa kumpoto taciwujila kumangwakwe ali ajigele yindu yejinji, nambo mtima wakwe tiwucisosasosa kuti ujonanje dini ja ŵandu ŵa Mlungu. Tacitenda mwakusacila, nipo taciwujilila kumangwakwe.

²⁹ “Pasogolo pakwe, mwenye jwa kumpoto taciyika soni kum'mwela, nambo ngasijipunda mpela mujapundilaga kalakala.

³⁰ Yombo ya ku yilambo ya kungapilo lyuŵa tiyicilimbana najo, nipo mwenyejo tacijasa mtima. “Pelepo taciwujilila ali apile mtima mnope, tacasawusya ŵandu ŵakulupicika ŵa Mlungu nambo ŵangakulupilila tacasalalila mtima.

³¹ Asilikali ŵakwe tacijonanga malo ga mapupa ga m'Nyumba ja AMBUJE, tacimasya mbopesi syakutinisya sya lisiku ni lisiku. Kweleko taciŵika Cindu cakutesya woga cila.

³² Mwenyejo tacitenda yindu mwakunyenga kuti ŵasokonesye ŵangakulupilila. Nambo ŵandu ŵakusam'manyilila Mlungu jwawo tacilimbicila nipo tacimsisya mwenyejo.

³³ Utacikola lunda sikati ja ŵanduwo tacajiganya acimjawo ŵajinji. Nambo jili jipite ndaŵi japanandi taciwulajidwa ni upanga kapena moto, nipo tacikamulwa ni kujigalidwa ukapolo.

³⁴ Ŵanduwo ali ciŵela kwasawusya myoyo, ŵane tacakamucisya, nambo ŵajinji utacakamucisyawo taciŵa ŵakunyenga.

³⁵ Ŵane ŵalundawo taciwulajidwa nditu, nambo cakulinga cakwe ca yeleyi ni cakuti ŵalinje, ŵaswejese mpaka ndaŵi jakumalisya, pakuti ndaŵi jajiŵisile tijiyice.

³⁶ “Mwenye jwa kumpotojo tacitenda yakuyisaka nipo tacilikwesya ni kulitenda kuŵa jwamkulungwa kupunda milungu josope, atamose Mlungu jwa milungu. Yosope tiyicajendela cenene mpaka jili jiyice ndaŵi jele Mlungu tacapa cilango mwa ukali, pakuti yasimicisidwe kuti tiyicitendekwa nditu.

³⁷ Mwenyejo tacijinyosya milungu ja acinangolo ŵakwe nambo soni mlungu jwakunonyeledwa ni acakongwe. Ngasasamala mlungu jwine jwalijose, ligongo tacilikwesya kupunda wosope.

³⁸ Tacimcimbicisya mlungu jwakugacinjilicisya mapupa, jwele acinangolo ŵakwe nganam'manyilila. Tacipeleka kwa mlungujo golidi ni silifa, maganga ga mtengo wapenani nambo soni mituka jambone jejinji.

³⁹ Ni cikamucisyo ca ŵandu ŵakulambila mlungu jwa cilendo tacigacinjicisya mapupa gakulimbangana. Ŵandu utacimtumicilaga tacacimbicisya mnope. Tacapa ulamusi pa ŵandu ŵajinji, soni tacagaŵila malo mpela malipilo gawo.

⁴⁰ “Pa ndaŵi jakumalisya mwenye jwa kum'mwela tacijitanda ngondo ni mwenye jwa kumpotojo. Nambo mwenye jwa kumpotojo tacimwutucila mwa ukali mpela cimbunga camacili, ali ajigele yigeleta, ŵandu ŵakwela pa mahaci ni yombo yejinji. Sambano tacipita myilambo yejinji ni kuyipunda pa ngondo mpela cikumba ca mesi.

⁴¹ Taciputa ngondo ni cilambo ceswela, nipo taciwulaga ŵandu ŵajinji. Nambo Aedomu ni Amowabu nambo soni acakulungwa ŵa Aamoni tacikulupuka.

⁴² Taciputa ngondo ni yilambo yejinji, nipo atamose Iguputo ngasakulupuka.

⁴³ Mwenyejo tacisumula cipanje ca golidi ni silifa, nambo soni yindu ya mtengo wa penani ya ku Iguputo. Nombe nawo ŵa ku Libiya ni Ifiyopiya tacilepela ngaputa ngondo.

⁴⁴ Nambo mbili syakutyocela kungopoko lyuŵa ni kumpoto tisicajogoya, nipo jwalakwejo tacinyakuka ali atumbile mnope kuti akapute ngondo ni kwamala ŵandu ŵajinji.

⁴⁵ Jwalakwejo tacitaŵa matenti gakwe ga ucimwene pasikati pa nyasa ni petumbi pijitaŵidwe Nyumba ja AMBUJE. Nambope pakumalisya pakwe mwenyejo taciwulajidwa ngapata jwakumkamucisya.”