Chunukuko 1 - Chiyawo Bible

Maloŵe gandanda

¹ Bukuji jikulondesya yiŵajuwile Yesu* Klistu,* ni cakulinga cakuti jwalakwejo ŵasalile ŵakutumicila ŵakwe yindu yakusaka Mlungu kuyitenda pangakaŵa. Myoyo ŵayitesile yeleyi kuti yiŵe yakumanyika pakulituma lilayika lyakwe kwa jwakutumicila jwakwe Yohane,

² ni ŵasasile yosope yene yiŵayiweni. Aji jili ngani jakwayana ni utenga wakutyocela kwa Mlungu, nambo soni pa yosope yakuwona yiŵaŵecete Yesu Klistu.

³ Jwana upile mundu jwakuŵalanga bukuji, nambo soni ŵana upile ŵandu ŵele ŵakusapikana ni kutenda yigakuti maloŵe ga bukuji, pakuti ndaŵi jiŵandicile jele Mlungu taciyitendesya yindu yeleyi kuti yitendekwe.

Yohane akupeleka moni ku mipingo msano ni jiŵili

⁴ Une, Yohane, ngulembela cikalataci ku mipingo msano ni jiŵili ja ku upande wa Asiya.* Ngupopela kuti mpocele Umbone mtima ni mtendele yakutyocela kwa Mlungu. Jwelejo ni jwali sambano, soni juŵapali kala, nambo soni ni jwele jwakwisa, ni kutyocela kwa Misimu msano ni jiŵili jijikusatama pasogolo pa citengu ca Ucimwene wa Mlungu.

⁵ Amsalalile mtima ni kumpa mtendele Yesu Klistu, mboni jakulupicika, jwele jwali jwandanda kwimusidwa kutyocela ku ŵawe, soni jwali mwenye jwakwalamulila ayimwene wosope ŵa pacilambo capasi. Jwalakwejo akusatunonyela, soni kupitila mu ciwa cakwe ŵatugopwele ku ulemwa wetu,

⁶ ligongo lya yeleyi atutesile uwe kuŵa ŵa mwiŵasa lya ŵakutaga mbopesi ŵakumtumicila Mlungu Atati ŵakwe. Myoyo Yesu Klistujo apocele lumbili ni macili gakulamulila mpaka ndaŵi syosope. Ami.*

⁷ Mlole! Akwisa m'mawunde! Jwalijose tacimwona jwalakwejo, kupwatikapo juŵamsomile jwalakwejo. Ŵandu ŵosope pa cilambo capasi tacimlilila jwalakwejo. Yisyene, tiyiciŵa mpela muyiŵelelemu. Ami.

⁸ Ambuje Mlungu Ŵamaciligosope akuŵeceta kuti, “Une ndili Alefa ni Omega,” jumbali, junapali kala, nambo soni jwele jungwisa pangakaŵa.

Yohane ŵam'weni Klistu kupitila m'mesomkulola

⁹ Une ndili Yohane mlongo mjenu mu cikulupi, nambo soni mjenu jwakumkulupilila Yesu, ndili yalumo ni jemanja mu Ucimwene wa Mlungu, nambo soni mu yipwetesi ni mukupimilila kwakulimbangana. Naŵicidwe pa cilumba ca Patimosi ligongo lyakuti nalalicile maloŵe ga Mlungu nambo soni yakuwona yiŵasasile Yesu.

¹⁰ Pa lisiku lya Ambuje, Msimu walongolelaga, munyuma mwangu napikene liloŵe lya macili mpela kusona kwa lipenga.

¹¹ Liloŵelyo lyatite kuti, “Mlembe mu buku yimkuyiwonayi, ni mjitumisye ku mipingo* msano ni jiŵiliji: mpingo wa ku Efeso, wa ku Similina, Peligamamu, wa ku Tiyatila, wa ku Sadisi, wa ku Filadefiya ni wa ku Laodikeya.”

¹² Pinagalawice kuti nimlole juŵambecetekasyagajo, m'malo mwakwe nayiweni yakuŵikapo nyali ya golidi* yakwana msano ni gaŵili,

¹³ nipo pasikati pa yakuŵika nyalipo jwapali jwine jwakwe juŵawonekaga mpela Mwanace jwa mundu,* ali awete mkanjo welewu soni ŵaliji ali ataŵile lamba jwa golidi kusyungulila pa cidali pakwe.

¹⁴ Umbo syakwe syaliji syeswela mpela litonji lyeswela mnope, kapena utandi wamti mbee; soni meso gakwe ganyesimaga mpela moto.

¹⁵ Sajo syakwe syaliji mkunyesimila mpela cisyano cicaŵicidwe mu ng'aso ja moto, soni liloŵe lyakwe lyaliji mpela kukokoma kwa mesi gejinji.

¹⁶ Ku ligasa lyakwe lya kumlyo ŵanyakwile ndondwa msano ni siŵili, soni mkamwa mwakwe mwapali upanga wakutema kosekose uwakopocele pasa. Ngope jakwe jaliji jakuŵala mnope mpela mulikusaŵalila lyuŵa musi.

¹⁷ Pinam'weni jwalakwejo, nagwile pasi pa sajo syakwe mpela mundu jwam'we. Ŵasajice ligasa lyakwe lyamlyo pa une ni ŵatite kuti, “Mkatenda woga! Une ndili jwandanda ni jwakumalisya.

¹⁸ Une ndili jwa umi! Nawile, nambo sambano ndili cijumi mpaka kalakala. Ngwete ulamusi pa ciwa ni cilambo ca ŵandu ŵawe.

¹⁹ Sambano mlembe yimkuyiwona, yayikutendekwa sambano jino ni yele yitiyicitendekwa msogolo.

²⁰ Aku kuli kugopolela kwa asili kwa ndondwa msano ni siŵili simsiweni mwigasa lyangu lya kumlyo sila, ni yakuŵikapo nyali ya golidi msano ni yiŵili yila: ndondwa msano ni siŵili sili acimlongola ŵa ku mipingo msano ni jiŵili, nipo yakuŵikapo nyali msano ni yiŵili yili mipingo msano ni jiŵili.