Chunukuko 21 - Chiyawo Bible

Kwinani kwasambano ni cilambo capasi casambano

¹ Kaneko nakuweni kwinani ni cilambo capasi casambano. Pakuti kwinani kwandanda kula ni cilambo capasi candanda cila yaliji yili yityosile, soni nyasa jila paliji pali pangali.

² Nawuweni Msinda Weswela, Yelusalemu jwasambano, uli mkutuluka kutyocela kwinani kwa Mlungu. Waliji mpela jwamkongwe jwa ulombela jwawete cakuwala ca ulombela nipo ali cile kuti asimane ni ŵamkwakwe.

³ Napikene maloŵe gamacili mnope gakutyocela ku citengu ca ucimwene gacitiji kuti, “Sambano malo gakutama Mlungu gali sikati ja ŵandu. Jwalakwejo taciŵa ni jemanjajo nipo jemanjajo taciŵa ŵandu ŵakweŵakwepe. Mlungu msyene taciŵa ni jemanjajo, nipo taciŵa Mlungu jwawo.

⁴ Jwalakwejo tacapukuta misosi josope m'meso mwawo. Ngasipapagwa ciwa, canasa, kulila, kapena kupikana yipwetesi. Yindu yakala yosope yeneyi yimasile.”

⁵ Kaneko juŵatemi pa citengu cakulamulila jula jwatite, “Sambano tinayisandusye yindu yosope kuti yiŵe yasambano.” Ŵaŵecete soni kuti, “Lembani yeleyi pakuti maloŵega gali gasyesyene soni komboleka kugakulupilila.”

⁶ Nipo ŵasalile une soni kuti, “Yindu yosope yeneyi yimasile kutendekwa. Une ndili Alefa ni Omega, gopolela kuti jwandanda ni jwakumalisya. Jwalijose jwajimkwete njota, tinjimpa mesi galulele gakutyocela pa nduluko sya mesi gakupeleka umi.

⁷ Jwalijose jutacipunda tacipocela yeleyi, nipo une tinjiŵa Mlungu jwakwe, soni jwalakwejo taciŵa mwanangu.

⁸ Nambo ŵandu ŵa woga, ŵangakulupicika, ŵakunonyela yakusakala, ŵakuwulaga acimjawo, ŵakunonyela kutenda ya lilama, ŵakutenda ya usaŵi, ŵakulambila tumilungu twakupanganyidwa, ni ŵandu wosope ŵa unami, malo gawo gali nyasa jegumbale ni moto ni maganga gakolela ga sulufule.* Celeci cili ciwa caŵili.”

Yelusalemu jwasambano

⁹ Naliweni limo mwa malayika msano ni gaŵili gala, gigakwete mbale msano ni siŵili syegumbale ni yisawusyo msano ni yiŵili yakumalisya yila nipo lilayikalyo lyaŵecete ni une licitiji kuti, “Kwende akuno ngamlosye jwamkongwe jutaciwa ŵamkwakwe ŵa Mwanace Jwangondolo.”

¹⁰ Myoyo mwakamucisidwa ni Msimu, ŵanjigele une ni kwawula penani pasyesyene pa litumbi lyelewu mnope. Pelepo ŵandosisye Msinda Weswela ula wa Yelusalemu uli mkutuluka kutyocela kwinani kwa Mlungu.

¹¹ Lumbili lwa Mlungu lwawutendesyaga msindawo kuti uŵale mnope. Kuŵala kwakwe kwaliji mpela kuŵala kwa liganga lya mtengo wapenani, lyamti mbee lyakolanjidwa jasipa lyele lyakunyesimila mpela ligalasi.

¹² Msindawo wakwete lipupa lwekulungwa ni lwelewu. Lipupalyo lwakwete yipata likumi ni yiŵili, pa yipatapo gapali malayika msano ni gaŵili, nipo matanga gakwe palembedwe mena likumi ni gaŵili ga ngosyo sya ku Isalaeli.

¹³ Mbali syosope sya lipupalyo kwaliji kwana yipata yitatuyitatu: kungopoko lyuŵa yipata yitatu, kumpoto yipata yitatu, kungapilo lyuŵa yipata yitatu ni kum'mwela kwapali soni yipata yitatu.

¹⁴ Lipupa lya msindawo lwataŵidwe pa yilimbilimbi likumi ni yiŵili, nipo pa yilimbilimbiyo palembedwe mena ga ŵandumetume likumi ni ŵaŵili ŵa Mwanace Jwangondolo.

¹⁵ Lilayika lilyaŵecete ni une lyakwete simbo jakupimila ja golidi,* jakuti akamulisye masengo pakuwupima msindawo, yipata ni mapupa gakwe.

¹⁶ Msindawo waliji wakulandana mbali syosope syene mcece, mcilewu ni mcijipi mwakwe mwaliji mwakulandana. Lilayika lila lyapimile msindawo mwakuwusyungulila pakukamulisya masengo simbo jakwe jila, nipo ŵasimene kuti kukandapala kwakwe kwaliji makilomita 2,400. Mcilewu, mcijipi ni msingu wakwe yosope yaliji yakulandana.

¹⁷ Kaneko lilayika lila lyapimile lipupa lwa msindawo ni ŵasimene kuti msingu wakwe waliji mamita makumi msano ni limo ni msano. Lilayikalyo lyakamulisyaga masengo mpimo uŵakamulisyaga ŵandu masengo.

¹⁸ Lipupa lya msindawo lyaliji lya maganga gakolanjidwa jasipa, nipo msinda usyesyenewo waliji wa golidi, juŵaŵalaga mpela ligalasi.

¹⁹ Yilimbilimbi ya msindawo yasalalisidwe ni maganga ga mitundu mitundu ga mtengo wapenani. Cilimbilimbi candanda casalalisidwe ni liganga lya jasipa, caŵili ni liganga lya safilo, catatu ni liganga lya agate,* ca mcece ni liganga lya emeladi,

²⁰ ca msano ni liganga lya onikisi, ca msano ni cimo ni caliji ca liganga lya kaneliyani, ca msano ni yiŵili caliji ca liganga lyacikasu lya kilisolaiti, lya msano ni yitatu caliji ca liganga lya belili,* ca msano ni mcece caliji ca liganga lya topasi,* ca likumi caliji ca liganga lya kasedoni, ca likumi ni limo caliji ca liganga lya yasinti,* ca likumi ni gaŵili caliji ca liganga lya ametisiti.*

²¹ Cipata cilicose ca matanga likumiga capanganyidwe ni liganga lyakolanjidwa pelilu. Cipata cilicose capanganyidwe ni limo mwa liganga lya mtundu welewu. Msewu wa mu msindamo waliji wakupanganyidwa ni golidi jwambone, wele waŵalaga mpela ligalasi.

²² Ngininajiwona soni Nyumba ja AMBUJE mu msindamo, pakuti nyumba jakwe jili Ambuje Mlungu, Ŵamaciligosope ni soni Mwanace Jwangondolo jula.

²³ Pangali ligongo lyakuti lyuŵa kapena mwesi yiŵalileje pa msindapo, pakuti lumbili lwa Mlungu ni lwele lukusaŵalilapo, nipo nyali jakwe jili Mwanace Jwangondolo jula.

²⁴ Ŵandu ŵa mitundu josope tacijenda mu lilanguka lyakwe lya msindawo, nipo ayimwene wosope ŵa pa cilambo cosope capasi taciyika yipanje yawo mwelemo.

²⁵ Yipata yakwe tiyiciŵa yangawugala lisiku lililyose, ligongo kweleko tikuciŵa kwangali cilo.

²⁶ Nipo taciyika ni lumbili lwa ŵandu ŵa mitundu josope, pampepe ni yipanje yawo.

²⁷ Nambo mwelemo ngasikajinjila kandu kalikose kakusakala, kapena mundu jwalijose jwakutenda yakusakala kapena jwa unami. Awo pewo ŵele mena gawo galembedwe mu buku ja umi ja Mwanace Jwangondolo jula ni ŵele utacijinjila mu msindamo.