Chunukuko 10 - Chiyawo Bible

Lilayika ni kacipukutu

¹ Kaneko naliweni lilayika line lyamacili mnope lili mkutuluka kutyocela kwinani. Lyaŵijililidwe ni mawunde soni lyakwete ukunje wa ula kusyungulila mtwe wakwe. Ngope jaliji mpela lyuŵa, soni ngongolo syakwe syaliji mpela msati ja moto.

² Lyakwete kacipukutu kewunukulidwe m'myala mwakwe. Ni lukongolo lwakwe lwa mlyo lwapondile pa nyasa, ni lwa kumciji lwapondile pamkuli.

³ Myoyo lyagumisile mwakwesya maloŵe mpela kwa lisimba. Lilayikalyo pilyagambile kutongola myoyo, yilindimo msano ni yiŵili yila yalindime.

⁴ Kulindimako pikwagambile kutendekwa, naliji ciŵandika kuti lembe. Nambo napikene liloŵe kutyocela kwinani licitiji, “Mkajuwula yayiŵecete yilindimo msano ni yiŵili yila, soni mkayilemba!”

⁵ Pelepo lilayika linaliweni lili lijimi pa nyasa ni pamkuli lila, lyakwesisye mkono wakwe wamlyo kwinani.

⁶ Lili litesile myoyo lilayika lila lyalumbile mu lina lya Mlungu jwacijumi ndaŵi syosope, juŵapanganyisye kwinani ni cilambo capasi ni yosope yiyikutama mwelemo, ni soni nyasa ni yosope yiyikutama mwelemo. Kulumbila* kwa lilayikalyo lyatite kuti, “Mlungu ngasajembecela atamose panandi kutenda yakuyisaka.

⁷ Lilayika lya msano ni gaŵili lila pilyagombile lipenga lyakwe, ya asili yiŵalinganyisye Mlungu kuyitenda tiyicitendekwa, mpela muŵatendele cilanga* jwalakwejo kwa ŵakutumicila ŵakwe ŵala, ŵakulocesya.”

⁸ Pelepo maloŵe ginagapikene kutyocela kwinani gaŵecete soni ni une, kuti, “Mjawule mkajigale kacipukutu kala kakali m'myala mwa lilayika lilipondile m'nyasa ni pamkuli lila.”

⁹ Myoyo najawile kwa lilayikalyo ni kuliŵenda kuti ambe kacipukutuko. Lyalakwejo lyatite, “Jigalani mlye. Kaŵaŵeje m'matumbo mwenu, nambo mkamwa mwenumo kalyolyopeleje mpela uci.”

¹⁰ Nakajigele kacipukutuko kutyocela m'myala mwa lilayika lila, ni nalile. Mkamwamu kalyolyopelaga mpela uci, nambo pinakamisile, m'matumbomu mwapwetekaga.

¹¹ Piŵasalile kuti, “Mkwenela kwenesya soni ya ngosyo sya ŵandu, mitundu ja ŵandu ni ya yiŵeceto yakulekanganalekangana, ni ya ayimwene ŵajinji.”