Chunukuko 6 - Chiyawo Bible

Yimatilo yandanda msano ni cimo

¹ Ndaŵi jijojo nam'weni Mwanace Jwangondolo jula ali mkumatukula candanda mwa yimatilo msano ni cimo yila. Myoyo napikene cimo mwa ya umi mcece yila cili mkuŵeceta ni liloŵe lyakupikanika mpela njasi licitiji, “Myice!”

² Pinalolite najiweni haci jeswela. Juŵakwesile pelepo jwakwete ukunje soni jwapegwile cisindi ca ucimwene. Jwalakwejo jwakopocele mpela jwakupunda, kuti akapunde soni ŵane pa cilambo capasi.

³ Kaneko Mwanace Jwangondolo jula jwamatukwile cimatilo caŵili. Myoyo napikene ca umi caŵili cila cili mkuŵeceta kuti, “Myice!”

⁴ Haci jine, jijaliji jecejewu, jakopocele. Jwakwelapo jwakwe jwapocele macili gakwikasya ngondo pa cilambo capasi, ni cakulinga cakuti ŵandu awulaganeje. Myoyo ŵampele upanga wekulungwa.

⁵ Kaneko Mwanace Jwangondolo jula jwamatukwile cimatilo catatu, kaneko napikene ca umi catatu cila cili mkuŵeceta kuti, “Myice!” Pinalolite najiweni haci jepiliwu. Juŵakwesilepo jwakwete sikelo m'myala mwakwe.

⁶ Myoyo napikene mpela liloŵe kutyocela sikati ja ya umi mcece yila. Liloŵelyo lyatiji kuti, “Lupeta lumo lwa tiligu, mtengo wakwe uli malipilo ga lisiku limo. Mbeta sitatu sya mbeju jakolanjidwa balele,* mtengo wakwe uli uwowo soni. Nambo mkasimjonanga yitela ya mawuta ga olifi* ni ya mipeleya.”

⁷ Kaneko Mwanace Jwangondolo jwamatukwile cimatilo ca mcece. Myoyo napikene ca umi ca mcece cila cili mkuŵeceta kuti, “Myice!”

⁸ Pinalolite, najiweni haci jakubiliŵita. Juŵakwesilepo lina lyakwe lyaliji ciwa, soni malo ga ŵandu ŵawe* gamkuyaga panyuma. Ŵaŵiliwo ŵapegwile ulamusi pa mbali jimo ja mbali mcece sya cilambo capasi, kuti awulaje ŵandu kupitila mukutenda ngondo, cilala, yilwele, ni yilombo yaukali ya mwitinji.

⁹ Yili yimasile yeleyi Mwanace Jwangondolo jula jwamatukwile cimatilo ca msano. Myoyo naweni kusi kwa malo gakupelecela mbopesi misimu ja ŵandu uŵawulajidwe ligongo lyakulalicila maloŵe ga Mlungu, nambo soni ŵaŵele ŵakulupicika pakutendela umboni.

¹⁰ Misimujo jagumisile mwakwesya maloŵe jicitiji kuti, “Ambuje Ŵamaciligosope, ŵalakwe ali ŵaswela ni ŵakulupicika. Ana tacaleka mpaka cakaci ngajimba magambo ni kwapa cilango ŵandu ŵa pa cilambo capasi ni ligongo lyakutuwulaga uwe?”

¹¹ Jwalijose jwa jemanjajo jwapegwile mkanjo weswela, nipo ŵasalilidwe kuti apumuleje panandi kaje mpaka piticicikwanila ciŵalanjilo cosope ca ŵakutumicila acimjawo, ni acalongo acimjawo mwa Ambuje ŵele ŵakwenela kuwulajidwa mpela acimsyenewo.

¹² Kaneko Mwanace Jwangondolo jula jwamatukwile cimatilo ca msano ni cimo. Myoyo patendecekwe cisicinya camacili, lyuŵa lyagambile kuti bii mpela nguwo jepiliwu, soni mwesi wacejele mpela miasi.

¹³ Ndondwa syagwile pasi, mpela musikusalakaticila nguju syeŵisi syangajiwula, pa ndaŵi jele citelaco cikutenganyika ni mbungo jamacili.

¹⁴ Liwunde lyatyosile mpela yakusati pakuwutandukula ugono. Litumbi lililyose ni cilumba cilicose yasejecekwe pa malo piyaliji.

¹⁵ Kaneko ayimwene ŵa pa cilambo capasi, ŵakulamulila ŵa yilambo, acakulungwa ŵa ngondo, ŵandu ŵakusicila, ŵandu ŵamacili, ni jwalijose, acikapolo ni alukosyo ŵajile kukuŵa mu mbanga ni pasi pa malwala gekulungwa ga m'matumbi.

¹⁶ Jemanjajo ŵaliji mkugagumilila matumbi ni malwalago acitiji kuti, “Mtugwile ni kutuwunicila, kuti akatuwona jwakutama pa citengu ca ucimwene jula, nambo soni kuti tukulupuce ku lutumbilo lwa Mwanace Jwangondolo.

¹⁷ Liyice lisiku lyakogoya lya lutumbilo lwawo, ana ŵani mpaka alimbangane?”