Chunukuko 8 - Chiyawo Bible

Mwanace Jwangondolo jwamatukwile cimanyisyo ca msano ni yiŵili

¹ Mwanace Jwangondolo pijwamatukwile cimanyisyo ca msano ni yiŵili, kwinani kwatesile jii kwa mbindi makumi gatatu.

² Kaneko nagaweni malayika msano ni gaŵili gala gigajimi pameso pa Mlungu gala, gali mkupegwa malipenga msano ni gaŵili.

³ Lilayika line lilyakwete cakututumicisya ubani* lyayice, nipo ŵalipele ubani wejinji kuti awupelece pamo ni mapopelo ga ŵandu ŵa Mlungu pa malo gakupelecela mbopesi ga golidi* gigaliji pasogolo pa citengu ca ucimwene ula.

⁴ Pampepe ni mapopelo ga ŵandu ŵa Mlunguwo, lyosi lya ubaniwo lyakwesile kwawula kwinani kutyocelaga m'magasa ga lilayika lila.

⁵ Kaneko lilayika lila lyajigele cakututumicisya ubani cila ni kugumbasyamo moto wakutyocela pa malo gakupelecela mbopesi gala. Ŵaciponyisye pa cilambo capasi, nipo ndaŵi jijojo kwalindime, kwaliji kwana masegwe, njasi ni cisicinya.

Malipenga mcece gandanda

⁶ Sambano acimalayika msano ni ŵaŵili ŵala ŵiŵakwete malipenga msano ni gaŵili ŵala ŵaliŵicile cile kuti agombe malipengago.

⁷ Lilayika lyandanda lyagombile lipenga lyakwe. Matalila ni moto, yewanganyicilane ni miasi, yagwile pacilambo capasi pano kutyocela kwinani. Mbali jimo ja ma mbali sitatu sya cilambo ni yitela yapile, nombe nago manyasi gamaŵisi gapile.

⁸ Lilayika lyaŵili lyagombile lipenga lyakwe. Cine cakwe cakuwoneka mpela litumbi lyakolela moto cawonece nipo caponyedwe m'nyasa.

⁹ Papopo mbali jimo ja mbali sitatu sya nyasa syasyucile kuŵa miasi, soni mbali jimo ja mbali sitatu sya yakupanganyidwa yosope ya umi ya m'nyasamo yawile, myoyo soni mwa mbali sitatu sya yombo syajonasice.

¹⁰ Lilayika lyatatu lyagombile lipenga lyakwe. Piŵatesile myoyo cindondwa cekulungwa cicakolelaga mpela lumuli cagwile pasi kutyocela kwinani. Celeco cagwilile pa mbali jimo ja mbali sitatu mu sulo, ni pa nduluko sya mesi.

¹¹ Lina lya ndondwajo lili “Kuŵaŵa”. Mbali jimo ja mbali sitatu sya mesi jasandwice kuŵa cakuŵaŵa, mwakuti ŵandu ŵajinji ŵawile nago mesigo ligongo lya kuŵaŵa kwakweko.

¹² Lilayika lya mcece lyagombile lipenga lyakwe lila. Piŵatesile myoyo yasimanikwe kuti jimojimo mwa mbali sitatusitatu sya lyuŵa, mwesi ni ndondwa yamenyene. Piyatendekwe yeleyi, mbali jimo mwa mbali sitatu sya yosopeyo syaŵilile. Kwaliji kwangali soni lilanguka pa jimo mwa mbali sitatu sya musi, yalumo soni cilo.

¹³ Kaneko nalolite, nipo najiweni nyanga jili mguluka mwinani, ni nacipikene cili mkulila mwakwesya cicitiji kuti, “Likungu! Likungu! Likungu kwa ŵandu wosope ŵakutama pa cilambo capasi, malayika gatatu gala pitagambe kugomba malipenga gawo.”