Chunukuko 7 - Chiyawo Bible

Aisalaeli 144,000 ŵalembedwe cimanyisyo

¹ Cindu cakuyicisya cinaciweni caliji malayika mcece gali gajimi m'mitepa mcece ja cilambo capasi. Galiji gali gakamwile mbepo mcece sya cilambo capasi kuti ni jimo jose jikapuga pa cilambo capasi, kapena pa nyasa, kapena pa citela cilicose.

² Kaneko naliweni lilayika lilimkwisa kutyocela kungopoko lyuŵa lili ni cidindo ca Mlungu jwakupeleka umi. Lilayikalyo lyagumisile mwakukwesya maloŵe kwa malayika gane mcece gala gele Mlungu ŵagapele macili gakonanjila cilambo capasi ni nyasa.

³ Ŵagasalile kuti, “Mkajonanga cilambo capasi, nyasa, kapena yitela, mpaka nalembe kaje cimanyisyo pawusyo ŵakutumicila ŵa Mlungu jwetu.”

⁴ Napikene soni kuti ciŵalanjilo ca ŵakulembedwa cimanyisyo pawusyo syawo cakwanile 144,000. Jemanjaji ŵaliji ŵakutyocela ku ngosyo syosope likumi ni siŵili sya ku Isalaeli,

^5-8 12,000 kutyocela ku lukosyo lululose lwa Yuda, Lubeni, Gadi, Asha, Nafutali, Manase, Simiyoni, Lefi, Isakala, Sebuloni, Yosefe ni Benjamini.

Likuga lya ŵandu

⁹ Yili yitendekwe yeleyi, nalolite ni naliweni likuga lya ŵandu ŵangaŵalanjika. Ŵanduwo ŵaliji ŵakutyocela ku mitundu josope ja ŵandu, ngosyo syosope, yilambo yosope ni soni ŵa yiŵeceto yosope nipo ŵajimi pameso pa citengu ni pa Mwanace Jwangondolo. Ŵanduwo ŵaliji ali awete mikanjo jeswela nipo ŵanyakwile kanjesa m'myala mwawo.

¹⁰ Ŵagumilaga mwakwesya maloŵe acitiji kuti, “Ukulupusyo ukusatyocela kwa Mlungu jwetu jwakusatama pa citengu ca ucimwene, nambo soni kwa Mwanace Jwangondolo.”

¹¹ Malayika gosope gajimi kucisyungulila citengu ca ucimwene cila, ni kwasyungulila soni acakulungwakulungwa ŵala ni ya umi yine mcece yila. Malayikago galigwisisye camakuku pasogolo pa citengu ca ucimweneco, ni kumlambila Mlungu,

¹² aciŵecetaga kuti, “Ami!* Mlungu jwetu apocele majinicilo, lumbili, lunda, matogolelo, ucimbicimbi ni macili ndaŵi syosope. Ami.”

¹³ Jumo jwa acakulungwakulungwa ŵala ŵambusisye kuti, “Ana ŵawete mikanjo jeswelaŵa ŵani, nambi atyocele kwapi?”

¹⁴ Une najanjile kuti, “Ambuje ŵangu, ŵakumanyilila yeleyo ni ŵalakwe.” Nipo jwalakwejo jwanjanjile kuti, “Jemanjaji ali ŵele ŵiŵapundile mu yisawusyo yekulungwa yila. Ŵacapile mikanjo jawo ni kujiswejesya m'miasi ja Mwanace Jwangondolo.

¹⁵ Ali ni ligongo lyakwe jemanjaji ajimi pameso pa citengu ca ucimwene wa Mlungu ni kumtumicila jwalakwejo cilo ni musi m'Nyumba jakwe. Ŵele ŵakutama pa citengu cakwe cila tacacenjela jemanjajo.

¹⁶ Ngisijakola soni sala kapena njota. Ngisilyajoca soni lyuŵa kapena kulaga ni citukuta,

¹⁷ ligongo lyakuti Mwanace Jwangondolo, jwele jwali sikati ja citengu ca Ucimwene, taciŵa mkucinga jwawo, tacalongolela jemanjajo ku nduluko sya mesi ga umi, soni Mlungu tacapukuta misosi josope m'meso mwawo.”