Chunukuko 14 - Chiyawo Bible

Ya nyimbo ja ŵakuwomboledwa

¹ Kaneko nalolite, ni nam'weni Mwanace Jwangondolo ali ajimi Petumbi lya Siyoni.* Pampepe ni jwalakwejo ŵapali ŵandu 144,000, ŵiŵalembegwe lina lyawo soni lina lya Atati ŵakwe pawusyo pawo.

² Sambano napikene liloŵe lyakutyocela kwinani mpela kukukuma kwa mesi gejinji, nambo soni mpela kugunda kwamacili kwa kulindima. Liloŵe linapikenelyo lyapikanikaga mpela kuti nyimbo sya yida yakwimbila ya ngonji.

³ Ŵandu ŵala ŵajimbaga nyimbo ja sambano pameso pa citengu ca ucimwene cila ni pameso pa ya umi mcece yila, ni acakulungwakulungwa ŵala. Nganawoneka ni jumo jose jwakulijiganya nyimbojo, akaŵe ŵandu 144,000 ŵala ŵiŵaliji ali awomboledwe ku cilambo capasi.

⁴ Jemanjaji ni ŵiŵaligosaga ngalisakasya ni acakongwe. Jemanjaji ni ŵakumsakuya Mwanace Jwangondolo jula kulikose kwakwawula. Jemanjajo ni ŵiŵawombolegwe sikati ja ŵandu ŵane wosope, kuti aŵe ŵandanda kupelecedwa kwa Mlungu ni kwa Mwanace Jwangondolo jula.

⁵ Nganaŵeceta ya unami, ŵangali cileŵi cilicose.

Ya malayika gatatu

⁶ Kaneko naliweni lilayika line lili mkuguluka mwinani. Lyakwete Ngani Syambone* syangamala syakuti akalalicile kwa ŵandu ŵa cilambo capasi, kwa ŵandu ŵa mtundu uliwose, ŵa lukosyo lululose, ni ŵa ciŵeceto cilicose.

⁷ Ŵaŵecete mwakwesya maloŵe kuti, “Mumcimbicisye Mlungu ni kumlumba jwalakwejo, pakuti jiyice ndaŵi jakwalamula ŵandu. Mumlambile jwele juŵapanganyisye kwinani, cilambo capasi, nyasa, ni nduluko sya mesi.”

⁸ Lilayika lyandanda lila pilyamasile kuŵeceta, lyayice lilayika lyaŵili lyakuyicisyana nawo. Lyatite kuti, “Mgwile, mgwile Babiloni* msinda wakupikanika mnope, ŵele umwamwesyaga finyo ŵandu ŵa mitundu josope, jwele pambesi pakwe jwatendesyaga ŵandu kuti asoseje kutenda ya lilama.”

⁹ Kaneko payice soni lilayika lyatatu lyakuyana ni gane gaŵili gala. Lyaŵecete mwakwesya maloŵe licitiji kuti, “Jwalijose jwakulambila cilombo cila ni ciwanicisyo cakwe, ni kulembedwa cimanyisyo pawusyo kapena pa ligasa,

¹⁰ nombe najo jwalakwejo tacimwa finyo jwaukali jwa Mlungu. Finyo jwakwe tacitajidwa nambo tipaciŵa pangali cakunandiya macili gakwe mu mgawo wa Mlungu. Mundujo tacilagasidwa ni moto ni maganga gakolela ga sulufule.* Yeleyi tiyicitendekwela pameso pa malayika ga Mlungu ni Mwanace Jwangondolo jula.

¹¹ Lyosi lya moto wakwasawusya jemanjajo likusakwela kuja kwinani mpaka ndaŵi syosope. Ŵandu ŵiŵacilambile cilombo cila ni cilandanyo cakwe, nambo uŵalembedwe cimanyisyo ca lina lyakwe cila, ngapata mtendele musi ni cilo.”

¹² Pelepa pakusosekwa kuti ŵandu ŵa Mlungu aŵe ŵakulupilila, ŵele ŵakugakuya malamusi gakwe nipo soni ŵakwete cikulupi mwa Yesu.*

¹³ Kaneko napikene maloŵe kutyocela kwinani gacitiji kuti, “Mlembe kuti, ŵana upile ŵandu ŵakuwa kutyocela sambano jino mpaka msogolo muno ali mkwatumicila Ambuje.” Msimu Ŵaswela akuti, “Elo, akwetedi upile kuti akapumule pa masengo gawo gakusitopesya, pakuti masengo gawogo gakusigakuya jemanjajo.”

Ndaŵi ja masika jiyice

¹⁴ Kaneko pinalolite naliweni liwunde lyeswela, pa liwundepo patemi jwine jwakwe juŵawonekaga mpela Mwanace jwa Mundu,* kumtwe ŵaliji ali awete cisindi ca golidi* ca ucimwene. M'myala mwakwe mwaliji mwana cikwakwa cakutema mnope.

¹⁵ Lilayika line lyakopwece m'Nyumba ja AMBUJE nipo ŵagumisile ni maloŵe gamakulungwa kwa jwele juŵatemi pewunde jula. Lilayikalyo lyatite kuti, “Mcikamulisye masengo cikwakwa cenu, mtande kukata yindu. Sambano jiyice ndaŵi jamasika, mwakuti yagowola ya pacilambo capasi yikomele kala.”

¹⁶ Myoyo juŵatemi pa liwunde jula jwagatandite masengoga ni cikwakwa cakwe, nipo ŵakatile yakugowola yosope ya pa cilambo capasi.

¹⁷ Kaneko lilayika line lyakopwece m'Nyumba ja AMBUJE kwinani. Nombe najo jwakwete cikwakwa cakutema mnope.

¹⁸ Kaneko lilayika line lilyalamulilaga moto, lyakopocele kutyocela ku malo gakupelecela mbopesi. Jwagumisile ni maloŵe gamacili kwa jwele juŵakwete cikwakwa acitiji kuti, “Mkamulisye masengo cikwakwa cenuco, mtande kukata mipeleya kutyocela ku mgunda wa mipeleya ŵa cilambo capasi pakuti mipeleyajo jajiwile kalakala.”

¹⁹ Papopo, lilayika lila lyagatandite masengo ni cikwakwa cakwe cila, ni ŵakatile mipeleya josope ja pacilambo capasi, ni kujiponya mwakuminyila mipeleya, yele yikugopolela lutumbilo lwa Mlungu.

²⁰ Mipeleya jila jaminyidwe m'malo mwakuminyila mipeleyajo kusa kwa msinda. Mwakuminyila mipeleyamo mwakopwece miasi nipo jaliji mkwendelecela mpela lusulo, ulewu wakwe makilomita 300, nipo kusokoka kwakwe kwaliji ciŵandika mamita gaŵili.