Daniele 1 - Chiyawo Bible

Ngani ja Daniele ni acimjakwe ( 1:1—6:28 ) Acacanda ku luŵala lwa Mwenye Nebukadinesa

¹ Caka catatu ca Yehoiyakimu mwenye jwa ku Yuda, Nebukadinesa mwenye jwa ku Babiloniya jwayice ku msinda wa Yelusalemu, ni kuwusyungulila.

² AMBUJE ŵamkamucisye kumpunda Yehoiyakimu, mwenye jwa ku Yuda, ni kusumula yida yine ya ku Nyumba ja AMBUJE. Nipo ŵajile nayo ku nyumba sya milungu ja ku Babiloniya, ni ŵayiŵisile m'malo gakusunjila yipanje.

³ Sambano mwenye jwalamwile Ashipenasi, nduna jakwe jajikulungwa, kuti ajigale ŵane mwa acikapolo ŵa cicanda ŵa ku Isalaeli, ŵa mwiŵasa lya ucimwene kwisa soni ŵa m'maŵasa ga acakulungwa.

⁴ Acacanda ŵeleŵa ŵajenele kuŵa ŵakusalala, ŵangali cilema, ŵa umanyilisi pa lunda lulilose, ŵangakaŵa kulijiganya, ŵakalamuka, ŵakumanyilila kukamula masengo gakutumicila ku luŵala lwa mwenye. Ŵajenele soni kwajiganya kulemba ni kuŵeceta ciŵeceto ca ku Babiloniya.

⁵ Mwenye ŵalamwile kuti masiku gosope ŵapeje yakulya yiŵalyaga mwenyejo nambo soni finyo juŵamwaga jwalakwejo. Ŵalamwile soni kuti ŵajiganyeje kwa yaka yitatu, ni kuti pakumala kwa ndaŵi jelejo, taciŵa ali mkupakombola kutumicila ku nyumba ja mwenye.

⁶ Mwa jemanjaji ŵapali acacanda ŵane ŵa ku Yuda. Mena gawo galiji aga: Daniele, Hananiya, Mishaele ni Asaliya.

⁷ Nambo nduna jajikulungwa jila japele jemanjaji mena gasambano: Daniele ŵampele lina lyakuti Betishesa, Hananiya ŵampele lina lyakuti Shadileki, Mishaele ŵampele lina lyakuti Misheki nipo Asaliya ŵampele lina lyakuti Abedenego.

⁸ Nambo Daniele ŵasimicisye mu mtima mwakwe kuti ngasalisakasya ni yakulya yiŵalyaga mwenye ni finyo juŵamwaga. Ali ni ligongo lyakwe ŵajiŵendile nduna jajikulungwa jila kuti jimkamucisye pelepa.

⁹ Sambano Mlungu ŵajoloŵesye mtima wa ndunajo kuti jimsalalile mtima Daniele.

¹⁰ Nduna jila ni jamsalile Daniele kuti, “Ngwajogopa ambuje ŵangu mwenye. Jwalakwejo alamwile, myoyo yakulya ni yakumwa ni ayi. Nipo naga akumwona kuti mli ŵaganda, kulekangana ni acacanda ŵa msingu wenu, tacimbulaga.”

¹¹ Nduna jila jaŵisile kapitawo jwakumlolela Daniele, Hananiya, Mishaele ni Asaliya.

¹² Sambano Daniele ŵamsalile kapitawojo kuti “Atende mwakutulinga uweji kwa masiku likumi, atupe mboga sya liponda kuti tulyeje ni mesi soni kuti tumweje.

¹³ Sambano talekanganye mututukawoneceleje uwe ni mutakawoneceleje acacanda ŵane ŵala, ŵakulya yakulya yakusalyaga mwenye. Kaneko ŵalakwe tatende ni uwe mutayiwonele.”

¹⁴ Kapitawo jula jwajiticisye, ni jwalinjile kwa masiku likumi.

¹⁵ Gali gapite masiku likumi, Daniele ni acimjakwe ŵaliji ŵamacili soni ŵa umi wambone kwapunda acacanda ŵane wosope, ŵele ŵiŵalyaga yakulya ya kwa mwenye.

¹⁶ Myoyo kapitawo jula jwatyosisye yakulya ya kwa mwenye pamo ni finyo juŵajenele kumwa, ni kwapaga jemanjajo mboga sya lipondape.

¹⁷ Kwamba ya acacanda mcece ŵala, Mlungu ŵapelece lunda lwakuti apikanicisye maloŵe ga m'mabuku, nambo soni majiganyo gapenani. Daniele ŵakwete soni lunda lwakugopolela mesomkulola ni sagamisi sya ŵandu.

¹⁸ Piyamasile yaka yitatu yakulijiganya mpela muŵalamulile mwenye, nduna jila jajigele acacanda wosope kwawula nawo kwa Mwenye Nebukadinesa.

¹⁹ Mwenye ŵaŵecete ni wosope, nipo ŵasimene kuti paliji pangali jwine jwakulandana ni Daniele, Hananiya, Mishaele ni Asaliya. Myoyo acacandawo ŵatandite kutumicila ku nyumba ja mwenye.

²⁰ Ndaŵi syosope naga mwenye akwawusya yindu yakwayana ni umanyilisi ni lunda, ŵasimanaga kuti jemanjajo ni ŵiŵaliji ŵakupunda mnope kulekangana ni ŵamatipwi ni ŵakulondola yisango wosope ŵa mu ucimwene wakwe.

²¹ Daniele ŵaliji kweleko mpaka caka candanda ca ucimwene wa Sailasi.