Chunukuko 19 - Chiyawo Bible

¹ Piyamasile yeleyi napikene mpela masegwe ga ŵandu ŵajinji kwinani, nipo gatiji kuti, “Kwende tumlumbe Mlungu! Cikulupusyo, lumbili ni macili yili yakwe ya Mlungu jwetu.

² Kulamula kwakwe kuli kwakuwona ni kwakulungamika. Jwalakwejo ŵamlamwile jwamkongwe jwakulijesya jula juŵasakasyaga cilambo capasi mtande wa cikululu cakwe. Mlungu ampele jwalakwejo cilango ligongo jwawuleje ŵakutumicila ŵakwe.”

³ Kaŵili maloŵe gala gatite soni kuti, “Kwende twalumbe Ambuje! Lyosi lya mu msinda mula tulucikwela kwinani ndaŵi syosope.”

⁴ Acakulungwakulungwa makumi gaŵili ni mcece, pamo ni ya umi mcece yila yatindiŵele ni kumlambila Mlungu, juŵatemi pa citengu cakwe ca ucimwene. Jemanjajo ŵatite kuti, “Ami!* Kwende tumlumbe Mlungu!”

Cindimba ca ulombela ca Mwanace Jwangondolo

⁵ Kaneko kwapikanice liloŵe kutyocela ku citengu ca ucimwene cila, nipo lyatiga kuti, “Kwende tumlumbe Mlungu jwetu, ŵakutumicila ŵakwe wosope ni ŵandu ŵakwe wosope, ŵacakulungwa ni ŵacanandi ŵakwe, ni wosope ŵakusamjogopa jwalakwejo.”

⁶ Kaneko napikene maloŵe mpela ga namtindi jwa ŵandu, mpela kukokoma kwa mesi gejinji, nambo soni mpela kulindima kwa njasi. Napikene ali mkuŵeceta kuti, “Kwende tumlumbe Mlungu! Pakuti Ambuje, Mlungu jwetu, ali Mwenye!

⁷ Kwende tusengwe ni kusangalala, kwende twalumbe pa ukulungwa wakwe. Pakuti ndaŵi jiyice ja ulombela wa Mwanace Jwangondolo, soni jwamkongwe jwakwe aliŵicile cile ya ulombelawo.

⁸ Jwalakwejo apegwile nguwo jetakate jakunyesima jakutependala kuti awale, jegumbidwe cenene.” (Yakuwala yeswelayo yakunyesima yakutependala yikugopolela yitendo yambone ya ŵandu ŵa Mlungu.)

⁹ Kaneko lilayika lila lyasalile une kuti, “Lembani maloŵe aga gakuti, ‘Ŵana upile ŵandu ŵakuŵilanjidwa ku cindimba ca ulombela wa Mwanace Jwangondolo.’ ” Lilayikalyo lyajonjecesye soni kuŵeceta kuti, “Maloŵe gelega gali gasyesyene gakutyocela kwa Mlungu.”

¹⁰ Pelepo nagwile pasi pa sajo syakwe kuti nimlambile jwalakwejo, nambo ŵasalile une kuti, “Mkatenda myoyo! Une ndili jwakutumicila wamba, mpela mumŵelele m'mwejo ni ŵakulupilila ŵane. Jemanjajo ni ŵele ŵakusakuya yakuwona yisyesyene yiŵajuwile Yesu.* Myoyo mkwenela kumlambila Mlungu.” Pakuti umboni wa Yesu uli msimu wakulocesya.

Jwakukwela pa haci jeswela

¹¹ Kaneko nakuweni kwinani kuli kwewuguce, nipo japali haci jeswela. Jwakukwelapo jwakwe akusaŵilanjidwa ni lina lyakuti “Jwakulupicika nambo soni Jwakuwona.” Ni kulungamika kwakweko akusalamula ni kuputa ngondo syakwe.

¹² Meso gakwe galiji gecejele mpela lilamba lya moto, nambo soni pa mtwe pakwe ŵawete yisoti yejinji ya ucimwene. Ŵakwete lina lyakulembedwa, lyakulimanyilila jwalakwejo msyene jikape, ngaŵaga jwine jwalijose.

¹³ Cakuwala cakwe caliji ca miasi miasipe. Lina lyakwe lyaliji “Maloŵe ga Mlungu.”

¹⁴ Makuga ga ngondo ga kwinani gamkuyaga gali gakwesile pa mahaci geswela soni gali gawete yakuwala yayiswela yakutependala.

¹⁵ Pakamwa pakwe wakopwece upanga wakutema mnope, wele utacikamulisya masengo pakuyipunda yilambo. Tacalamulila jemanjajo ni mwa ngalwe, nipo taciliŵataliŵata finyo pa malo gakuminyila finyo jwa lutumbilo lwa ukali wa Mlungu Jwamaciligosope.

¹⁶ Pa mkanjo wakwe nambo soni pa ciga cakwe palembedwe lina lyakuti: “Mcimwene jwa ayimwene wosope ni Ambuje ŵa acambuje wosope.”

¹⁷ Kaneko naliweni lilayika lili lijimi pa lyuŵa. Lyagumisile mwakwesya maloŵe, ni kuyisalila yijuni yosope yakuguluka mwinani kuti, “Myice msongane pampepe ku cindimba cekulungwa ca Mlungu.

¹⁸ Myice kukulya mnowu wa ayimwene, wa acakulungwa ŵa ngondo, asilikali, mnowu wa mahaci ni ŵakukwelapo ŵakwe, mnowu wa ŵandu wosope, alukosyo ni acikapolo, ŵandu ŵacanandi ni acakulungwa.”

¹⁹ Kaneko naciweni cilombo ni ayimwene ŵa cilambo capasi ni makuga ga asilikali ŵawo ŵa ngondo. Jemanjaji ŵasongene kuti amenyane ngondo ni jwakukwela pa haci jula, pamo ni likuga lyakwe lya ngondo.

²⁰ Cilombo cila cakamwilwe kuja ku ukayidi, pampepe ni jwakulocesya jwa unami jwele juŵaliji ali atesile yakumasya lunda pameso pakwe. (Yaliji kupitila mu yakumasya lunda yiŵatesila jwalakwejo, myoyo ŵaliji ali ŵalambwisye ŵandu ŵiŵalembegwe cimanyisyo ca cilombo cila, nambo soni ŵandu ŵiŵaliji ali alambile cilandanyo cakwe cila.) Cilombo cila pampepe ni jwakulocesya jwa unami jula ŵaponyedwe ali ŵacijumi mu Nyasa ja moto jakukolela ni maganga ga sulufule.

²¹ Asilikali ŵawo ŵa ngondo ŵala ŵawulajidwe ni upanga uwakopwece mkamwa mwa jwele juŵakwesile pa haci jula; nipo yijuni yosope yalile ni kwikuta mnowu wa ŵandu ŵala.