Daniele 10 - Chiyawo Bible

Mesomkulola ga Daniele mungulugulu Lusulo lwa Taigilisi

¹ Caka catatu ca ucimwene wa Sailasi, mwenye jwa ku Pelesiya, Daniele jwakolanjidwa Betishesa, jwapikene maloŵe. Maloŵego utenga wakwe waliji wakuwona, nipo ŵaŵecete ya ngondo jajikulungwa. Daniele jwawupikanicisye utengawo piŵayiweni yindu m'mesomkulola.

² Pandaŵi jelejo une, Daniele nalisile kwa milungu jitatu.

³ Nalesile kulya yakulya yosope yambone. Nginindya nyama kapena kumwa finyo, soni nganimbakala mawuta pa cilu cangu yijuma yitatu yosopeyo.

⁴ Pa lisiku lya 24 mwesi wandanda, naliji pa ciko ca lusulo lwekulungwa lwa Taigilisi.

⁵ Pinalolite, nam'weni mundu ali awete yakuwala ya bafuta ni lamba jwa golidi* jwa ku Ufasi mciwunu mwakwe.

⁶ Cilu cakwe caliji cakunyesimila mpela liganga lya mtengo wa penani. Ngope jakwe jaliji jakuŵala mpela njasi. Meso gakwe galiji mpela lilamba lya moto. Makono gakwe ni ngongolo syakwe syaliji syakuŵala mpela bulonsi jwepukute cenene. Maloŵe gakwe gapikanikaga mpela ga likuga lyekulungwa lya ŵandu.

⁷ Une Daniele jikape, ni junayiweni yinduyo m'mesomkulola, nambo ŵandu unaliji nawo nganayiwona. Nambo jemanjajo ŵatesile woga mnope, soni ŵatisile ni kuja kuŵa.

⁸ Unejo nasigalile jikape ni kuyilolaga yindu yinayiwonagayo, nambo macili gamalile. Ngope jangu jagumbalilwe ni woga nipo nganingola macili soni.

⁹ Kaneko nagapikene maloŵe gakwe. Ndili mbikene maloŵego, nagwile pasi camakuku nikuŵa mpela jwam'we.

¹⁰ Kaneko ligasa lyangamwile ni kunjimusya, une ndili mkutetemela m'malungomu soni m'magasamu.

¹¹ Lilayikalyo lyasalile kuti, “M'mwe Daniele, mundu jwakunonyelwa mnope, mjime mpikane maloŵe gingumsalila, pakuti ndumidwe kwa m'mwejo.” Piŵasalilaga, najimi ndili mkutetemela.

¹² Nambo jwalakwejo jwatite kuti, “Mkatenda woga Daniele, pakuti kutyocela lisiku lyandanda, pimwasimicisye kuti mpikanicisye yindu ni kulinandiya pameso pa Mlungu jwenu, mapopelo genu gapikanice, myoyo mbice kuti nimjanje mapopelo genugo.

¹³ Lilayika lyekulungwa lya ucimwene wa ku Pelesiya liŵele lili mkundekasya kwa masiku 21, nambo Mikaele,* jumo jwa malayika gekulungwa, jwayice kukungamucisya. Namlesile kweleko ali mkulimbana ni lilayika lya ku Pelesiya lila.

¹⁴ Sambano mbice kuti nimsalile yiticatendecela ŵandu ŵenu masiku ga kusogolo. Yindu yimwayiweni m'mesomkulolayi tiyicitendekwa masiku ga msogolo.”

¹⁵ Piŵaŵecetaga ni une maloŵe gelega, nagambile kwinamila pasi ngaŵeceta cilicose.

¹⁶ Kaneko jwine jwakuwoneka mpela mundu jwangwayiye ngomo syangu. Myoyo jwalakwejo ali cimile pameso pangu, natandite kuŵeceta, natite kuti, “Wawo ambuje ŵangu, yindu yele nayiweni m'mesomkulola yimbwetece mtima, soni jwangali macili.

¹⁷ Ana komboleka camtuli kuti une jundili kapolo mbecete ni ambuje ŵangu? Macili gangu gamasile, soni ngulepela kupumula cenene.”

¹⁸ Sambano jwakuwoneka mpela mundu jula jwangwayiye, ni kumbucisya soni macili.

¹⁹ Jwatite kuti, “Mkajogopa m'mwe ŵakunonyelwa mnope. Mtendele uŵe ni m'mwejo. Mŵe ŵamacili, nipo mlimbe mtima.” Alimkuŵeceta myoyo ni une, nagapatile soni macili, ni natite kuti, “Ŵecetani ambuje ŵangu, pakuti mulimbikasisye.”

^20-21 Jwalakwejo jwambusisye une kuti, “Ana mkumanyilila ciyicile une kwa m'mwejo? Sambano timbujile kaje kuja kukuputa ngondo ni lilayika lyekulungwa lya ku Pelesiya lila. Pitinalipunde lyeleli, tiliciyika soni lilayika lyekulungwa lya ku Gilisi. Nambo tinamsalile yayilembedwe m'buku ja yakuwona. Pangali jwine jwampaka angamucisye kulimbana nago akaŵe Mikaele, Lilayika lyenu lyekulungwa.