Chunukuko 2 - Chiyawo Bible

Utenga wakuja kwa aklistu ŵa mu msinda wa Efeso

¹ “Kwa jwakulongolela mpingo* wa ku Efeso mlembe kuti: “Aga gali maloŵe ga jwele jwakamulile ndondwa msano ni siŵili ku mkono wakwe wamlyo, ni kwenda sikati ja yakuŵikapo nyali msano ni yiŵili ya golidi* yila.

² Ngumanyilila yosope yimtesile. Ngumanyilila kuti mŵele mli mkukamula masengo mwakulimbangana ni yimtesile pakupimilila. Ngumanyilila soni kuti ngimwalecelela ŵandu ŵa ulemwa. Mwalinjile kala ŵandu ŵakusalikolanga kuti ndumetume nambo ali nganaŵa, nipo asimanikwe kuti ali ŵa unami.

³ Jemanja mli ŵakupimilila mnope, soni mlasile mnope ligongo lya une, nganimpela.

⁴ Nambo papali pakumsisicisya: pelepo ni apa pakuti jemanja ngamkunonyela une mpela mumwatendelaga pandanda mula.

⁵ Mkumbucile mumsimanikwile kuti mgwile mu ulemwa. Mpitikuce mtima ni kutamaga umi wenu mpela mumwatendelaga pa ndaŵi jimwakulupilile mwa une. Naga mkupitilisya kulemwa tinjiyika kwa m'mwejo ni kumpa cilango pakumtyocesya cakuŵikapo nyali cenu pa malo gakwe.

⁶ Nambo cakumsalalila cenu ni aci cakuti, mkusaŵengana ni yitendo ya Anikolayi,

⁷ “Jwele jwakwete mapikanilo, apikanicisye yele Msimu akujisalila mipingoji. “Kwa ŵele ŵitacipunda tinjapa upile wakulya yisogosi ya mcitela cakupeleka umi cacili mu mgunda wakusalala wa Mlungu.

Utenga wakuja kwa aklistu ŵa mu msinda wa Similina

⁸ “Kwa jwakulongolela mpingo wa ku Similina mlembe kuti: “Awu uli utenga wakutyocela kwa jwele jwali Jwandanda ni Jwambesi, jwele juŵawile ni kuŵa soni cijumi.

⁹ Jwalakwejo akuti: Ngumanyilila yisawusyo ni usawuci wenu, nambo mu yindu ya usimu jemanja mli ŵakusicila. Ngumanyilila soni yakusati pakumlalatila ŵandu ŵele ŵakusalikolanga kuti Ayuda, nambo citamileco jemanjajo ali ŵa mpingo wa Satana.

¹⁰ Mkatenda woga ni yisawusyo yimkusimana nayo. Satana tacimponya ŵane ŵa jemanja mu ukayidi kuti amlinje, nipo timcilaga kweleko kwa masiku likumi. Mŵeje ŵakulupicika, atamose mli mkuyiwona kuti tiyimjigalile ku ciwa, nipo une tinjimpa umi mpela mbote pakupunda kwenu.

¹¹ “Jwele jwakwete mapikanilo, apikanicisye yele Msimu akujisalila mipingoji. “Ŵele ŵitacipunda, ciwa caŵili ngasicikola macili pa jemanjajo.

Utenga wakuja kwa aklistu ŵa mu msinda wa Peligamamu

¹² “Kwa jwakulongolela mpingo wa ku Peligamamu mlembe kuti: “Awu uli utenga wakutyocela kwa jwele jwakwete upanga wakutema kosekose ula.

¹³ Ngukumanyilila kumkusatama, kweleko ni kukuli citengu ca ucimwene wa Satana. Jemanja mli ŵakulupicika kwa une, nganimjasa cikulupi cenu, atamose pa ndaŵi ja Antipa mboni jangu jakulupicika, ŵawulajidwe kweleko kwakusatama Satana.

¹⁴ Nambo pana yindu panandi yakuti nimsisye nayo: Kumangwenuko kwana ŵandu ŵane ŵakukuya majiganyo ga Balamu jwakulocesya jwa unami jula. Jwalakwe jula ŵajiganyisye mwenye Balaki kwakopa Aisalaeli kuti alyeje ya mbopesi jakupelecedwa ku tumilungu twawo ni kutenda cikululu.

¹⁵ Myoyo soni jemanja mkwete ŵandu ŵane pasikati penu ŵakukuya majiganyo ga Anikolayi.

¹⁶ Sambano mpitikuce mitima jenu ku ulemwa, naga ngamkutenda myoyo, une tinjiyika kumangwenuko pangakaŵapa, nipo tinjiputa ngondo ni jemanja ni upanga wakopocela mkamwa mwangu ula.

¹⁷ “Jwele jwakwete mapikanilo, apikanicisye yele Msimu akujisalila mipingoji. “Kwa ŵele utacipunda, tinjapa cakulya cakusisika ca mana. Tinjapa soni liganga lyeswela pelembedwepo lina lyasambano, lyakulimanyilila jwalakwejo msyene, ngaŵaga jwine jwalijose.

Utenga wakuja kwa aklistu ŵa mu msinda wa Tiyatila

¹⁸ “Kwa jwakulongolela mpingo wa mu msinda wa Tiyatila mlembe kuti: “Awu uli utenga wakutyocela kwa Mwanace jwa Mlungu, jwele meso gakwe gakusaŵala mpela lilamba lya moto, soni sajo syakwe sili mpela cisyano cakunyesima.

¹⁹ Ngumanyilila masengo genu gosope. Ngumanyilila cinonyelo ni kulupicika kwenu, ni kupimilila kwenu kwakulimbangana. Ngumanyilila kuti masengo genu ga sampano gejinji, gali gambone kupunda gakala gala.

²⁰ Nambo pakumsisicisya papali: pelepo pali pakuti mkusamlecelela jwamkongwe jula Yesebele, jwakusalikolanga kuti ali jwakulocesya. Jwalakwe jula akwalambusya ni kwajiganya ŵakutumicila ŵangu kuti atendeje cikululu ni kulya yindu yepelecedwe mbopesi ku tumilungu twawo.

²¹ Napele lipesa lyakuti apitikuce mtima, nambo ngakusaka kupitikuka mtima ni kuleka ungakulupicika wakwe.

²² Myoyo tinjimŵika jwalakwejo mu yipwetesi, soni jutatende nawo cikululu, tinjaŵika pa yipwetesi yekulungwa, naga ngapitikuka mtima ni kuleka yakusakala yiŵatendaga nawo Yesebelewo.

²³ Tinjawulaga soni ŵanace ŵakwe. Myoyo mipingo josope tijicimanyilila kuti une ndili ajula jungusamanyilila ya m'mitima mwa ŵandu ni mu nganisyo syawo. Tinjipeleka kwa jwalijose jwa jemanja malingana ni masengo gakwe.

²⁴ “Nambo kwa jemanja ŵa ku msinda wa Tiyatila, nganimkuya nawo majiganyo ga unamiga, soni jemanja nganimlijiganya ayila yiŵatiga kuti yakusisika yakusokoka ya Satana. Kwa jemanja maloŵe gangu gali gakuti nganimpwatika malamusi gane,

²⁵ nambo jemanja mgambe kwikamulisya mnope yimwalijiganyisye, mpaka pa ndaŵi jitinjiyika une.

²⁶ Ŵele ŵitacipunda ni kutenda mpaka pambesi yele yinimlamwile, tinjapa ulamusi pa mitundu josope ja ŵandu.

²⁷ Tacijilamulila mitundu jeleji ni simbo ja cisyano, ni kujikasakasa mwakusatendela ni ciŵiga. Ulamusi welewu ni unapocele une kutyocela kwa Atati.

²⁸ Tinjapa soni jemanjajo ndondwa ja mng'andu, jajikusaŵala mnope kundaŵi jila.

²⁹ “Jwele jwakwete mapikanilo, apikanicisye yele Msimu akujisalila mipingoji.