Chunukuko 12 - Chiyawo Bible

Mesomkulola ga jwamkongwe ni cingwena cekulungwa

¹ Kaneko kwinani kwawonece cimanyisyo cekulungwa. Jwapali jwamkongwe, cakuwala cakwe caliji lyuŵa, nipo sajo syakwe ŵaliji ali apondile pa mwesi, soni pa mtwe pakwe paliji pana cisindi ca ucimwene cicakwete ndondwa likumi ni siŵili.

² Jwamkongwejo jwakwete msigo, nipo pa ndaŵi jakuti aŵelece ŵagumisile mnope ligongo lya kupweteka kwa kuŵeleka.

³ Kwinani kwawonece soni cimanyisyo cine cakumasya lunda. Kwawonece cingwena cekulungwa, cecejewu cicakwete mitwe msano ni jiŵili ni misengo likumi; pa mtwe uliwose cawete cisindi ca ucimwene.

⁴ Ni mcila wakwe ŵawutile mbuwa jimo mwa mbuwa sitatu sya ndondwa sya kwinani, ni kusigwicisya pa cilambo capasi. Cingwenaco cajimi pameso pa jwamkongwe jula juŵaliji ciŵandika kuŵeleka mwanace jula, kuti mwanacejo pitagambe kupagwa, cimlye.

⁵ Kaneko jwamkongwejo jwaŵelece mwanace jwamlume, jwakwenela kulamulila mitundu josope ja ŵandu ni ulamusi wakwapunda amagongo wosope. Mwanacejo ŵasumulidwe m'myala mwa mamagwe ni kwawula najo kwa Mlungu ni ku citengu cakwe ca ucimwene.

⁶ Papopo jwamkongwe jula jwatilile ku cipululu, kwele Mlungu ŵakolosisye cile malo gakwe, kuti jwamkongwejo akasunjidweko masiku 1,260.

⁷ Sambano jatandite ngondo kwinani. Mikaele* ni malayika gakwe ŵaliji mkumenyana ni cingwena cila. Cingwenaco pampepe ni malayika gakwe ŵajigalene wosope,

⁸ kukuputa ngondo, nambo nganapunda, mwakuti jwalakwejo pamo ni malayika gawo nganakundidwa soni kutama kwinani.

⁹ Cingwena cekulungwa cakalakala cila cagwisidwe pa cilambo ca pasi pano. Celeci ni cele cikusaŵilanjidwa kuti Jwakusakala kapena Satana,* cele cilambwisye ŵandu ŵa pa cilambo cosope capasi. Caponyedwe pa cilambo pampepe ni malayika gakwe gosope.

¹⁰ Papopo napikene maloŵe gamacili kutyocela kwinani gacisalaga kuti, “Sambano cikulupusyo cakwe, macili ni ucimwene wakwe ni ulamusi wa Klistu* uyice! Pakuti jwele juŵajimi pameso pa Mlungu jwetu acaŵecetelaga mwakwasisya acimjakwe musi ni cilo aponyedwe kusa.

¹¹ Acalongo acimjetuwo ŵampundile jwalakwejo ni miasi ja Mwanace Jwangondolo jula, nambo soni pa maloŵe gasyesyene yiŵatendelaga umboni. Jemanjajo ŵalipelece mnope mwakuti nganajogopa atamose kuwa.

¹² Myoyo sengwani, Cilambo ca kwinani pampepe ni ŵakutama kweleko. Nambo mkwete likungu, cilambo capasi ni nyasa, pakuti Satana atulucile kwa jemanja. Ali jwaukali mnope ligongo akumanyilila kuti jigambile kumsigalila ndaŵi panandipe.”

¹³ Sambano picalolite cingwena cila kuti ciponyedwe pacilambo capasi, catandite kumsawusya jwamkongwe juŵaŵelece mwanace jwamlume jula.

¹⁴ Jwamkongwejo jwapegwile mapapiko gaŵili ga nyanga jekulungwa kuti apakombole kuguluka ku malo gakwe gala ku cipululu, kwele kutakasamalilidwe cenene kwa yaka yitatu ni hafu, kogopela kuti cingwena cekulungwa cila citakumjonaga.

¹⁵ Pelepo cingwena cila camsunile jwamkongwe jula mesi gejinji mpela ga mu lusulo ni cakulinga cakuti gamkokole.

¹⁶ Nambo cilambo capasi camkamucisye jwamkongwejo; cilambo cawugwile kukamwa kwakwe ni kugamila mesi gosope gigasunidwe ni cingwena cila.

¹⁷ Cingwena cila camtumbilile jwamkongwe jula, myoyo catyosile ni kuja kukutandana ni ŵanace wosope ŵa jwamkongwe jula, ŵele ŵali ŵandu wosope ŵakukuya malamusi ga Mlungu ni kumtendela umboni Yesu.*

¹⁸ Myoyo cajile kukwima mu msanga wa mungulugulu nyasa.