Chunukuko 9 - Chiyawo Bible

¹ Kaneko lilayika lya msano lyagombile lipenga lyakwe, ni najiweni ndondwa jijagwilile pa cilambo capasi. Jwine jwakwe ŵajipele kiyi kuti jikawugule lisimbo

² Ndondwajo jawugwile pesimbopo, ni pakopwece lyosi mpela lya mu ng'aso. Lyuŵa ni mawunde yaŵilile ligongo lya lyosi lilyakopokaga mwisimbomo.

³ Mu lyosimo mwakopwece sombe ni syajile kukwinjila mcilambo capasi, nipo ŵalipele macili gakuluma mpela ga yiŵalaŵala ya pa cilambo capasi.

⁴ Sombesyo syalamulidwe kuti sikasijakonanga manyasi kapena yitela kapena cakusipuka cine cilicose. Syalamulidwe kuti sikagambe kwajonanga ŵandu ŵimkanakola cimanyisyo ca Mlungu pawusyo pawo.

⁵ Sombelo nganalikunda kuti lyawulaje ŵanduwo, nambo m'malo mwakwe ŵalikundile kuti ligambe kwalagasya jemanjajo kwa miesi msano. Kupweteka kwakwe kwa yilagasyoyo kwalandene ni ululu wa ciŵalaŵala naga cikulumile.

⁶ Pa jele ndaŵijo ŵandu tacisosasosa ciwa, nambo ngasacisimana kose; tacisaka kuwa, nambo ciwa ticicatila jemanjajo.

⁷ Sombesyo syawonekaga mpela mahaci gigaliji cile kuja ku ngondo. Pa mitwe pawo yapali yisindi ya ucimwene ya golidi,* soni ngope syawo syawonekaga mpela sya ŵandu.

⁸ Umbo syawo syaliji syelewu mpela sya acakongwe, nipo meno gawo galiji gekulungwa nambo soni gakutema mpela ga lisimba.

⁹ Cilu cawo cawunicilidwe ni yele yawonekaga mpela mapisi ga yisyano yiyakamulisigwaga masengo pakucijila yidali ya ŵandu. Kulila kwa mapapiko gakwe kwaliji mpela kwa yigeleta ya ngondo yejinji yakuwutidwa ni mahaci gakuwutucila ku ngondo.

¹⁰ Sombesyo syakwete micila ni mbola mpela yiŵalaŵala. Macili gakwapwetecela ŵandu miesi msano gala galiji m'micila mwawo.

¹¹ Mwenye jwawo jwaliji lilayika lilyalolelaga lisimbo lila. Pa Ciyuda lina lyakwe Abadoni, pa Cigiliki* ni Apoliyoni (gopolela ni kuti, “Jwakonanga jula”).

¹² Cilagasyo candanda cila capite, mwakuti yasigalile yilagasyo yiŵili yiyaliji mkwisa.

¹³ Kaneko lilayika lya msano ni limo lila lyagombile lipenga. Napikene maloŵe kutyocela ku mitepa mcece josope ja malo gakupelecela mbopesi ga golidi gigajimi pameso pa Mlungu.

¹⁴ Liloŵelyo lyalisalile lilayika lya msano ni limo lila lilyakwete lipenga lila kuti, “Mgagopole malayika mcece gigali getaŵidwe gala pa lusulo lwekulungwa lwa Yufuleti.”

¹⁵ Ŵagagopwele malayikago kuti gakawulaje mbali jimo ja mbali sitatu sya ŵandu wosope. Mlungu ŵaliji ali agalinganyicisye kala malayikago ndaŵi, lisiku, mwesi ni caka cakwe.

¹⁶ Napikene ciŵalanjilo ca ŵa ngondo ŵa pa mahaci gala, kuti caliji mamiliyoni 200.

¹⁷ Kupitila m'mesomkulolamo, nagaweni mahaci pampepe ni uŵakwesilepo. Jemanjajo ŵawete malaja ga cisyano gakucijila pa mtima gecejewu mpela moto, ga buluwu mpela safilo, soni ga cikasu mpela maganga ga sulufule. Mitwe ja mahaci jaliji mkuwoneka mpela ja masimba, soni mkamwa mwawo mwakopokaga moto, lyosi ni sulufule.*

¹⁸ Mbali jimo ja mbali sitatu sya ŵandu wosope syawulajidwe ni jawulajidwe ni milili jitatuji: mlili wa moto, wa lyosi ni wa sulufule, yele yiyakopokaga mkamwa mwa mahaci gala.

¹⁹ Macili ga mahacigo galiji mkamwa ni m'micila. Micila jawojo jaliji mpela lijoka lyalikwete mtwe. Ŵakamulicisyaga masengo yeleyi pakwajonanga ŵandu.

²⁰ Ŵandu ŵane wosope ŵakusigala, ŵele nganawulajidwa ni milili jila, nganapitikuka kose mtima ni kuleka yiŵatesile ni makono gawo. Nganaleka kujilambila misimu jakusakala, ni kapena yakupanganyidwa yine ya golidi,* silifa,* ya cisyano, liganga ni yitela, yele ngayikupakombola kulola, kapena kupikana atamose kwenda.

²¹ Ŵanduwo nganapitikuka mitima kuti alece kuwulaga acimjawo, usaŵi, lilama ni wiyi.