Chunukuko 22 - Chiyawo Bible

¹ Kaneko lilayika lila lyandosisye lusulo lwa mesi gakupeleka umi. Mesi ga mu lusulomo galiji gakunyesimila mpela ligalasi, nipo lwatyocelaga ku citengu ca Ucimwene wa Mlungu* ni wa Mwanace Jwangondolo.

² Lusulolo lwajendaga sikati ja mu msewu wa mu msinda ula. Mbali jilijose ja lusololo mwapali citela cakupeleka umi, cele cikusasogola yisogosi pa caka ka likumi ni kaŵili, kulosya kuti kamo pa mwesi umo, mitundu ja ŵandu ŵa pa cilambo pano akusakamulisya masengo masamba gakwe mpela mtela wakuposya yilwele.

³ Mu msindamo ngasimusimanikwa kandu kalikose kelwesece. Citengu ca ucimwene ca Mlungu ni Mwanace Jwangondolo jula ticiciŵa mu msindamo, nipo ŵakutumicila ŵakwe tacimlambila jwalakwejo.

⁴ Jemanjajo tacijiwona ngope jakwe, nipo lina lya Mlungu tilicilembedwa pawusyo syawo.

⁵ Tikuciŵa kwangali cilo, nipo kuŵala kwa nyali kapena kwa lyuŵa ngasikusosekwa, pakuti Ambuje Mlungu taciŵa kuŵala kwa jemanjajo, nipo tacilamulila mpela ayimwene ndaŵi syosope.

Ya kwisa kwa Yesu

⁶ Kaneko lilayika lyasalile une kuti, “Maloŵega gali gasyesyene nipo gakusosekwa kugakulupilila. Nipo Ambuje Mlungu jwa misimu ja ŵakulocesya, ŵatumile lilayika lyakwe kuti ŵalosye ŵakutumicila ŵawo yayikwenela kutendekwa pangakaŵa.”

⁷ Yesu* akuti, “Mpikanicisye, une ngwisa pangakaŵa! Ŵana upile ŵandu ŵakukuya maloŵe ga m'buku ajino gagakusala cilepe ya msogolo.”

⁸ Une ndili Yohane, junapikene ni kuyiwona yeleyi. Pinamasile kupikana ni kuyiwona yeleyi naligwisisye pa sajo sya lilayika lilyandosisye yindu yosopeyi, nipo naliji ciŵandika kumlambila.

⁹ Nambo jwalakwejo ŵasalile kuti, “Mkatenda myoyo. Une ndili jwakutumicila wamba mpela m'mwejo, mpela acalongo acimjenu ŵakulocesya, nambo soni mpela wosope ŵene ŵakusagapikanila maloŵe gakulembedwa m'buku ajino. Mumlambileje Mlungu.”

¹⁰ Kaneko ŵasalile kuti, “Mkasisa maloŵe ga m'buku ajino gigakusala cile ya yiticitendekwa msogolo, pakuti ndaŵi jakwe jili pakuŵandicila jakuti yitendekwe yeleyi.

¹¹ Jwakutenda yakusakala apitilisye kutenda yakusakalayo, soni jwasakele ligongo lyakutenda yangalumbana apitilisye kuŵa jwakusakala. Jwali jwambone apitilisye kutenda yambone, soni jwali jwamswela mtima apitilisye kuŵa jwamswela mtima.”

¹² Yesu akuti, “Mpikane, ngwisa pangakaŵa! Ngwisa ni mbote syangu kuti nimpe jwalijose malinga ni masengo gapanganyisye.

¹³ Uneji ndili Alefa ni Omega, gopolela kuti jwandanda ni jwakumalisya, ndande ni mbesi.”

¹⁴ Ŵana upile ŵele ŵakusacapa mikanjo jawo mwakujiswejesya, kuti akole ukoto wakulya yisogosi ya mcitela cakupeleka umi, ni kwinjila mu msinda kupitila pa yipata.

¹⁵ Nambo ŵakutenda ya usakwa, usaŵi, ya lilama, kuwulaga acimjawo, kulambila tumilungu twakupanganyidwa, ni ŵakunonyela ya mabosa m'maloŵe ni mu yitendo, taciŵa kusa kwa msindawo.

¹⁶ “Une Yesu, ndumile lilayika lyangu kuti lijenesye yindu yeleyi kwa jemanja ku mipingo. Une nawumile ku liŵasa lya Mwenye Daudi.* Une ndili ndondwa jakolanjidwa Mng'andu.”

¹⁷ Msimu Ŵaswela ni jwamkongwe jwa ulombela akuti, “Myice!” Jwalijose jwakugapikana maloŵega aŵecete kuti, “Myice!” Jwalijose jujimkwete njota, ayice; jwalijose jwakugasosa mesi agapocele mwalulele mesi gakupeleka umi.

Maloŵe gambesi

¹⁸ Une Yohane, ngumtetela jwalijose jwakugapikana maloŵe ga m'buku ajinoga gigakusala ya yiticitendekwa msogolo. Naga jwine tacijonjecesyapo kandu pa maloŵe gelega, Mlungu tacimjonjecesya pa cilango cakwe milili jajilembedwe m'bukumu.

¹⁹ Naga jwine tacityosyapo kandu pa maloŵe ga m'buku ajino jajikusala ya yele yiticitendekwa msogolo, Mlungu tacimtyocesya jwalakwejo mbuwa ja yisogosi ya mcitela cakupeleka umi cila nambo soni mu Msinda Weswela ula, mpela muyilembedwele m'buku ajino.

²⁰ Jwele jwakupelecela umboni pa yeleyi akuti, “Elo, ngwisa pangakaŵa.” Yiŵe myoyo. Ayice, Ambuje Yesu!

²¹ Umbone mtima wa Ambuje Yesu uŵe pa jemanja wosope. Ami.*