Amosi 9 - Chiyawo Bible

Kulamula kwa AMBUJE

¹ Naweni AMBUJE ali ajimi pambali pa malo gakupelecela mbopesi, nipo ŵalamwile kuti: “Mgwisye makaputolosi ga Nyumba ja AMBUJE, kuti yilimbilimbi yakwe yitenganyice. Myigwicisye pa mitwe pa ŵanduwo. Ŵandu wosope ŵakusigala tinjawulaga pa ngondo. Pangali jutacitila kapena kulupuka.

² Atamose ali asokwele pasi mpaka ku malo ga ŵandu ŵawe,* une tinjasimana kukoko. Atamose ali akwesile mpaka kwinani, tinjakolokola.

³ Atamose ali ajile kukuŵa penani pa Litumbi lya Kalimeli, tinjasosasosa ni kwakamula. Atamose ali anjuŵile une pasi pa nyasa jekulungwa, Une tinjicilamula cilombo ca m'nyasamo kuti cakamule ni kwaluma jemanjajo.

⁴ Naga akujigalidwa ni amagongo ŵawo kuja ku ukapolo, tinjilamula kuti jemanjajo awulajidwe kukoko pa ngondo. Tinjilolecesya kuti jemanjajo yagwile yakusakala ngaŵa yambone.”

⁵ AMBUJE Ŵamaciligosope, naga acikwayiye cilambo capasi, cikusanyelenyenduka; yosope yakutama mwelemo yikusalila. Cilambo cosope cikusakwela ni kupwela mpela mesi ga mu Lusulo lwa Nayilo.

⁶ AMBUJE akusataŵa malo gawo gakutama kwinani, ni kuŵika liwunde mpela msakasa wa pa cilambo capasi. Akusagaŵilasya mesi ga m'nyasa ni kugajita pa cilambo capasi. Lina lyawo lili AMBUJE!

⁷ AMBUJE akuŵeceta kuti, “Jemanja Aisalaeli, mkusaganisya mpela ŵandu ŵa ku Ifiyopiya. Une nakopwesye Afilisiti kutyocela ku cilambo ca Kilete ni ca Asiliya, mpela munamkopocesye jemanja kutyocela ku Iguputo.

⁸ Une, AMBUJE Ŵamaciligosope, nguwulola ni meso gangu ucimwene wakulemwawu wa Isalaeli nipo tinjiwujonanga. Nambo ngasiniyijonanga yisukulu yosope ya Yakobo.*

⁹ “Tinjilamula ni kwatenganya Aisalaeli pasikati pa mitundu ja ŵandu mpela muŵatenganyisyaga mu sefa aku na kuku, kuti ndyosye yosope yayili yangalumbana.

¹⁰ Ŵakulemwa wosope pasikati pa ŵandu ŵangu taciwila ku ngondo kwa wosope ŵakuti, ‘Mlungu ngasakunda cakusakala cilicose kuti ciyice kwa uwe.’ ”

Aisalaeli tacawucisya msogolo

¹¹ AMBUJE akuti, “Lisiku likwisa litinjikwesya soni ucimwene wa Daudi,* wele uli mpela nyumba jajigwile pa masame. Tinjilinganya soni mapupa gakwe ni kugawucisya soni. Tinjigataŵa soni mpela mugaŵelele pandanda.

¹² Pandaŵijo Aisalaeli ŵakusigalila taciyipunda yakusigalila ya ku Edomu, pamo ni yilambo yosope yayikusamanyika ni lina lyangu,” akuti myoyo AMBUJE, ŵitaciyitendekasya yeleyi kutendekwa.

¹³ AMBUJE akuŵeceta kuti, “Ndaŵi jikwisa jele mbeju tisicikula mwacitema kupunda ndaŵi jakwe jagowolela, soni mipeleya tijicikula mwacitema kupunda ndaŵi jakupanganyicisya finyo. M'matumbi timucikopoka finyo jwakulyolyopela, ni kwendelecela pa mikuli josope.

¹⁴ Tinjawucisya soni ŵandu ŵangu Aisalaeli ku cilambo cawo. Tacitaŵa soni misinda ja masame ni kutamaga soni mwelemo; tacilima migunda ja mpeleya ni kumwa finyo jwakwe; tacilima migunda ni kulya yisogosi yakwe.

¹⁵ Tinjatamilisya ŵandu ŵangu mcilambo cinapele jemanjajo, nipo pangali jutacatyosya soni jemanjajo.” AMBUJE Mlungu jwenu aŵecete myoyo.