Chunukuko 13 - Chiyawo Bible

Yilombo yiŵili

¹ Kaneko naciweni cilombo cili mkucuwuka m'nyasa, cakwete misengo likumi ni mitwe msano ni jiŵili. Pa msengo uliwose cawete cisindi ca ucimwene, pa mtwe uliwose paliji pana lina lyakumnyosya Mlungu.

² Cilombo cele cinaciwenici caliji mpela cisuŵi, sajo syakwe syaliji mpela sya cilombo cakolanjidwa cimbalangondo, nipo pakamwa pakwe paliji mpela pa lisimba. Cingwena cila capelece macili gakwe kwa cilomboco, citengu cakwe ca ucimwene, nambo soni ulamusi wekulungwa.

³ Umo mwa mitwe jakwe wawonekaga mpela ukwete liŵanga lyele cikakombolece kuwa nalyo, nambo liŵangalyo lyaposile, pelepo ŵandu wosope ŵacikuyaga cilomboco acisimongaga.

⁴ Jwalijose ŵacilambilaga cilombo cila ligongo lyakuti caliji cili cipelece macili gakwe kwa cingwena cila. Jemanjajo ŵacilambile soni cilombo cila aciŵecetaga kuti, “Ana ŵani mpaka alandane ni cilomboci, ana ŵani mpaka amenyane naco?”

⁵ Cilombo cila cakundidwe kuti ciŵecete maloŵe gakulikwesya ni gakumnyosya Mlungu. Capegwile macili gakulamulila kwa miesi makumi mcece ni jiŵili.

⁶ Sambano catandite kuŵeceta maloŵe gacipongwe gakumnyosya Mlungu, lina lya calakweco, malo gakwe kucikusatama, ni wosope ŵakutama kwinani.

⁷ Cakundidwe kumenyana ni ŵandu ŵa Mlungu ni kwapunda. Capegwile soni ulamusi wakwalamulila ŵandu ŵa lukosyo lulilose, mtundu uliwose, ni ciŵeceto cilicose.

⁸ Wosope ŵakutama pa cilambo capasi tacicilambila calakweco, ni kuti jwalijose, kugopolela kuti jwalijose jwele cipanganyikwile cilambo capasi, lina lyakwe nganililembedwa mu buku ja ŵa umi ja Mwanace Jwangondolo juŵawulajidwe jula.

⁹ Naga jwine akwete mapikanilo, apikanicisye.

¹⁰ Jwele jwakwenela kwawula ku ukapolo tacijawula ku ukapolo kusyene. Jwakwenela kuwulajidwa ku ngondo taciwulajidwa ku ngondo kukoko. Pelepa ni pele ŵandu ŵa Mlungu akwenela kulosya kupimilila kwawo ni kulimbicila mcikulupi cawo.

¹¹ Kaneko naciweni cilombo cine cili mkukopoka pasi. Cakwete misengo jiŵili mpela mwanace jwangondolo, nipo caŵecetaga mpela cingwena.

¹² Caŵecetaga m'malo mwa cilombo candanda cila mwamacili gicapelece cilombo candanda cila. Calakweco cakanganicisyaga ŵandu ŵakutama pa cilambo capasi kuti acilambileje cilombo candanda cila cele liŵanga lyakwe likakombolece kuwa nalyo lila lyaliji lili liposile.

¹³ Cilombo caŵilici catendaga yindu yakumasya lunda, cayice nawo moto pa cilambo capasi kutyocela kwinani, ŵandu ali mkulola.

¹⁴ Calambusyaga soni ŵandu ŵa pa cilambo capasi ni yakumasya lunda yicakundidwe kutenda pameso pa cilombo candanda cila. Casalilaga ŵandu ŵakutama pa cilambo capasi kuti apanganye ciwanicisyo cakucicimbicisya naco cilombo candanda cila cele cicawulasidwe ni upanga, nambo calijipe cijumi.

¹⁵ Cilombo caŵilici cakundidwe kupepelela lipuje ku ciwanicisyo ca cilombo candanda cila, kuti mpaka ciŵeceteje, ni kuwulaga jwalijose jwangacilambila calakweco.

¹⁶ Cilomboco cakanganicisye ŵandu wosope, ŵacanandi ni ŵacakulungwa, ŵakulaga ni ŵakusicila, acikapolo ni alukosyo, kuti akole cimanyisyo pa ligasa lyawo lya kumlyo kapena pawusyo pawo,

¹⁷ kuti jwine jwalijose akasuma kapena kusumisya kandu naga ŵangali cimanyisyo celeci. Cimanyisyo celeci cili lina lya cilombo cila kapena nambala jijikwimilila lina lyakwe.

¹⁸ Pelepa pakusosekwa lunda. Jwakwete lunda agopolele nambala ja cilomboco, pakuti nambalajo jikugopolela lina lya mundu. Nambala jakwe jili 666.