Chunukuko 20 - Chiyawo Bible

Yaka 1,000

¹ Kaneko naliweni lilayika lilimkutuluka kutyocela kwinani, myala mwakwe lyaliji lili likamulilile kiyi jwa kwisimbo lyangali mbesi kula, nambo soni unyolo wekulungwa.

² Ŵacikamwile cingwena cila, lijoka lyakala lila lyele lyalikukolanjidwa Jwakusakala kapena Satana* ni kucitaŵa kwa yaka 1,000.

³ Lilayika lyaciponyisye calakweco mwisimbo lila, ni kuciwugalila mwelemo ni kusiŵa pakuwugalilapo kuti cikusalambusya soni kwa mitundu ja ŵandu mpaka yili yimasile yaka 1,000 yila. Pitiyicimala yeleyo akwenela kucigopola soni kwa ndaŵi japanandi.

⁴ Kaneko nayiweni yitengu ya ucimwene, nipo jwakutama pa yitengupo ŵapegwile macili gakulamula. Najiweni soni misimu ja ŵandu ŵiŵakatile pa lukosi ligongo lyakumtendela Yesu* umboni, nambo soni ligongo lyakulalicila maloŵe ga Mlungu. Jemanjajo nganacilambila nawo cilombo cila kapena cilandanyo cila, nambo soni jemanjajo ŵakanile kulembedwa cimanyisyo cila pawusyo pawo kapena pamkono. Ŵaliji soni cijumi ni kulamulilaga pampepe ni Klistu* yaka 1,000.

⁵ (Wosope ŵiŵaliji ali awile nganajimuka soni mpaka pakumala pa yaka 1,000 yila.) Kweleku kuli kwimuka kwandanda.

⁶ Ŵana upile ŵandu ŵitacijimuka nawo pakwimuka kwandanda kweleku. Ciwa caŵili cangali macili pa jemanjajo, nambo taciŵa ŵakutaga mbopesi ŵa Mlungu ni ŵa Klistu, nipo tacilamulilaga pampepe ni jwalakwejo kwa yaka 1,000.

Kupundidwa kwa Satana

⁷ Yili yimasile yaka 1,000 yila, Satana tacikoposyedwa mu ukayidi mula,

⁸ pa ndaŵi jeleji jwalakwejo tacijaga kukwalambusya Gogi ni Magogi. Jeleji jili mitundu ja ŵandu jakutama ku mitepa mcece ja cilambo. Satana tacasonganya jemanjaji kuti atende ngondo. Winji wa ciŵalanjilo cawo cili mpela msanga wa ku nyasa.

⁹ Ŵajesile pa cilambo cosope capasi ni kugasyungulila masakasa ga ŵandu ŵa Mlungu, ni msinda wele Mlungu akusawunonyela. Nambo moto watulwice kutyocela Kwinani ni kwajonanga jemanjajo.

¹⁰ Pelepo Satana juŵalambwisye jula, ŵaponyedwe m'nyasa ja moto jegumbale ni maganga ga sulufule* gakolela, mumwaliji cilombo cila ni jwakulocesya jwa unami jula. Mwelemo tacilagasidwa cilo ni musi mpaka ndaŵi syosope.

Kulamula kwambesi

¹¹ Kaneko naciweni citengu ceswela ni jwele jwakusatama pelepo. Cilambo capasi ni ca kwinani yatisile pameso pakwe, mwakuti nganiyiwoneka soni.

¹² Naweni soni ŵandu ŵawe, ŵacanandi ni ŵacakulungwa, ali ajimi pameso pa citengu. Mabuku galiji gali gewugulidwe, kaneko buku jine jawugulidwe soni, buku ja ŵacijumi. Ŵandu ŵawe ŵalamulidwe malinga ni yiŵatesile, mpela muyalembedwele m'buku.

¹³ Kaneko nyasa japelece uŵawilile mwelemo. Ciwa ni malo ga ŵandu ŵawe* nombe nayo yapelece ŵandu uwawilile mwelemo, nipo ŵalamulidwe malinga ni yiŵatesile.

¹⁴ Kaneko ciwa ni malo ga ŵandu ŵawe yila yaponyedwe m'nyasa ja moto. Nyasa ja moto jeleji jili ciwa caŵili.

¹⁵ Jwalijose jwakusimanikwa kuti lina lyakwe nganililembedwa mu buku ja umi jila, ŵaponyedwe m'nyasa ja moto.