Chunukuko 17 - Chiyawo Bible

Ŵakongwe ŵakulijesya ŵakupikanika

¹ Kaneko limo mwa malayika msano ni gaŵili gigakwete mbale msano ni siŵili lyayice kwa une ni lyatite kuti, “Kwende akuno ngamlosye mutakapegwele cilango jwamkongwe jwakulijesya jwakupikanika jula, jwakutama mumbali mwa sulo syejinji.

² Ayimwene ŵa cilambo capasi ŵatendaga nawo cikululu, nambo soni ŵandu ŵakutama pa cilambo capasi ŵakolelwaga pamo ni jwamkongwejo finyo jwele pambesi pakwe jwalongolelaga kutenda cikululu.”

³ Sambano lilayika line lila lyanjigele mu usimu kwawula nane ku cipululu. Kweleko namŵeni jwamkongwe ali atemi pa cilombo cecejewu cele pa cilu pakwe posope palembedwe mena gakumnyosya Mlungu; cakwete mitwe msano ni jiŵili ni misengo likumi.

⁴ Jwamkongwejo jwawete yakuwala yecejewu ni yamlangali, yiŵayisalalisye ni golidi,* maganga ga mtengo wapenani ni yuma yamtengo wapenani yakolanjidwa pilu. Myala mwakwe ŵakwete mgawo wa golidi uwagumbele ni yakunyalaya ni yakusakala yakwe ya lilama.

⁵ Pawusyo pakwe palembedwe lina lilyakwete mate gakusisika gakuti: “Babiloni* jwamkulungwa, mama jwa acakongwe ŵakulijesya ni ya yakunyalaya ya pa cilambo cosope capasi.”

⁶ Nipo naweni kuti jwamkongwejo jwaliji ali akolelwe ni miasi ja ŵandu ŵa Mlungu, ni ŵandu uŵawulajidwe ligongo lyakutendela umboni lina lya Yesu.* Pinam'weni jwamkongwejo, nasimonjile mnope.

⁷ Nambo lilayika lila lyambusisye kuti, “Ana ligongo cici mkusimonga?” Tinamsalile yamtemela ya jwamkongweju ni cilombo cicimnyakwile jwalakwejo, cicikwete mitwe msano ni jiŵili ni misengo likumi.

⁸ Cilombo cimwaciweni cila, kala caliji ca umi, nambo sambano nganiciŵa soni cacijumi. Calakweco cikwenela kukopoka kutyocela mwisimbo mula ni kuja kukujonanjidwa. Ŵandu wosope ŵakutama pa cilambo capasi, ŵele mena gawo nganigalembedwa mu buku ja umi cipanganyikwile cilamboci, tacisimongaga pakuciwona cilomboco. Tacisimongaga pakuwona kuti kala caliji ca umi nambo sambano nganiciŵa ca umi soni, nambo msogolo muno ticiciwoneka soni.

⁹ “Apanotu pakusosekwa lunda ni kupikanicisya cenene: Mitwe msano ni jiŵili jila jikulandanicisidwa ni matumbi msano ni gaŵili pele pakutama jwamkongwe jula.

¹⁰ Jikulandanicisidwa soni ni ayimwene msano ni ŵaŵili. Mwa jemanjajo, msano ŵalepele, jumo akulamulilape, nipo jwine nganaŵe kwika; pitaciyikapo, tacilamulila kwa ndaŵi jamnono.

¹¹ Sambano cilombo cele kala cicaliji cijumi, nambo sambano nganiciŵa soni cijumi, cikulandanicisidwa ni mcimwene jwa msano ni katatu, nambo ali jumo jwa ayimwene msano ni ŵaŵili ŵala, nipo jwalakwejo akuja kukonanjidwa.

¹² “Misengo likumi jimkujiwonajo, jikuwanicisidwa ni ayimwene likumi ŵele nganatandepe kulamulila. Nambo tacipocela macili gakulamulila ayimwene pa awala jimpepe pamo ni cilombo cila.

¹³ Ayimwene likumiŵa, cakulinga cawo cili cimpepe, nipo akusapeleka macili gawo ni ulamusi wawo m'myala mwa cilombo cila.

¹⁴ Jemanjaji tacimenyana ngondo ni Mwanace Jwangondolo jula. Nambo Mwanace Jwangondolo jula tacapunda jemanjajo, pamo ni ŵandu ŵakwe ŵakuŵilanjidwa, ŵakusagulidwa ni ŵakulupicika, nombe nawo tacapunda jemanjajo pakuti jwalakwejo ali Ambuje ŵa Ambuje wosope, ni mwenye jwa Ayimwene wosope.”

¹⁵ Lilayika lila lyasalile soni kuti, “Mesi gimgaweni patemi jwamkongwe jwakulijesya pala, gakulandanicisidwa ni mitundu ja ŵandu, ngosyo sya ŵandu ŵajinji nambo soni ŵandu ŵa yiŵeceto yakulekanganalekangana.

¹⁶ Sambano misengo likumi jimwajiweni jila, pamo ni cilombo cila, tiyiciŵengana ni jwamkongwe jwakulijesya jula. Calakweco ticicimsumula jwalakwejo yakwe yosope ni kumleka ali makonope. Ticicilya mnowu wa jwamkongwejo, kaneko ni kumponya pa moto kuti atinice.

¹⁷ Tiyiciŵa myoyo, pakuti Mlungu ŵapelece mtima wakusaka kwa ayimwene kumalisya cakulinga cakwe. Ligongo lya cilanga* ca kupeleka macili gakwe ku cilombo kuti cilamulile, mpaka yili yitendekwe yele Mlungu yiŵaŵecete.

¹⁸ “Jwamkongwe jumwam'weni jula akulandanicisidwa ni msinda wekulungwa ula wawukulamulila ayimwene wosope ŵa pa cilambo capasi.”