Chunukuko 16 - Chiyawo Bible

Mbale sya lutumbilo lwa Mlungu

¹ Kaneko napikene maloŵe ga macili gakutyocela m'Malo Gamaswela Mnope gala. Ŵagasalile malayika msano ni gaŵili gala kuti; “Mjawulani, mkapungulile pa cilambo capasi ukali wa Mlungu, wele uli mu mbale msano ni siŵili sila.”

² Myoyo lilayika lyandanda lila lyapungulile ya mu mbale mwakwe pa cilambo capasi. Papopo yilonda yakunyalaya ni yakupweteka yabucile pa ŵandu wosope ŵala, ŵiŵalembegwe cimanyisyo ca cilombo cila, ni kulambila cilandanyo cakwe cila.

³ Kaneko lilayika lyaŵili lila lyakusulile ya mu mbale mwakwe pa nyasa. Pandaŵi jijojo mesigo gasandwice kuŵa miasi, miasi jakwe mpela ja mundu jwam'we. Myoyo ya umi yosope ya m'nyasamo yawile.

⁴ Kaneko lilayika lyatatu lyakusulile ya mu mbale mwakwe mu lusulo, ni pa nduluko sya mesi. Pandaŵi jijojo mesigo gasandwice kuŵa miasi.

⁵ Myoyo napikene lilayika lyakulamulila mesi lila lili mkuŵeceta kuti, “Ŵalakwe alamwile mwa cilungamo, Ŵalakwe ali Ŵaswela mnope, ŵapali nipo soni ŵapali kalakala.

⁶ Pakuti jemanjajo ŵasulwisye miasi ja ŵandu ŵa Mlungu, ni ŵakulocesya, ali ni ligongo lyakwe ŵapele jemanjajo miasi kuti amwe. Yeleyi ni yikwaŵajila jemanjajo.”

⁷ Kaneko napikene liloŵe kutyocela ku malo gakupelecela mbopesi. Liloŵelyo lyatite kuti, “Yisyene Ambuje, Mlungu Jwamaciligosope, kulamula kwawo kulikose kuli kwakuwona ni kwakulungamika.”

⁸ Kaneko lilayika lya mcece lyapungulile ya mu mbale mwakwe pa lyuŵa. Ndaŵi jijojo kaneko lyakundidwe kutinisya ŵandu ni mtukuta wakwe.

⁹ Ŵandu ŵatinice nawo mtukutawo nipo ŵatandite kulinyosya lina lya Mlungu, jwakwete ulamusi pa milili jeleji. Nambope jemanjajo nganapitikuka mitima kuti amlumbeje Mlungu.

¹⁰ Kaneko lilayika lya msano lyapungulile ya mumbale mwakwe pa citengu ca ucimwene wa cilombo cila. Ndaŵi jijojo cipi cayice posope piwaliji ucimwene wakwe. Ŵandu ŵalilumaga malulumi ligongo lya ululu uŵaliji mkuwupikana.

¹¹ Ŵatandite kulinyosya lina lya Mlungu jwa Kwinani ligongo lya yipwetesi ni yilonda yawo. Nambope nganapitikuka mtima ni kuleka yakusakala yiŵatendaga jemanjajo.

¹² Kaneko lilayika lya msano ni limo lyapungulile ya mu mbale mwakwe pa lusulo lwekulungwa lula lwa Yufuleti. Pandaŵi jijojo mesi ga mu lusulomo gapwele, kuti paŵe pana litala lyakupitilamo ayimwene ŵakutyocela kungopoko lyuŵa.

¹³ Kaneko najiweni misimu jitatu jakusakala, jele uwonece wakwe mpela yula jiyaliji mkukopoka jine kutyocelaga mkamwa mwa cingwena cila, ni jine mkamwa mwa cilombo cila, jine soni mkamwa mwa jwakulocesya jwa unami jula.

¹⁴ Jeleji ni misimu jakusakala jila jele jikusatenda yakumasya lunda. Jikusajawula posepose kwa ayimwene ŵa pa cilambo capasi kukwaŵilanga kuti ayice ku ngondo ja pa lisiku lyekulungwa jila lya Mlungu Jwamaciligosope lila.

¹⁵ “Mpikane, ngwisa mpela jwawiyi. Jwana upile mundu jwakuŵa mesope, acisungaga yakuwala yakwe, kogopela kuti atakwenda jwangawala, soni ŵandu atakuwuwona umakonope wakwe.”

¹⁶ Pelepo misimu jakusakala jila jasongenye ayimwene ŵala ku malo gele pa ciŵeceto ca Cihebeli malogo gakusakolanjidwa kuti “Alimagedo.”

¹⁷ Lilayika lya msano ni gaŵili lyapungulile ya mu mbale mwakwe mwinani. Pandaŵi jijojo, papikanice maloŵe gekulungwa gakutyocela ku mpando wa ucimwene ku Malo Gamaswela. Maloŵego gatite kuti, “Gamasile.”

¹⁸ Ndaŵi jijojo kwapali kumesya kwa njasi, masegwe ni kulindima kwatesile soni cisicinya cakogoya, mwakuti cipanganyikwile mundu pa cilambo capasici capasi nganicitendekweje cisicinya camti myoyo, pakuti celeco caliji cakogoya mnope.

¹⁹ Msinda wekulungwa ula wagaŵikene patatu, soni misinda ja mu yilambo yine yosope jagwile. Mlungu jwakumbucile Babiloni* jwamkulungwa, nipo ŵam'mwesisye mgawo wa lutumbilo lwakwe lwekulungwa.

²⁰ Yilumba yosope yasimasice, nipo matumbi nganigawoneka kose soni.

²¹ Matalila gekulungwa gagwilile ŵandu wosope kutyocela kwinani. Usito wa litalila lililyose waliji ciŵandika makilogalamu 45. Myoyo ŵandu ŵamnyosisye Mlungu ligongo lya mlili wa matalilawo, pakuti mliliwo waliji wakogoya mnope.