Chunukuko 5 - Chiyawo Bible

Buku ni Mwanace Jwangondolo

¹ Kaneko najiweni buku jili m'myala mwa juŵatemi pa citengu ca ucimwene jula. Cipukutu ca yakulembedwa mkati ni kunyuma kwakwe nipo caliji cematidwe ni yimatilo msano ni yiŵili.

² Kaneko naliweni lilayika lya macili lili mkuwusya mwakwesya maloŵe acitiji, “Ana ŵani ŵali ŵakuŵajilwa kuwunukula cipukutuci ni kumatukula yimatilo yakwe?”

³ Nambo paliji pangali atamose jumo jose kwinani, kapena pa cilambo capasi jwakapakombwele kuwunukula kapena kulola mcipukutuco.

⁴ Myoyo nalisile mnope pakuyiwona kuti paliji pangali ni jumo jose jwakuŵajilwa kuwunukula cipukutuco kapena kulola mkati.

⁵ Kaneko jumo jwa acakulungwakulungwa ŵala ŵasalile kuti, “Mkalila, pakuti Lisimba lya lukosyo lwa Yuda, cisukulu ca Mwenye Daudi,* apundile, soni jwalakwejo akukomboleka kuwunukula cipukutuco ni kumatukula yimatilo yakwe msano ni yiŵili yila.”

⁶ Sambano namŵeni Mwanace Jwangondolo ali ajimi pasikati pa citengu ca ucimwene ula ni ya umi mcece yila kwisa soni acakulungwakulungwa makumi gaŵili ni mcece ŵala. Mwanace Jwangondolojo jwawonekaga mpela jwamwulajidwe, soni jwakwete misengo msano ni jiŵili kwisa soni meso msano ni gaŵili. Mesogo gali Misimu msano ni jiŵili ja Mlungu jila jakutumidwa pa cilambo capasi.

⁷ Jwalakwejo jwayice ni kupocela cipukutu cila cicaliji mu ligasa lyamlyo lya jwakutama pa citengu ca ucimwene jula.

⁸ Piŵacipocele cipukutuco, ya umi mcece yila, pamo ni acakulungwakulungwa makumi gaŵili ni mcece ŵala, ŵagwile pasi pameso pa Mwanace Jwangondolojo. Jwalijose mwa acakulungwakulungwawo ŵakwete cida cakwimbila ca ngonji ni ulo sya golidi* sisyagumbele ni ubani.* Ubaniwo uli mapopelo ga ŵandu ŵa Mlungu.

⁹ Ŵamjimbilaga Mwanace Jwangondolo jula nyimbo jasambano aji jakuti: “Wawo akuŵajilwa kupocela cipukutuci, ni kumatukula yimatilo yakwe. Pakuti ŵawulajidwe, nipo ni miasi jawo wawo ŵamwombolele Mlungu ŵandu ŵa ngosyo syosope, ŵa ciŵeceto cilicose, ni mtundu uliwose.

¹⁰ Ŵalakwe ŵatesile jemanjajo kuŵa ucimwene wa ŵakutaga mbopesi ŵakumtumicila Mlungu jwetu, soni jemanjajo tacilamulila pacilambo capasi.”

¹¹ Kaneko pinalolite, napikene masegwe ga malayika gangaŵalanjika gali gajimi mwakusyungulila citengu ca ucimwene, ya umi mcece yila ni acakulungwakulungwa mcece ŵala.

¹² Napikene malayikago gali mkwimba mwakwesya gacitiji kuti, “Mwanace Jwangondolo juŵawulajidweju, akuŵajilwa kupocela macili, yipanje, lunda, ulamusi, ucimbicimbi, lumbili ni matogolelo.”

¹³ Napikene soni maloŵe ga ciwumbe cilicose cakwinani, ca pa cilambo capasi, soni ca m'nyasa. Yiwumbe yosope yeneyo yajimbaga maloŵe gakuti, “Jwele jwakutama pa citengu ca ucimwene jula, ni soni kwa Mwanace Jwangondolo, apocele matogolelo, ucimbicimbi, lumbili ni macili mpaka ndaŵi syosope!”

¹⁴ Ya umi mcece yila yatite, “Ami,”* nipo acakulungwakulungwa ŵala ŵatindiŵele pasi ni ŵalambile.