Chunukuko 4 - Chiyawo Bible

Mesomkulola ga Mlungu ali pa citengu cakwe kwinani

¹ Pinamasile kuyiwona yindu yosopeyi, nasagamile soni ni naweni kuti kwaliji kwana mlango kwinani. Nipo napikene jwine ali mkuŵeceta ni une mu liloŵe mpela linapikene pandanda lila, lilyapikanikaga mpela lipenga. Ŵasalile kuti, “Myice akuno kuti nimlosye yindu yitiyitendekwe pitiyimale yeleyi.”

² Ndaŵi jijojo Msimu wa Mlungu waliji mkulamulila une, nipo kwinaniko naciweni citengu ca ucimwene, nambo jwine ali atemi pa citengupo.

³ Uwonece wa juŵatemi pa citengupo waliji mpela maganga ga mtengo wapenani gakolanjidwa jasipa ni kaneliyani, nambo soni kusyungulila citenguco paliji pana ukunje wa ula, wele uwonece wakwe waliji mpela liganga lya emeladi.

⁴ Kucisyungulila citengu ca ucimweneco papali yitengu yine ya ucimwene makumi gaŵili ni mcece. Pa yitengupo patemi acayimwene makumi gaŵili ni mcece ali awete yakuwala yeswela ni yisindi ya golidi* ya ucimwene ku mitwe jawo.

⁵ Kutyocela mu citengumo mwakopokaga kumesya kwa njasi, masegwe ni kulindima. Pasogolo pa citengupo cicoco pakolelaga yenje msano ni yiŵili, yele yili misimu msano ni jiŵili ja Mlungu.

⁶ Pasogolo pakwe pa citenguco, japali mpela nyasa ja ligalasi lyakunyesima. Pacilikati, kuwusyungulila mpando wa ucimwene ula, yapali ya umi mcece, yiyakwete meso kosekose, kusogolo ni munyuma mwakwe.

⁷ Cacijumi candanda caliji mkuwoneka mpela lisimba, caŵili caliji mkuwoneka mpela ng'ombe, catatu cakwete ngope mpela ja mundu, nipo ca mcece caliji mkuwoneka mpela nyanga jijaliji mkuguluka.

⁸ Ca umi cilicose cakwete mapapiko msano ni limo, soni yakwete meso posepose ni mkati mwakwe. Cilo ni musi yaliji mkwimba mwangalecesya kuti, “Ŵaswela, ŵaswela, ŵaswela ali Ambuje, Mlungu Jwamaciligosope juŵapali, jwapali, ni jwele jwakwisa.”

⁹ Pandaŵi josope jeneji, ya umiyo yaliji mkwimba nyimbo syakupeleka lumbili, ucimbicimbi ni matogolelo kwa jwele juŵatemi pa citengu ca ucimwene cila, jwele jwakwete umi mpaka ndaŵi syosope.

¹⁰ Piyaliji mkutendekwa yeleyi, acakulungwakulungwa ŵakwana makumi gaŵili ni mcece ŵala ŵaliji mkuligwisya pameso pa juŵatemi pa citengu ca ucimwene jula, ni kumlambila jwele jwakwete umi ndaŵi syosopejo. Jemanjajo ŵaponyaga yisindi yawo pasi pameso pa citenguco nipo ŵaŵecetaga kuti:

¹¹ “Ambuje Mlungu jwetu, ŵalakwe ali ŵakwenela kupocela lumbili, ucimbicimbi ni macili. Ŵalakwe ŵapanganyisye yindu yosope, mwa lisosa lya ŵalakwe, ŵasacile kuti yosopeyi yiŵe yana umi.”