Chunukuko 11 - Chiyawo Bible

¹ Jwine jwakwe jwambele une litete lyakulinjila, lyamti mpela simbo, ni ŵasalile une kuti, “Nyakukani, mjawule mkapime Nyumba ja AMBUJE ni malo gakupelecela mbopesi, soni mkaŵalanje ŵandu ŵakulambila m'Nyumbamo.

² Nambo luŵala lwakusa kwa Nyumbajo mkaja kululinga. Luŵala lwelelu lwapegwile kwa ŵandu ŵakusa, nipo jemanjajo taciwulamulila Msinda Weswela kwa miesi makumi mcece ni jiŵili.

³ Tinjituma mboni syangu siŵili syetakule yisaka, kuti jemanjajo talalicile maloŵe gakutyocela kwa Mlungu kwa masiku 1,260.”

⁴ Mboni siŵilisyo sili yitela yiŵili yila ya olifi,* ni simbo siŵili sya nyali sila syele sili pameso pa Ambuje ŵakulamulila cilambo cosope capasi.

⁵ Jwine jwalijose naga akusaka kusiwulasya mbonisyo, moto ukusakopoka kukamwa kwawo ni kwajonanga amagongo ŵawowo. Myoyo mundu jwalijose jwakusaka kusipweteka mbonisyo tacijenela kuwulajidwa mwa litala lilyolyo.

⁶ Mbonisyo sikwete macili gakujitaŵa ula kuti jikagwa pa masiku gaŵalalicilaga jemanjajo maloŵe gakutyocela kwa Mlungu. Sikwete soni macili gakusyusya mesi kuŵa miasi. Sikwete soni macili gakwikasya mlili uliwose pa cilambo capasi, ndaŵi jilijose sitisisose mbonisyo.

⁷ Mbonisyo patisicimalisya kutendela umboni wawo, cilombo cakukopoka kwisimbo cila ticicimenyana ni jemanjajo. Calakweco ticicapunda jemanjajo ni kwawulaga,

⁸ nipo mitembo jawo tijiciŵa cigonele mu msewu wa mu msinda wekulungwa, kwele kuŵakolecedwe Ambuje ŵawo pa msalaba. Mwakusyepelesya msindawo akusawukolanga kuti “Sodomu,” kapena “Iguputo.”

⁹ Ŵandu ŵa mitundu josope, ŵa ngosyo syosope ni ŵa yiŵeceto yakulekanganalekangana tacijilolecesyaga mitembojo kwa masiku gatatu ni hafu, ali mkukana kuti jisicidwe mwilembe.

¹⁰ Ŵandu wosope ŵakutama pa cilambo capasi tacisangalala nayo yeleyi. Tacisangala ni kutumicisyana mituka, ligongo lyakuti ŵakulocesya ŵaŵiliŵa ŵasawusyaga mnope ŵandu ŵakutama pa cilambo capasi.

¹¹ Pigamasile masiku gatatu ni hafu gala, lipujungu lyakupeleka umi lyakutyocela kwa Mlungu lyajinjile mwa ŵakulocesyawo. Myoyo ŵajimi, nipo wosope uŵaweni jemanjajo ŵakamwilwe ni woga wekulungwa.

¹² Kaneko ŵapikene maloŵe gamacili gakutyocela kwinani gacitiji kuti, “Myice akuno.” Jemanjajo ŵapite kwinani m'mawunde, amagongo ŵawo ŵala ali mkwawona.

¹³ Ndaŵi jijojo kwatesile cisukunya camacili, mwakuti mbali jimo ja mbali likumi sya msinda jagwile mwakuti ŵandu 7,000 ŵawulajidwe ni cisukunyaco. Ŵakusigalawo ŵajogwepe nipo ŵatandite kumlumba Mlungu jwakwinani.

¹⁴ Likungu lyaŵili lila lipite sambano, nambo likungu lyatatu likwisa sampano.

Ya lipenga lya msano ni kaŵili

¹⁵ Kaneko lilayika lya msano ni kaŵili lyagombile lipenga lyakwe. Pilyatesile myoyo kwinani kwapikanice maloŵe gamacili. Maloŵe gatite kuti, “Sambano macili gakulamulila cilambo capasi gali m'myala mwa Ambuje ŵetu ni mwa jwakusagulidwa jwakwe jula, nipo tacilamulila mpaka ndaŵi syosope.”

¹⁶ Kaneko acakulungwakulungwa ŵakwana makumi gaŵili ni mcece ŵala ŵakutama pa yitengu yawo ya ucimwene pameso pa Mlungu ŵala, ŵaligwisisye camakuku ni kumlambila Mlungu.

¹⁷ Jemanjajo ŵatite kuti, “Ambuje Mlungu ŵamacili gosope, Ŵalakwe ŵapali nipo ŵapali kala! Tukwatogolela ligongo lyakuti alosisye macili gawo gekulungwa, soni ŵalakwe atandite kuwutamilisya ucimwene wawo.

¹⁸ Ŵandu ŵakusa naga akutumbila, nombe ŵalakwe akusatumbila. Sambano ndaŵi jakwalamula ŵawe jikwanile. Ndaŵi jakupeleka mbote kwa ŵakutumicila ŵawo jikwanile, ŵakulupilila wosope kwa ŵakulocesya, ni kwa ŵandu wosope ŵakwajogopa ŵalakwe, ŵacakulungwa ni ŵa canandi ŵakwe. Jiyice ndaŵi jakuti ajonanje ŵandu ŵele ŵajonasile cilambo capasi.”

¹⁹ Nyumba ja AMBUJE kwinani jawugwice, nipo Libokosi lya Cilanga* ca Mlungu lyawonece m'Nyumbamo. Papopo jamesisye njasi, lisegwe, kulindima ni cisicinya, nipo kwagwile matalila gekulungwakulungwa.